ཤེས་རྟོགས་བྱུང་བར་གཞིགས་ན། འཛད་སྤྱོད་པའི་མཐུན་ཚོགས་ཀྱི་315སྟེགས་བུ་ནི་ཀྲུང་གོ་འཛད་སྤྱོད་པའི་མཐུན་ཚོགས་ཀྱིས་རྒྱལ་ཡོངས་འཛད་སྤྱོད་པའི་མཐུན་ཚོགས་རྩ་འཛུགས་དང་མཉམ་དུ་བསྐྲུན་པ་ཞིག་ཡིན་པ་དང་། དེར་དུས་མཚམས་གཉིས་བརྒྱུད་ཡོད་དེ། དུས་མཚམས་དང་པོར་གཙོ་བོ་འཛད་སྤྱོད་པས་དྲ་ཐོག་ནས་ཞུ་གཏུག་བྱེད་པའི་མཐའ་སྣེ་ཤར་གཏོང་བྱས་ཏེ། དྲ་ཐོག་ནས་འདུམ་འགྲིག་དང་དྲ་ཐོག་ནས་བར་འདུམ་བྱེད་པའི་བརྒྱུད་རིམ་ཤར་གཏོང་བྱས་པ་དང་། ཁ་གསལ་ཡོངས་བསྒྲགས་དང་གྱོད་དཔེ་སྤྱི་བསྒྲགས་སོགས་ཀྱི་ནུས་པ་གསར་སྤེལ་བྱས་ཡོད། མ་ཟད་2024ལོའི་ཟླ་3ཚེས་15ཉིན་དྲ་ཐོག་ཏུ་ཚོད་ལྟའི་ལས་གཉེར་བྱེད་འགོ་ཚུགས་ཡོད། དུས་མཚམས་གཉིས་པར་གཙོ་བོ་རིག་ནུས་ཅན་དང་མཉམ་བཅོས་ཅན་འཛུགས་སྐྱོང་ལ་དམིགས་ནས། DeepSeekཡིས་འཛད་སྤྱོད་པར་རིག་ནུས་དྲིས་ལན་འདེབས་ཐུབ་པ་དང་། གསར་སྣོན་ལས་རིགས་སྤྱི་བསྒྲགས་དང་། སྟོན་གྲངས་སྤྱི་བསྒྲགས། མཐུན་སྦྱོར་མཉམ་བཅོས་སོགས་ཀྱི་ནུས་པ་ལེགས་སུ་བཏང་ཡོད།
     འཛད་སྤྱོད་པས་གློག་ཀླད་ཀྱི་སྣེ་མོའི་དྲ་ཚུགས（https://315.cca.org.cn）སམ་ལག་ཐོགས་ཁ་པར་སྟེང་གི་སྐད་འཕྲིན་དང་གཏོང་སྤྲོད་འབོ་བརྒྱུད“འཛད་སྤྱོད་པའི་མཐུན་ཚོགས་ཀྱི་315”བྱ་རིམ་ཆུང་ངུ་འཚོལ་བཤེར་བྱས་ནས་འཛད་སྤྱོད་པའི་མཐུན་ཚོགས་ཀྱི་315སྟེགས་བུའི་ཐོག་ཐོ་འགོད་བྱས་ཆོག དེ་རྗེས“ངས་ཞུ་གཏུག་བྱ”དང“ངས་བློ་འདྲི་བྱ”ཞེས་པའི་ནང་འཛུལ་རྗེས་དྲ་ཐོག་ནས་ཞུ་གཏུག་དང་བློ་འདྲི་བྱས་ཏེ། འཛད་སྤྱོད་པའི་མཐུན་ཚོགས་རྩ་འཛུགས་ཀྱི་འཛད་སྤྱོད་ཁེ་དབང་སྲུང་སྐྱོང་ཞབས་ཞུ་ཉམས་ལེན་བྱས་ཆོག འཛད་སྤྱོད་པའི་མཐུན་ཚོགས་ཀྱི་315སྟེགས་བུར་ད་དུང“འཛད་སྤྱོད་པའི་མཐུན་ཚོགས་ཀྱིས་ཁྱེད་ལ་འཚོལ་བཤེར་བྱེད་རོགས་བྱ”དང“འཛད་སྤྱོད་པའི་མཐུན་ཚོགས་ཀྱིས་ཁྱེད་ལ་འདེམས་རོགས་བྱ”སོགས་ཀྱི་མ་དཔེ་བཀོད་སྒྲིག་བྱས་ཡོད་པས། འཛད་སྤྱོད་པར་ཁེ་ལས་ཀྱི་ཞབས་ཞུའི་འབྲེལ་གཏུག་བྱེད་སྟངས་དང་ཚོང་ཟོག་ཞིབ་བསྡུར་ཚོད་ལྟའི་འབྲས་བུ་སོགས་ཆ་འཕྲིན་འཚོལ་བཤེར་དང་འཛད་སྤྱོད་པའི་འཚོ་བའི་འཛད་སྤྱོད་ལ་རོགས་རམ་དང་མཛུབ་ཁྲིད་བྱེད་ཐུབ།
     འཛད་སྤྱོད་པའི་མཐུན་ཚོགས་ཀྱི་315སྟེགས་བུའི་ཐོག་གི་ཞུ་གཏུག་ཆ་འཕྲིན་ཡོངས་བསྒྲགས་ནུས་པའི་ནང་། གྱོད་དཔེ་སྤྱི་བསྒྲགས་དང་ལས་རིགས་སྤྱི་བསྒྲགས། སྟོན་གྲངས་སྤྱི་བསྒྲགས་བཅས་ཚུད་ཡོད། དེའི་ནང་། གྱོད་དཔེ་སྤྱི་བསྒྲགས་ནི་ཚོང་གཉེར་པས་འཛད་སྤྱོད་པའི་ཁེ་དབང་ལ་གནོད་འཚེ་ཚབས་ཆེན་གཏོང་བའི་བྱ་སྤྱོད་ལ་དམིགས་ནས་གྱོད་དཔེ་དམར་འདོན་བྱེད་པ་ཞིག་ཡིན་པ་དང་། ལས་རིགས་སྤྱི་བསྒྲགས་དང་སྟོན་གྲངས་སྤྱི་བསྒྲགས་ནི་ད་ཐེངས་གསར་དུ་བཏོན་པའི་བྱེད་ནུས་ཤིག་ཡིན་ཏེ། བར་འདུམ་དུམ་མཚམས་ཀྱི་ཚོང་གཉེར་པའི་ཐག་གཅོད་ཡུན་ཚད་དང་འདུམ་འགྲིག་ལེགས་གྲུབ་བྱུང་ཚད། དེ་བཞིན་བར་འདུམ་བྱེད་རིང་ཚོང་གཉེར་པས་གཞོགས་འདེགས་བྱེད་ཚད་དང་བར་འདུམ་ལེགས་གྲུབ་བྱུང་ཚད་སོགས་ཕྱོགས་མི་འདྲ་བ་ནས་སྐར་མ་བརྒྱབ་པ་བརྒྱུད། ཞུ་གཏུག་ཐག་གཅོད་སྟོན་གྲངས་ཀྱི་སྐར་གྲངས་དཔྱད་བསྡུར་དང་ལས་རིགས་ཀྱི་རིམ་སྒྲིག ཚོང་གཉེར་པའི་རྣམ་པ་བཅས་གྲུབ་པ་བྱས་པ་དང་། སྟོན་གྲངས་ཀྱི་སྐར་གྲངས་དཔྱད་བསྡུར་དུས་བཀག་ལྟར་གསར་སྒྱུར་བྱས་པ་བརྒྱུད། ཞུ་གཏུག་ཚང་མ་རེ་རེ་བཞིན་ཚོང་གཉེར་པའི་སྟོན་གྲངས་ཀྱི་སྐར་གྲངས་དཔྱད་བསྡུར་དང་འབྲེལ་བ་དམ་ཟབ་ཐུབ་པ་བྱས་ཤིང་། དེས་འཛད་སྤྱོད་པའི་ཞུ་གཏུག་ལ་ཚོང་གཉེར་པས་ལྟ་སྟངས་ནན་ཏན་འཛིན་པ་དང་ཐག་གཅོད་འོས་འཚམ་མི་བྱེད་ཀ་མེད་ཐུག་གི་ཡོད་ལ། འཛད་སྤྱོད་པས་ཚོང་གཉེར་པའི་ཞུ་གཏུག་ཐག་གཅོད་གནས་ཚུལ་ཤེས་རྟོགས་བྱ་རྒྱུ་དང་། གནས་ཚུལ་ཤེས་རྟོགས་ནུས་ལྡན་དང་རང་བདག་འཛད་སྤྱོད་བྱ་རྒྱུ་བཅས་ལ་ཡང་གྲངས་གཞིའི་འདེགས་སྐྱོར་ཐུབ་ཀྱི་ཡོད།
     ཤེས་རྟོགས་བྱུང་བར་གཞིགས་ན། འཛད་སྤྱོད་པའི་མཐུན་ཚོགས་ཀྱི་315སྟེགས་བུ་དྲ་ཐོག་ནས་ཚོད་ལྟ་ལས་གཉེར་བྱས་པ་ནས་2025ལོའི་ཟླ་3ཚེས་13ཉིན་བར། རིམ་རྩིས་བྱས་ན་འཛད་སྤྱོད་པ་702786དང་ཚོང་གཉེར་པ་42913གྱིས་ཐོ་འགོད་བྱས་ཡོད་ཅིང་། འཛད་སྤྱོད་པས་དྲ་ཐོག་ནས་ཞུ་གཏུག་དང་བློ་འདྲི་བྱས་པ་ཁྱོན་585387རྩིས་ལེན་བྱས་པའི་ཁྲོད་ཞུ་གཏུག་ཁག་576911ཡོད་པ་དང་། དེ་དག་ལས་ཁག་510126ཐག་གཅོད་བྱས་ཟིན་ལ། འཛད་སྤྱོད་པར་དཔལ་འབྱོར་གྱི་གྱོང་གུན་ཡང་སྒོར་དུང་ཕྱུར་4.1གསབ་རོགས་བྱས་ཡོད།
      ཐེངས་འདིའི་འཛད་སྤྱོད་པའི་མཐུན་ཚོགས་ཀྱི་315སྟེགས་བུའི་དྲ་ཐོག་ལས་གཉེར་དངོས་སུ་ཤར་གཏོང་བྱས་པ་དེའི་ཐོག་ནས་རྒྱལ་ཡོངས་འཛད་སྤྱོད་པའི་མཐུན་ཚོགས་རྩ་འཛུགས་ཀྱི་འཛད་སྤྱོད་ཁེ་དབང་སྲུང་སྐྱོང་ལས་དོན་དེ་གྲངས་འཛིན་ཅན་དང་རིག་ནུས་ཅན། དེང་རབས་ཅན་བཅས་ཀྱི་དུས་མཚམས་གསར་པར་སླེབས་པ་མཚོན་གྱི་ཡོད།

ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།