མཉམ་འབྲེལ་རྒྱལ་ཚོགས་ཡུལ་གྱར་བའི་དོ་དམ་ལས་ཁུངས་དང་རྒྱལ་ཁབ་ཁག་གི་སྲིད་གཞུང་དང་མཉམ་ལས་རོགས་ཟླའི་ཐོག་མའི་དཔྱད་དཔོག་ལ་གཞིགས་ན། སྔོན་དཔག་ལྟར་ན་ཡུལ་གྱར་བ་དང་ཡུལ་དུ་ལོག་མཁན་མི་འབུམ་8ལྷག་སུའུ་ཏན་ནས་ཁྱིམ་མཚེས་རྒྱལ་ཁབ་ཏུ་འབྲོ་སྲིད། དེའི་ཁྲོད་དུ་སུའུ་ཏན་གྱི་མི་འབུམ་6ཙམ་དང་། ད་དུང་སུའུ་ཏན་ལྷོ་མའི་ཡུལ་གྱར་བ་དང་སུའུ་ཏན་གྱིས་དེ་སྔོན་བསྡུ་ཉར་བྱས་པའི་ཡུལ་གྱར་བ་གཞན་འབུམ་2ལྷག་འདུས་ཡོད།

　　སུའུ་ཏན་གྱི་ཁྱིམ་མཚེས་རྒྱལ་ཁབ་ཀྱིས་མ་གཞི་ནས་ཡུལ་གྱར་བ་དང་རྒྱལ་ཁོངས་ནང་གི་བུད་སྟོངས་ཡུལ་གྱར་བ་འབོར་ཆེན་བསྡུ་ལེན་བྱས་ཡོད་པས། རྒྱལ་ཁབ་དེ་དག་ལ་མ་དངུལ་མི་འདང་བའི་གནས་ཚུལ་ཚབས་ཆེན་པོ་ཡོད་པ་རེད།

     མིག་སྔའི་བར་དུ་གཞི་ཁྱོན་ཆེས་ཆེ་བའི་རྒྱལ་ཁོངས་བརྒལ་བའི་འགྲོ་སྐྱོད་ནི་ཛ་ཏེ་དང་ཨེ་ཅིབ་ཏུ་འགྲོ་བའི་སུའུ་ཏན་གྱི་ཡུལ་གྱར་བ་དང་། དེ་བཞིན་སུའུ་ཏན་ལྷོ་མར་ཕྱིར་ལོག་མཁན་གྱི་སུའུ་ཏན་ལྷོ་མའི་ཡུལ་གྱར་བ་ཡིན། ཛ་ཏེ་དང་སུའུ་ཏན་ལྷོ་མར་འགྲོ་མཁན་ཡུལ་གྱར་བ་མང་ཆེ་བ་ནི་བུད་མེད་དང་བྱིས་པ་ཡིན་པ་རེད།

ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན། 

ཞུ་དག བཀྲ་ཤིས་བཟང་པོ།

ཡིག་སྒྱུར། ཀླུ་འབུམ།