ཨུ་རུ་སུའི་སྨྱན་སྦྱོར་གྱིས་ས་གནས་དེ་གའི་དུས་ཚོད་སྤྱི་ཟླ་4པའི་ཚེས་7ཉིན་ཨུ་རུ་སུའི་རྒྱལ་ཕྲན་མཉམ་འབྲེལ་བདེ་འཇགས་ཅུས་ཀྱི་ཆ་འཕྲིན་མི་སྣའི་སྐད་ཆ་དྲངས་ནས་གནས་ཚུལ་སྤེལ་བར་གཞིགས་ན། ཨུ་རུ་སུའི་རྒྱལ་ཕྲན་མཉམ་འབྲེལ་བདེ་འཇགས་ཅུས་ཀྱིས་ཨ་རིའི《ཝར་ཅེ་ཁྲོམ་གཞུང་ཉིན་རེའི་ཚགས་པར》གྱི་མོ་སི་ཁོའི་ཡན་ལག་ཁང་གི་གསར་འགོད་པ་ཨའེ་ཝུན·ཀེར་ཧྲི་ཁོ་ཝུའེ་ཆིར་གསང་མྱུལ་གྱི་ཉེས་པ་ཡོད་པའི་ཞུ་གཏུག་དངོས་སུ་བྱས་ཡོད། ཀེར་ཧྲི་ཁི་ཝེ་ཆིས་ཨུ་རུ་སུ་ཕྱོགས་ཀྱིས་ཉེས་འགེལ་བྱས་པ་དེ་ཁས་ལེན་བྱས་མེད།

     ས་གནས་དེ་གའི་དུས་ཚོད་སྤྱི་ཟླ་3པའི་ཚེས་30ཉིན། ཨུ་རུ་སུའི་རྒྱལ་ཕྲན་མཉམ་འབྲེལ་བདེ་འཇགས་ཅུས་ཀྱིས་གསལ་བསྒྲགས་སྤེལ་བའི་ནང་བརྗོད་པར། ཨ་རིའི་གསར་འགོད་པ་ཀེར་ཧྲི་ཁོ་ཝུའེ་ཆིས་གསང་མྱུལ་གྱི་བྱེད་སྒོ་སྤེལ་བས་ཨུ་རུ་སུའི་ཡེ་ཁ་ཅེ་ལིན་པའོ་རུ་བཟུང་བ་དང་། ཀེར་ཧྲི་ཁོ་ཝུའེ་ཆིས་ཨ་རི་ཕྱོགས་ཀྱི་མཛུབ་སྟོན་ལྟར་ཨུ་རུ་སུའི་དམག་དོན་བཟོ་ལས་ཁེ་ལས་ཤིག་ལས་རྒྱལ་ཁབ་ཀྱི་གསང་བའི་ཆ་འཕྲིན་འཚོལ་བསྡུ་བྱས་ནས་འབྲེལ་ཡོད་ཆ་འཕྲིན་རག་ཐབས་བྱེད་སྐབས་རང་སར་བཟུང་ཡོད་པ་རེད།

ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན། 

ཞུ་དག བསྟན་འཛིན།

ཡིག་སྒྱུར། སྒྲོལ་མ་མཚོ།