རིམས་ནད་ཚོད་འཛིན་མ་ལག་བསྒྱུར་བཅོས་གཏིང་ཟབ་ཏུ་གཏོང་རྒྱུ་ནི་རིམས་ནད་སྔོན་འགོག་ཚོད་འཛིན་གྱི་གྲུབ་འབྲས་སྲ་བརྟན་དུ་གཏོང་བ་དང་། སྤྱི་པའི་འཕྲོད་བསྟེན་མ་ལག་སྟོབས་ཆེན་གཏོད་པ། བདེ་ཐང་ཀྲུང་གོ་འཛུགས་སྐྲུན་ལ་ཁྱོན་ཡོངས་ནས་སྐུལ་འདེད་གཏོང་བ་བཅས་ཀྱི་བྱ་ཐབས་གལ་ཆེན་ཞིག་རེད། ལྷ་ས་གྲོང་ཁྱེར་རིམས་ནད་སྔོན་འགོག་ཚོད་འཛིན་ཅུད་བཙུགས་རྗེས། དབང་གྲགས་ལྡན་ལ་ནུས་ཆོད་ཆེ་བའི་རིམས་ནད་སྔོན་འགོག་ཚོད་འཛིན་ལམ་སྲོལ་བསྐྱར་སྐྲུན་དང་། སྤྱི་པའི་འཕྲོད་བསྟེན་མ་ལག་སྟོབས་ཆེན་འཛུགས་པ། བདེ་ཐང་བོད་ལྗོངས་དང་བདེ་ཐང་ལྷ་ས་ཁྱོན་ཡོངས་ནས་འཛུགས་སྐྲུན་བཅས་བྱས་ཐོག ལྷ་སའི་འཕྲོད་བསྟེན་བདེ་ཐང་བྱ་གཞག་སྤུས་ཚད་མཐོ་པོའི་སྒོ་ནས་འཕེལ་རྒྱས་འགྲོ་རྒྱུར་སྐུལ་འདེད་མགྱོགས་པོ་གཏོང་རྒྱུ་རེད།

     གོམ་སྟབས་རྗེས་མར། ལྷ་ས་གྲོང་ཁྱེར་གྱིས་རིམས་ནད་ཚོད་འཛིན་སྒྲིག་གཞི་གཙོ་རྐང་དུ་བྱེད་པ་དང་། སྨན་བཅོས་སྒྲིག་གཞིར་བརྟེན་པ། གཞི་རིམ་གྱི་སྨན་བཅོས་འཕྲོད་བསྟེན་སྒྲིག་གཞི་རྨང་གཞིར་བྱ་རྒྱུ་བཅས་འཐུས་ཚང་དུ་བཏང་ནས། འགོག་བཅོས་ཟུང་འབྲེལ་དང་ཕྱོགས་ཁག་མཐུན་སྦྱོར་གྱི་ལས་ཀའི་རྣམ་པ་ཞིག་ཆགས་པ་བྱ་རྒྱུ་རེད། སྤྱི་པའི་འཕྲོད་བསྟེན་འཕྲལ་སྒྲུབ་དོ་དམ་དང་ལྟ་སྐུལ་མ་ལག་འཐུས་ཚང་དུ་གཏོང་བ་དང་། ཁྲིམས་སྐྱོང་དང་། ཤེས་ལྡན་མི་སྣ། ཚན་རྩལ་བཅས་རྨང་གཞིའི་རང་བཞིན་གྱི་ལས་དོན་ཁག་གསུམ་དམ་འཛིན་ཏན་ཏིག་བྱེད་པ། རིམས་ནད་ཚོད་འཛིན་ནུས་པ་དང་དཔུང་ཁག་འཛུགས་སྐྱོང་ལ་ཤུགས་སྣོན་རྒྱག་པ། ཆེད་ལས་ཀྱི་ལྟེ་བའི་ནུས་པ་ཁྱོན་ཡོངས་ནས་ཆེ་རུ་གཏོང་བ་བཅས་བྱས་ནས། མི་དམངས་ཀྱི་བདེ་ཐང་སྲུང་སྐྱོང་དང་སྤྱི་པའི་འཕྲོད་བསྟེན་བདེ་འཇགས་ལ་འགན་ལེན་བྱ་རྒྱུ་ཡིན་པ་རེད།

ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།

ཞུ་དག ཟླ་བ་ཚེ་རིང་།

སྒྲིག་སྒྱུར། བཀྲ་ཤིས་རྡོ་རྗེ།