《 དམངས་དོན་ཁྲིམས་གཞུང 》 ལས་ མངལ་གནས་ཕྲུ་གུ་ཡིས་ཤུལ་ནོར་ཤུལ་འཛིན་བྱས་ཆོག་གམ།

    ● དོན་ཚན་བཅུ་དྲུག་པ། ཤུལ་ནོར་ཤུལ་འཛིན་དང་སྦྱིན་ནོར་དང་ལེན་སོགས་མངལ་གནས་ཕྲུ་གུའི་ཁེ་ཕན་སྲུང་སྐྱོབ་བྱེད་རྒྱུ་དང་འབྲེལ་བ་ཡོད་ན། མངལ་གནས་ཕྲུ་གུ་དེར་དམངས་དོན་ཁེ་དབང་སྤྱོད་ནུས་ཡོད་པར་རྩི་དགོས། ཡིན་ནའང་མངལ་གནས་ཕྲུ་གུ་སྐྱེ་དུས་ཤི་རོ་ཡིན་ན་དེར་དམངས་དོན་ཁེ་དབང་སྤྱོད་ནུས་ཡེ་ནས་མེད་པ་ཡིན།

ཁྲིམས་ལུགས་གསལ་འགྲེལ།

     《དམངས་དོན་ཁྲིམས་གཞུང》ལ་མངལ་གནས་ཕྲུ་གུའི་ཁེ་ཕན་ལ་དམིགས་བསལ་གྱིས་སྲུང་སྐྱོབ་བྱེད་པའི་ལམ་ལུགས་བཟོས་ཡོད། གཏན་འབེབས་ལྟར་ན། ཤུལ་ནོར་ཤུལ་འཛིན་དང་འབྲེལ་བ་ཡོད་པ་ཡིན་ན་མངལ་གནས་ཕྲུ་གུར་དམངས་དོན་ཁེ་དབང་སྤྱོད་ནུས་ཡོད་པར་བརྩིས་ནས་ཤུལ་ནོར་ཤུལ་འཛིན་བྱེད་པའི་ཐོབ་ཐང་དང་ཁེ་དབང་ཡོད། འོན་ཀྱང་མངལ་གནས་ཕྲུ་གུ་སྐྱེ་དུས་ཤི་རོ་ཡིན་ན་དེར་དམངས་དོན་ཁེ་དབང་སྤྱོད་ནུས་ཡེ་ནས་མེད་པ་ཡིན།