འོན་ཀྱང་སུའུ་ཏན་གྱི་ཕྱི་འབྲེལ་པུས་དུས་མཚུངས་སུ། མྱུར་སྐྱོབ་དཔུང་སྡེ་ད་ལྟ་བཟུང་བའི་དམངས་སྤྱོད་རྨང་གཞིའི་སྒྲིག་བཀོད་དང་སྒེར་གྱི་སྡོད་ཁང་ནང་ནས་ཕྱིར་འཐེན་བྱེད་བཞིན་པ་མ་ཟད། བཀག་ཉར་བྱས་པའི་ཉེས་མེད་མི་སེར་དང་སུའུ་ཏན་གྱི་དྲག་ཆས་དཔུང་སྡེའི་གསོན་བཟུང་མི་སྣ་གློད་འགྲོལ་གཏོང་རྒྱུ་དེ་ནི་ཕྱོགས་གཉིས་པོའི་གྲོས་མོལ་ལམ་ལྷོངས་ཡོང་བའི་སྔོན་འགྲོའི་ཆ་རྐྱེན་ཡིན་ཞེས་བརྗོད་པ་རེད།

   སུའུ་ཏན་གྱི་དྲག་ཆས་དམག་དཔུང་དང་མྱུར་སྐྱོབ་དཔུང་སྡེའི་བར་ཟླ་4ཚེས་15ཉིན་ཁར་ཐུམ་སོགས་སུ་གདོང་ཐུག་བྱུང་བ་མ་ཟད། ད་བར་རྒྱུན་མཐུད་བྱས་པ་རེད། སོ་ཏི་ཨ་རབ་དང་ཨ་རིའི་འདུམ་འགྲིག་འོག སུའུ་ཏན་གྱི་གདོང་ཐུག་ཕྱོགས་གཉིས་པོས་ཟླ་5པའི་ཟླ་འགོར་སོ་ཏི་ཨ་རབ་ཀྱི་ཅི་ཏ་རུ་དམག་མཚམས་འཇོག་རྒྱུའི་གྲོས་མོལ་བྱས་པ་རེད། ཕྱོགས་གཉིས་པོས་དུས་ཐུང་ནང་དམག་མཚམས་འཇོག་རྒྱུའི་གྲོས་མཐུན་མང་པོ་འཇོག་མྱོང་ཡོད་མོད། འོན་ཀྱང་གཉིས་ཀས་བརྩི་སྲུང་གང་ཐུབ་བྱས་མེད། ཉིན་ཤས་གོང་། སུའུ་ཏན་དྲག་ཆས་དཔུང་སྡེ་དང་མྱུར་སྐྱོབ་དཔུང་སྡེ་ཡིས་སོ་ཏི་ཨ་རབ་ཀྱི་ཅི་ཏ་རུ་བསྐྱར་དུ་གྲོས་མོལ་བྱས་པ་རེད།