མིག་སྔའི་བར་དཀར་མཛེས་ཁུལ་ལི་ཐང་རྫོང་སློབ་གསོ་ལུས་རྩལ་ཁོངས་གཏོགས་ཀྱི་མི་15ཡིས་སྒྲིག་འགལ་ཁྲིམས་འགལ་བྱས་པས། ཏང་གི་སྒྲིག་ཁྲིམས་དང་སྲིད་དོན་གྱི་ཆད་པ་བཅད་པ་དང་། དེའི་ནང་ལས་མི་3ཁྲིམས་འཛིན་ལས་ཁུངས་སུ་རྩིས་སྤྲད་པ་དང་སྒྲིག་འགལ་ཁྲིམས་འགལ་དང་ཚུལ་མིན་གྱི་ཐོབ་ཆ་སྒོར་ཁྲི་159.74གཞུང་བཞེས་བཏང་ཡོད། ལི་ཐང་རྫོང་གི་སློབ་ཁྲིད་མ་ལག་གི་གྱོད་གཞི་རབ་དང་རིམ་པས་ང་ཚོར་ལྟ་སྐུལ་དོ་དམ་གནད་ལ་མི་འཁེལ་བ་དང་ནོར་དོན་དོ་དམ་ཚད་ལྡན་མིན་པ་ནི་ཚངས་དབང་རིག་འཛིན་སོགས་ལོག་ལམ་དུ་སྐྱོད་པའི་རྒྱུ་རྐྱེན་གལ་ཆེན་ཞིག་ཡིན་པའི་ཉེན་བརྡ་བཏང་ཡོད།

     ཚངས་དབང་རིག་འཛིན་དང་ཆབས་ཅིག་ཁྲིམས་འགལ་བྱེད་སྤྱོད་སྤེལ་མཁན་གྱི་ཁྲོད་དུ་ད་དུང་ཁོ་པའི་གྲོགས་པོ་སྟེ། ལི་ཐང་རྫོང་མོ་ལ་གྲོང་རྡལ་སློབ་ཆུང་གི་དེ་སྔའི་དགེ་རྒན་དང་ནོར་དོན་འགན་འཁུར་བ་ཝང་ཡིང་ཀང་ཡོད་པ་རེད། ལོ་རབས་80པའི་རྗེས་སྐྱེས་ན་གཞོན་ལས་བྱེད་པ་འདིས་སྔོན་ཆད་ཡར་ཐོན་བརྩོན་ལེན་བྱས་མྱོང་མོད། འོན་ཀྱང་མཇུག་མཐར་ཡོད་ཚད་རྒྱན་འཛུགས་ནང་དུ་བསྐྱལ་ཡོད།

     འདི་དག་གིས་ང་ཚོར་རིམ་ཁག་སློབ་གསོའི་སྡེ་ཚན་གྱིས་ཕྱི་ནང་མཉམ་འགུལ་གྱི་ལྟ་སྐུལ་ལམ་སྲོལ་ཧུར་ཐག་བཙུགས་ཏེ། སློབ་གྲྭའི་དབང་ཆའི་ལྟ་སྐུལ་མ་ལག་འཐུས་ཚང་དུ་གཏོང་བ་དང་། ལྷག་པར་དུ་འགག་རྩའི་ལས་གནས་དང་གཙོ་གནད་མི་སྣའི་དབང་ཆའི་འཁོར་སྐྱོད་ལ་ལྟ་སྐུལ་བྱེད་ཤུགས་ཆེ་རུ་གཏོང་བ། སློབ་གྲྭའི་སྤྱོད་གཙང་རིག་གནས་འཛུགས་སྐྱོང་ལ་ཤུགས་སྣོན་བརྒྱབ་ནས་རུལ་སུངས་བྱེད་སྤྱོད་སྣ་ཚོགས་ལ་ཞིབ་བཤེར་ཐག་གཅོད་དང་རྡུང་རྡེག་གཏོང་ཤུགས་ཆེ་རུ་གཏོང་བ་བཅས་བྱས་ཚེ། གཞི་ནས་སློབ་གསོའི་ཁོངས་གཏོགས་སུ་ད་གཟོད་རུལ་སུངས་བྱེད་མི་ཕོད་པ་དང་། རུལ་སུངས་བྱེད་མི་ཐུབ་པ། རུལ་སུངས་བྱེད་མི་འདོད་པ་བཅས་ཀྱི་རྣམ་པ་བཟང་པོ་ཆགས་པར་སྐུལ་འདེད་གཏོང་ཐུབ་པའི་དྲན་སྐུལ་བྱས་ཡོད།