གསར་འགོད་པས་སློབ་གསོ་པུས་སྐོང་འཚོགས་བྱས་པའི་གསར་འགྱུར་ཡོངས་བསྒྲགས་ཚོགས་འདུའི་ཐོག་ནས་ཤེས་རྟོགས་བྱུང་བར།  སྤྱི་ལོ་2023ལོར། སློབ་ལོ་མ་ལོན་གོང་གི་ཕྲུ་གུ་བུ་བཅོལ་ཁང་དུ་ཞུགས་ཚད་བརྒྱ་ཆ་91.1ཟིན་པ་དང་། ལོ་གོང་མ་ལས་བརྒྱ་ཆའི་གནས་1.4ཡིས་མཐོ་བ་བྱུང་ནས་ལོ་ལྔ་ཚན་གྱི་འཆར་འགོད་བཅུ་བཞི་པའི་འཆར་འགོད་དམིགས་འབེན་སྔ་ནུར་དུ་ལེགས་འགྲུབ་བྱུང་ཡོད། རྒྱལ་ཡོངས་སུ་ཁྱོན་བུ་བཅོལ་ཁང་ཁྲི་27.44ཡོད་པ་དང་། དེའི་ཁྲོད་དུ་ཀུན་ཕན་རང་བཞིན་གྱི་བུ་བཅོལ་ཁང་ཁྲི་23.64ཡོད་པ་དེས་རྒྱལ་ཡོངས་ཀྱི་བུ་བཅོལ་ཁང་གྲངས་འབོར་ཁྲོད་བཟུང་བའི་བསྡུར་གྲངས་དེ་བརྒྱ་ཆ་86.16ཟིན་ནས་ལོ་གོང་མ་ལས་བརྒྱ་ཆའི་གནས་1.2མཐོ་རུ་སོང་ཡོད། 

 རྒྱལ་ཡོངས་སུ་སློབ་ལོ་མ་ལོན་གོང་གི་བུ་བཅོལ་ཁང་དུ་ཡོད་པའི་ཕྲུ་གུའི་མི་གྲངས་དེ་ཁྲི་4092.98ཟིན་པ་དང་། དེའི་ཁྲོད་དུ་ཀུན་ཕན་རང་བཞིན་གྱི་བུ་བཅོལ་ཁང་དུ་ཡོད་པའི་ཕྲུ་གུའི་མི་གྲངས་ཁྲི་3717.01ཟིན་པ་དང་དེས་རྒྱལ་ཡོངས་ཀྱི་བུ་བཅོལ་ཁང་དུ་ཡོད་པའི་ཕྲུ་གུའི་མི་གྲངས་ཁྲོད་བཟུང་བའི་བསྡུར་གྲངས་དེ་བརྒྱ་ཆ་90.81ཟིན་ཞིང་། ལོ་གོང་མ་ལས་བརྒྱ་ཆའི་གནས་1.26མཐོ་རུ་སོང་ཡོད་པ་རེད། 

ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།

ཞུ་དག བཀྲ་ཤིས་བཟང་པོ།

སྒྲིག་སྒྱུར། བྱམས་པ་ཚེ་རིང་།