ས་ཆ་སྦར་མཐིལ་ཙམ་ལས་ཀྱང་ཐོན་འབབ་དེ་ལས་མང་བ་ཡོང་ཐབས་བྱེད་པ།
འདི་ག་ལས་ཁུངས་ནས་སྤེལ་བའི་གནས་ཚུལ། རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་ཀུའོ་ཅིན་ཁའོ་ནི་སྐད་གྲགས་ཡོད་པའི་གྲོ་འདེབས་གསོའི་རིགས་གཅིག་མཁས་ཅན་ཞིག་རེད། འཐུས་མིའི་འགན་སྒྲུབ་ནས་ལོ་གཅིག་རིང་། ཁོང་གིས་ཞིང་ནང་དང་མུ་ཁའི་གསེབ་ཏུ་ཕེབས་ནས་སོན་གསར་ཁྱབ་གསལ་གཏོང་བ་དང་ཞིང་པས་ཚན་རིག་དང་མཐུན་པའི་ངང་ལོ་ཏོག་འདེབས་རྒྱུར་མཛུབ་སྟོན་གནང་ནས་འབྲུ་རིགས་ཀྱི་བདེ་འཇགས་ཆེད་འབད་བརྩོན་ལྷོད་མེད་གནང་ཡོད།
ཉེ་ཆར། ཧོ་པེ་ཧྲེ་ཅ་ཀྲོང་ཤིན་ཅིན་གྲོང་ཁྱེར་གྱི་གྲོ་སྔོ་ལོག་སྐྱེ་འཚར་དུས་ལ་སླེབས་ཡོད། ཀུའོ་ཅིན་ཁའོ་ཡིས་ཚན་ཞིབ་ཚོགས་པ་ཁྲིད་ནས་ཞིང་ནང་དུ་བསྐྱོད་དེ་ས་རྒྱུའི་བཞའ་ཚད་དང་གྲོའི་སྐྱེ་ཚུལ་ལ་དངོས་སུ་ལྟ་ཞིབ་གནང་ཡོད། ཀུའོ་ཅིན་ཁའོ་མཐོང་དུས། ཡུལ་མི་མི་ཉུང་བས་རང་འགུལ་ངང་ཁོང་ལ་འཚམས་འདྲི་ཞུ་བ་དང་སྦྲགས་ལོ་ཏོག་འདེབས་པའི་སྐོར་གྱི་གནད་དོན་བཀའ་འདྲི་ཞུས་ཡོད།
རྐང་འོག་ཏུ་འདམ་རྫབ་ཀྱིས་ཁེངས་པ་དང་། གཞི་རིམ་དུ་གཞི་ཚུགས་ནས་བརྟག་ཞིབ་བྱེད་པ། ཞིང་པའི་བསམ་འདུན་ཉན་བཞིན་ཡོད། དེ་ནི་ཀུའོ་ཅིན་ཁའོ་ཡི་འགན་སྒྲུབ་མྱོང་ཚོར་གལ་ཆེ་ཤོས་ཤིག་རེད།
ཧོ་པེ་ནི་འབྲུ་རིགས་ཐོན་ཁུལ་གྱི་ཞིང་ཆེན་ཆེན་པོ་ཞིག་ཡིན་པ་དང་། ཆུ་གྲོན་ཆུང་གི་ཞིང་ལས་གོང་འཕེལ་གཏོང་རྒྱུ་ནི་ཧོ་པེའི་འབྲུ་རིགས་ཐོན་སྐྱེད་ཀྱི་ཆུ་ཚད་ནུས་ལྡན་ངང་མཐོ་རུ་གཏོང་བའི་ཐབས་ལམ་གལ་ཆེན་ཞིག་ཡིན་ཞིང་། ཀུའོ་ཅིན་ཁའོ་ཡིས་ཚོགས་པའི་སྣེ་ཁྲིད་དེ་སྔ་རྗེས་སུ་ཐོན་བབ་མཐོ་བ་དང་། ཆུ་གྲོན་ཆུང་ཆེ་བ། གྲོའི་སྤུས་ཀ་ལེགས་པའི་སོན་བཟང་ཁག་༣༠ལྷག་ཙམ་གསོ་སྤེལ་གནང་ཡོད།
སྤྱི་ལོ་༢༠༢༣ལོའི་ཚོགས་འདུ་གཉིས་ཐོག་ཀུའོ་ཅིན་ཁའོ་ཡིས་སོན་བཟང་ཁྱབ་གདལ་དང་ཁ་གསབ་ལ་དམིགས་ནས་འབྲེལ་ཡོད་གྲོས་འགོ་བཏོན་ཡོད། འགན་འཁྲི་བསྒྲུབས་ནས་ལོ་གཅིག་སོང་རིང་། ཀུའོ་ཅིན་ཁའོ་ཡིས་ཧོ་པེའི་གྲོ་ཐོན་ཁུལ་གཙོ་བོའི་གྲོང་ཁྱེར་ཚང་མར་ཕེབས་པ་མ་ཟད། ད་དུང་ཧྲན་ཏུང་དང་། ཧྲན་ཞི། ཧོ་ནན་སོགས་སུ་གྲོ་སོན་གསར་པ་ཁྱབ་གདལ་གཏོང་བར་ཕེབས་ཡོད།
འོན་ཀྱང་ཐོན་འབབ་ནུས་ལྡན་ངང་མང་དུ་གཏོང་དགོས་ན་སོན་བཟང་ཁོ་ན་ཡོད་ན་འགྲིག་གི་མེད། ཀུའོ་ཅིན་ཁའོ་ཡིས་བརྟག་ཞིབ་གནང་སྐབས་ས་ཆ་གཅིག་ནང་སོན་རྒྱུ་མི་འདྲ་བ་དང་ཞིང་ནང་གཡོག་བྱེད་བྱེད་སྟངས་མི་འདྲ་བ་ལས་མུའུ་རེའི་ཐོན་འབབ་༡༠%ཡན་གྱི་ཧེ་བག་ཐོན་སྲིད་པ་དང་། འབྲུ་རིགས་མུའུ་རེའི་ཐོན་ཚད་མཐོ་རུ་གཏོང་གཞི་ཆེན་པོ་ཡོད་པ་ཤེས་རྟོགས་བྱུང་ཡོད། འདི་ལོ་ཁོང་གིས་ཞིང་ལས་ལག་རྩལ་ཁྱབ་གདལ་གཏོང་སྟངས་གསར་གཏོད་བྱས་ནས་མི་དེ་བས་མང་བས་ཚན་རིག་དང་མཐུན་པའི་ངང་ཞིང་ཁ་འདེབས་པ་དང་། ཚན་རྩལ་ལ་བརྟེན་ནས་ཞིང་ཁ་འདེབས་པ་ཤེས་སུ་བཅུག་སྟེ། ཐོན་རྫས་གསར་པ་དང་། ལག་རྩལ་གསར་པ། སྒྲིག་ཆས་གསར་པ། ཞིང་པ་གསར་པ་བཅས་མཉམ་འདྲེས་ཐུབ་རྒྱུར་ཤུགས་དགོས་པའི་གྲོས་འགོ་བཏོན་ཡོད།