ཧན་ཀྲེང་གིས་འཛམ་གླིང་རང་བྱུང་ཐེབས་རྩ་ལྷན་ཚོགས་ཀྱི་གོ་ལ་ཧྲིལ་པོའི་སྤྱི་ཁྱབ་ལས་བྱ་དང་མཇལ་མོལ་གནང་བ།
2024-02-29 15:07:00 责编：卓玛才让
འདི་ག་ལས་ཁུངས་ནས་སྤེལ་བའི་གནས་ཚུལ། སྤྱི་ཟླ་༢པའི་ཚེས་༢༨ཉིན་རྒྱལ་ཁབ་ཀྱི་ཀྲུའུ་ཞི་གཞོན་པ་ཧན་ཀྲེང་གིས་པེ་ཅིང་དུ་འཛམ་གླིང་རང་བྱུང་ཐེབས་རྩ་ལྷན་ཚོགས་ཀྱི་གོ་ལ་ཧྲིལ་པོའི་སྤྱི་ཁྱབ་ལས་བྱ་སེ་ཧའེ་ཐེ་དང་མཇལ་མོལ་གནང་ཡོད།
ཧན་ཀྲེང་གིས། ཞི་ཅིན་ཕིང་གི་འབྱུང་ཁམས་དཔལ་ཡོན་དགོངས་པའི་སྣེ་ཁྲིད་འོག་ཏུ་ཀྲུང་གོའི་སྲིད་གཞུང་གིས་སྦགས་མེད་གོང་འཕེལ་གྱི་འདུ་ཤེས་བརྟན་པོ་བཙུགས་པ་དང་ལག་བསྟར་བྱས་པ་དང་། མཛེས་སྡུག་ལྡན་པའི་ཀྲུང་གོ་འཛུགས་སྐྲུན་ལ་གྲུབ་འབྲས་མངོན་གསལ་དོད་པོ་ཐོབ་ཡོད། འཛམ་གླིང་རང་བྱུང་ཐེབས་རྩ་ལྷན་ཚོགས་ནི་གོ་ལ་ཧྲིལ་པོའི་ཁོར་སྲུང་སྒྲིག་འཛུགས་ཀྱི་ཡ་གྱལ་ཞིག་ཡིན་ཞིང་། དུས་རབས་གོང་མའི་ལོ་རབས་༨༠པར་གདན་ཞུས་ལྟར་ཀྲུང་གོར་དོམ་ཁྲའི་སྲུང་སྐྱོབ་སྐོར་གྱི་མཉམ་ལས་གནང་བར་ཕེབས་ནས། ཀྲུང་གོའི་འབྱུང་ཁམས་ཁོར་ཡུག་འཛུགས་སྐྲུན་དང་རྒྱུན་མཐུད་གོང་འཕེལ་ལ་སྐུལ་འདེད་གཏོང་བའི་ཐད་ལེགས་སྐྱེས་ཧུར་ཐག་ཕུལ་ཡོད། རང་བྱུང་ཁོར་ཡུག་ནི་མིའི་རིགས་འཚོ་གནས་ཀྱི་རྨང་གཞི་ཡིན་པས་གཏོར་སྐྱོན་ཕོག་ཚེ་ཉམས་བཟོ་བྱེད་ཤིན་ཏུ་དཀའ་བ་ཞིག་རེད། ཀྲུང་གོས་ཁོར་ཡུག་སྲུང་སྐྱོབ་ལ་མཐོང་ཧ་ཅང་ཆེན་པོ་བྱེད་པ་དང་། གོ་ལ་ཧྲིལ་པོའི་འབྱུང་ཁམས་དཔལ་ཡོན་འཛུགས་སྐྲུན་གྱི་ལྷན་ཞུགས་པ་དང་། ལེགས་སྐྱེས་འབུལ་མཁན། སྣེ་ཁྲིད་པ་བཅས་ཡིན་ཞིང་། ཐེབས་རྩ་ལྷན་ཚོགས་དབར་གྱི་མཉམ་ལས་མུ་མཐུད་ནས་དམ་ཟབ་ཏུ་གཏོང་བ་དང་གོ་ལ་ཧྲིལ་པོའི་འབྱུང་ཁམས་ཀྱི་འགྲན་རྩོད་དག་ལ་མཉམ་དུ་ཁ་གཏད་གཅོག་འདོད་ཡོད་ཅེས་གསུངས་ཡོད།
ཀྲུང་གོས་གོ་ལ་ཧྲིལ་པོའི་རང་བྱུང་སྲུང་སྐྱོབ་དང་འབྱུང་ཁམས་བཅོས་སྐྱོང་བྱེད་པའི་ཐད་ནུས་པ་གལ་ཆེན་འདོན་སྤེལ་བྱས་པར་སེ་ཧའེ་ཐེས་བསྔགས་བརྗོད་ཆེན་པོ་གནང་བ་དང་། ཁོང་གིས། ཀྲུང་གོའི་དབར་གྱི་མཉམ་ལས་ལ་ཤུགས་སྣོན་བརྒྱབ་ནས་གོ་ལ་ཧྲིལ་པོའི་སྐྱེ་དངོས་སྣ་མང་རང་བཞིན་ལ་སྲུང་སྐྱོབ་བྱེད་པ་དང་གོ་ལ་ཧྲིལ་པོའི་རྒྱུན་མཐུད་གོང་འཕེལ་ལ་སྐུལ་འདེད་གཏོང་འདོད་ཡོད་ཅེས་གསུངས་ཡོད།
