སྤྱི་ཚེས་17ཉིན་ལྷོ་ཁོ་རེ་ཡའི་ཚན་རིག་ལག་རྩལ་ཆ་འཕྲིན་འཕྲིན་གཏོང་པུས། ཧྥ་རན་སིས་iPhone12ལག་ཐོགས་ཁ་པར་གྱི་གློག་སྡུད་འགྱེད་འཕྲོའི་ཞིབ་དཔྱད་བྱས་འབྲས་ཚད་ལས་བརྒལ་བའི་དབང་གིས། ལག་ཐོགས་ཁ་པར་དེ་རིགས་གནས་སྐབས་ཕྱིར་ཚོང་བྱེད་མཚམས་འཇོག་རྒྱུ་དང་། ལྷོ་ཁོ་རེ་ཡའི་སྲིད་གཞུང་གིས་ཀུ་ཤུ་ཀུང་སིར་ལག་ཐོགས་ཁ་པར་དེ་རིགས་ཀྱི་འགྱེད་འཕྲོའི་གནད་དོན་ཐད་འབྲེལ་ཡོད་སྙན་ཞུ་འདོན་སྤྲོད་བྱེད་དགོས་པའི་བླང་བྱ་བཏོན་ཡོད་ཅེས་བརྗོད།

       ལྷོ་ཁོ་རེ་ཡའི་ཚན་རིག་ལག་རྩལ་ཆ་འཕྲིན་འཕྲིན་གཏོང་པུས་ཉིན་དེར་དྲ་ཚིགས་དེའི་ཐོག་ཡོངས་བསྒྲགས་བྱས་པའི་སྤྱི་བསྒྲགས་ནང་དུ། མིག་སྔར། ལྷོ་ཁོ་རེ་ཡ་རུ་བཙོངས་པའི་iPhone12ཚུད་པའི་ལག་ཐོགས་ཁ་པར་གྱི་གློག་སྡུད་འགྱེད་འཕྲོའི་བདེ་འཇགས་ཚད་གཞི་རྒྱལ་སྤྱིའི་ཚད་གཞི་དང་མཐུན་པ་མ་ཟད། ཐོན་རྫས་ཀྱི་ཚད་ལོན་ར་སྤྲོད་དཔང་ཡིག་ཀྱང་ཐོབ་ཡོད་ཅེས་བཀོད་ཡོད། འོན་ཀྱང་མང་ཚོགས་ཀྱི་སེམས་ཁྲལ་སེལ་ཆེད་ཚན་རིག་ལག་རྩལ་ཆ་འཕྲིན་འཕྲིན་གཏོང་པུས་སྔར་བཞིན་འབྲེལ་ཡོད་བཅའ་ཁྲིམས་ལ་གཞིགས་ནས། ཀུ་ཤུ་ཀུང་སིར་དེའི་སྐོར་གྱི་གནས་ཚུལ་སྙན་སེང་ཞུ་དགོས་པའི་བླང་བྱ་བཏོན་པ་བཀོད་ཡོད། 

       ལྷོ་ཁོ་རེ་ཡའི་ཚན་རིག་ལག་རྩལ་ཆ་འཕྲིན་འཕྲིན་གཏོང་པུས་ད་དུང་། སླད་ཕྱིན་iPhone12ལ་ཞིབ་དཔྱད་ཚད་ལེན་བྱ་རྒྱུ་ཡིན་པ་མ་ཟད་མཇུག་འབྲས་ཡོངས་བསྒྲགས་བྱེད་འཆར་ཡོད། གལ་ཏེ་ཞིབ་དཔྱད་བྱས་འབྲས་ལས་གློག་སྡུད་འགྱེད་འཕྲོའི་ཚད་གཞི་ལས་བརྒལ་ཡོད་ཚེ། ཀུ་ཤུ་ཀུང་སིར་ཡོ་བསྲང་བྱེད་དུ་འཇུག་རྒྱུ་མ་ཟད། ཁ་པར་དེ་རིགས་ནང་འདྲེན་དང་ཕྱིར་ཚོང་བྱེད་མཚམས་འཇོག་རྒྱུ་ཡིན་ཞེས་བསྟན་འདུག

      ཧྥ་རན་སི་རྒྱལ་ཁབ་ཟློས་ཕྱོད་དོ་དམ་ཅུས་ཀྱིས་སྤྱི་ཚེས་12ཉིན་སྤྱི་བསྒྲགས་སྤེལ་བར་གཞིགས་ན། ཞིབ་དཔྱད་ཚད་ལེན་བྱས་འབྲས་ལས་མངོན་པ་ལྟར་ན། ཀུ་ཤུ་ཀུང་སིའི་iPhone12ལག་ཐོགས་ཁ་པར་གྱི་གློག་སྡུད་འགྱེད་འཕྲོའི་ཚད་གཞི་ཡོ་རོབ་མནའ་འབྲེལ་གྱི་ཚད་གཞི་ལས་བརྒལ་ཡོད་པས། ཀུ་ཤུ་ཀུང་སིར་ཉིན་དེ་ནས་བཟུང་ཧྥ་རན་སིའི་ཁྲོམ་རར་གནས་སྐབས་ཕྱིར་ཚོང་བྱེད་མཚམས་འཇོག་དགོས་པའི་བླང་བྱ་བཏོན་ཡོད།

       སྤྱི་ཚེས་15ཉིན། ཧྥ་རན་སིའི་གྲངས་འཛིན་ལས་དོན་འགན་འཁུར་གྱི་པུའུ་ཀྲང་རིམ་པའི་འཐུས་མི་རངས་ནོ་ཨར་པ་ལུའོ་ཡིས། ཀུ་ཤུ་ཀུང་སིས་མ་འོངས་པའི་ཉིན་འགའི་ནང་ཧྥ་རན་སི་རུ་ཕྱིར་ཚོང་དང་བེད་སྤྱོད་གཏོང་བཞིན་པའི་iPhone12ལག་ཐོགས་ཁ་པར་གྱི་མཉེན་ཆས་གསར་བརྗེས་བྱས་ནས། དེ་ཡོ་རོབ་མནའ་འབྲེལ་གྱི་ཚད་གཞི་དང་མཐུན་པར་བྱ་རྒྱུ་ཁས་ལེན་བྱས་ཡོད་ཅེས་བརྗོད།

ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
ཞུ་དག བསྟན་འཛིན།
སྒྲིག་སྒྱུར། སྙན་དབྱངས།