ཡུག་རེན་ཕྱོགས་ཀྱིས་ད་དུང་ཚེས་22ཉིན་ཨུ་རུ་སུའི་དམག་གིས་ཧོར་ཁོ་ཧྥུ་ཡི་བརྙན་འཕྲིན་མཐོ་ལྕོགས་ཤིག་ལ་འཇབ་རྒོལ་བྱས་པས་ས་གནས་དེ་གའི་བརྙན་འཕྲིན་བརྡ་རྟགས་ཆད་ཡོད་ཅེས་བཤད་པ་རེད། ཨུ་རུ་སུའི་སྨྱན་སྦྱོར་གྱིས་གནས་ཚུལ་སྤེལ་ནས། མཐོ་ལྕོགས་དེའི་ཐོག་ཡུག་རེན་གྱི་མཁའ་ཟོན་འཕྲིན་གཏོང་མ་ལག་བཙུགས་ཡོད་ཅེས་བརྗོད་པ་རེད། ཨུ་རུ་སུའི་གཞུང་ཕྱོགས་ནས་དོན་དེའི་ཐད་ལན་ཆ་བྱས་མེད་པ་རེད།

ཨུ་རུ་སུས་གལ་ཏེ་ཕོ་ལན་གྱི་མངའ་ཁོངས་ནང་ཨ་རིའི་ཉིང་རྡུལ་མཚོན་ཆ་ཡོད་ཚེ། གང་དེ་ཨུ་རུ་སུའི་ཁྲིམས་མཐུན་གྱི་རྡུང་རྡེག་གཏོང་ཡུལ་དུ་འགྱུར་ངེས་ཡིན་ཞེས་བརྗོད་པ།

ཚེས་22ཉིན་ཕོ་ལན་སྨྱན་སྦྱོར་གྱིས་གནས་ཚུལ་སྤེལ་བར་གཞིགས་ན། ཕོ་ལན་གྱི་ཙུང་ཐུང་ཏུའུ་ཏ་ཡིས་བཅར་འདྲི་དང་ལེན་བྱེད་སྐབས། ཕོ་ལན་གྱིས་རང་རྒྱལ་ཁབ་ཀྱི་མངའ་ཁོངས་ནང་བྱང་ཆིངས་མནའ་གྲོགས་ཀྱི་ཉིང་རྡུལ་མཚོན་ཆ་བཀོད་སྒྲིག་བྱ་རྒྱུའི་གྲ་སྒྲིག་བྱས་ཟིན་ཞེས་བཤད་པ་རེད། ཚེས་22ཉིན་ཨུ་རུ་སུའི་ཕྱི་འབྲེལ་པུའི་མགྲིན་ཚབ་པ་བཀྲ་ཧ་ལུའོ་ཝ་ཡིས། གལ་ཏེ་ཕོ་ལན་གྱི་མངའ་ཁོངས་ནང་ཨ་རིའི་ཉིང་རྡུལ་མཚོན་ཆ་ཐོན་ཚེ། འབྲེལ་ཡོད་སྒྲིག་བཀོད་དེ་ཨུ་རུ་སུ་ཕྱོགས་ཀྱིས་འཕྲལ་མར་ཁྲིམས་མཐུན་ངང་རྡུང་རྡེག་གཏོང་བའི་དམིགས་འབེན་དུ་འཇོག་རྒྱུ་ཡིན་ཞེས་བཤད་པ་རེད།

རྒྱལ་སྤྱིའི་མི་སྣས་ཨུ་རུ་སུ་དང་ཡུག་རེན་བར་གྱི་གདོང་ཐུག་དེ་ནི་ཨ་རིས་གཙོ་བོར་བྱས་པའི་བྱང་ཆིངས་ལས་ཐོན་པ་དང་། ཨ་རི་དང་བྱང་ཆིངས་སྒྲིག་འཛུགས་ཀྱིས་རྒྱུན་ཆད་མེད་པར་མེ་ཚ་བའི་སྒང་ལ་ཤིང་གཤགས་པའི་དཔེ་ལྟར་བྱས་པས་གདོང་ཐུག་མུ་མཐུད་ཚབས་ཆེ་རུ་ཕྱིན་ཡོད་ཅེས་བསྟན་ཡོད། 

ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།

ཞུ་དག ཟླ་བ་ཚེ་རིང་། 

སྒྲིག་སྒྱུར། རྡོ་ཐར།