རང་ཉིད་རྣམ་པར་རྒྱལ་དགོས་ན་འདི་དག་ཅིས་ཀྱང་འདོར་དགོས།
སྤེལ་བའི་དུས་ཚོད། : 2018-11-02 ཡིག་གཟུགས། 【 ཆེ། 】 【 འབྲིང་། 】 【 ཆུང་། 】

གཅིག ངོ་སོ་མི་བྱེད་པ།

སྐབས་རེར་མགོ་བོ་སྒུར་ནས་འགྲོ་བ་ནི་ལམ་གསལ་བོ་མཐོང་བའི་ཆེད་དུ་ཡིན། མི་མང་པོ་ཞིག་མིག་སྔའི་ཡོད་ཚད་ཀྱིས་ཚིམས་ཞིང་། བྱ་དངོས་གསར་པ་ལ་ལག་པ་འཆང་བར་ངོ་གནོང་སྟེ། ལག་པ་འཆང་མ་ཐུབ་པར་ངོ་གསོའི་ཆེད་དུ་གོ་སྐབས་མང་པོ་ཤོར་འགྲོ་གི་ཡོད།

གཉིས། གནོན་ཤུགས་མི་སྤྲོད་པ།

དཀའ་ལས་ཁག་མིན་ནི་སེམས་ལ་རག་ལས་པས། ཉག་ཉོག་གིས་མ་གོས་པའི་སེམས་ཁམས་དྭངས་མོ་ཞིག་ཡོད་དགོས་པ་དང་། སེམས་ཁམས་དྭངས་པའི་ཆ་དེ་ག་ཚོད་ཆེ་ན། དེའི་ཚོད་ཀྱིས་སྡུག་བསྔལ་དང་བྲེལ་བའི་ཉོན་མོངས་ཀྱི་སེམས་པ་རྒྱང་རིང་དུ་འགྲོ་ཐུབ།

གསུམ། ཕྱིར་དྲན་མི་བྱེད་པ།

འདས་པའི་གནས་ཚུལ་ལེགས་ཉེས་གང་རུང་དུ་ཚུད་ཀྱང་དེར་ཕྱིར་དྲན་བྱ་རྒྱུ་མེད། དེ་བས་ད་ལྟ་ནས་འགོ་ཚུགས་ཏེ་འབད་བརྩོན་ཆེན་པོས་རང་སེམས་རང་གཅུན་བྱེད་པ་དང་། དངོས་ཡོད་ཀྱི་འཚོ་བའི་ནང་དགའ་དགའ་སྤྲོ་སྤྲོའི་ངང་འཇུག་དགོས།

བཞི། རང་དམས་མི་བྱེད་པ།

མི་ཚང་མ་རླབས་ཆེན་གྱི་མི་སྣ་ཞིག་ཏུ་འགྱུར་མི་ཐུབ་རུང་། མི་ཚང་མ་སེམས་ཤུགས་དང་ལྡན་པ་ཞིག་ཏུ་བསྒྱུར་རུང་སྟེ། རང་དམས་ཀྱི་བསམ་བློ་བསྐྱུར་ནས། ཡིད་ཆེས་ཆེན་པོས་རང་གི་གནས་བབ་དང་མཐུན་པར་བྱས་ཏེ། མི་གཞན་དང་འདྲ་བར་མི་ཚེ་དོན་སྙིང་ལྡན་པ་ཞིག་བསྐྱེལ་དགོས།

ལྔ། སྒྱིད་ལུག་མི་བྱེད་པ།

འབད་བརྩོན་བྱས་ན་མི་ཚེའི་ཁ་ལོ་བསྒྱུར་ཐུབ་པས། བྱ་བ་ཆུང་ཙག་ཅིག་ནས་འགོ་བཙུགས་ཏེ། བློ་བརྟན་འགྱུར་མེད་དང་། ནམ་ཡང་རང་གིས་རང་ལ་སྐུལ་ལྕག་བྱས་ཏེ། བདེ་སྐྱིད་དང་། བདེ་ཐང་། སེམས་བཟང་བཅས་ཀྱི་མི་ཚེ་དོན་སྙིང་ལྡན་པ་ཞིག་བསྐྱེལ་དགོས།

དྲུག སེམས་ཤུགས་ཆག་མི་རུང་།

ཁྱེད་རང་གྲུབ་འབྲས་ལྡན་པའི་མི་ཞིག་བྱེད་བསམ་ན། སོ་སོའི་འབད་བརྩོན་ལ་བརྟེན་དགོས། སྒྱིད་ལུག་གི་གཉེན་པོར་བརྩོན་འགྲུས་བསྟེན་ཚེ། ལེགས་འགྲུབ་མི་འབྱུང་བའི་བྱ་བ་གཅིག་ཀྱང་མེད།

བདུན། འཁང་ར་མི་བྱེད་པ།

འཁང་ར་བྱེད་པ་ལས་འབད་བརྩོན་བྱས་ན་ལེགས། ཕམ་ཁ་ནི་རྒྱལ་ཁའི་རྩ་བ་ཡིན་པས། བྱ་བ་གང་ཞིག་ཡིན་རུང་འཁང་ར་མི་བྱེད་པར་སེམས་ལྷོད་ལ་ཕབ་ཏེ་དང་ལེན་བྱ་དགོས། འབད་བརྩོན་ནི་རེ་བའི་ས་བོན་ཉག་ཅིག་ཡིན་ཏེ། རྟག་ཏུ་འཚོ་བ་འདྲ་མཉམ་མི་འདུག་ཟེར་ནས་འཁང་ར་བྱ་རྒྱུ་མེད། དོན་དུ། གཞན་ལ་ཡོད་པ་དེ་ཁྱེད་ལའང་ཡོད།

བརྒྱད། ཐེ་ཚོམ་མི་བྱེད་པ།

རང་ཉིད་ཀྱི་གདམས་པའི་ལམ་ཁ་དེར་རྒྱུས་ལོན་གསལ་པོ་ཞིག་ཡོད་ན། ཚམ་ཚོམ་མེད་པར་བྱ་སྤྱོད་དངོས་ལ་འཇུག་པ་ལས་ཕྱིར་བཤོལ་བྱ་རྒྱུ་མེད། ཁྱེད་རང་ལ་བསམ་བློ་ཡག་པོ་ཡོད་པ་དང་། གོ་སྐབས་བཟང་པོ་ཐོབ་དུས་ལམ་སེང་དུས་ཚོད་དམ་འཛིན་བྱེད་པ་ལས་ཐེ་ཚོམ་བྱ་རྒྱུ་མེད།

དགུ། གུ་དོག་པོ་མི་བྱེད་པ།

སེམས་ནམ་མཁའ་བཞིན་ཡངས་དགོས། མི་གཞན་ལ་གུ་ཡངས་བྱེད་པ་ནི་དོན་དུ་སོ་སོའི་སེམས་ཁམས་ཡངས་པའི་མངོན་ཚུལ་ཞིག་ཡིན། ཁོག་ཡངས་ཀྱི་འཇིག་རྟེན་ནང་གཞི་ནས་ཞི་བདེའི་ཚེ་སྲོག་གི་གླུ་དབྱངས་ཐོས་ཐུབ།

བཅུ། དོགས་པ་མི་བྱེད་པ།

སེམས་ལ་དོགས་པ་ཡོད་ན་བྱ་བ་བསྒྲུབ་པར་དཀའ། སོ་སོའི་རྨོངས་ཚོད་ཀྱིས་མི་གཞན་ལ་དོགས་པ་བྱེད་མི་རུང་། གལ་ཏེ་དོགས་པ་བྱས་ན་ཕན་ཚུན་གྱི་བརྩེ་བར་ཤུགས་རྐྱེན་ངན་པ་ཐེབས་སྲིད།

ཡོང་ཁུངས། གླིང་སྲས་བོད་ཡིག་འཕྲིན་སྟེགས།

རྩོམ་པ་པོ། འཕགས་ཆེན།