ཚོགས་འདུའི་ཐོག ཀྲུང་དབྱང་གི་ཡིག་ཆ་དང་པོའི་ནང་གཏན་ལ་འཁེལ་བའི་ད་ལོའི་ཞིང་གསུམ་ཁྱབ་ཁོངས་ཀྱི་ལས་འགན་གལ་ཆེན་དང་ལས་དོན་གཙོ་བོ་ངོ་སྤྲོད་བྱས་ཡོད་ཅིང་། ནང་དོན་གཙོ་བོ་མདོར་བསྡུས་ནས་བརྗོད་ན་“གཙོ་གནད་ལས་འགན་ཁག་བཞི་དང་། འདེགས་སྐྱོར་ཆེན་པོ་གཉིས་ཀྱི་འགན་ལེན་”ཞེས་པ་དེ་ཡིན་སྟེ། 

དེ་ཡང་གཙོ་གནད་ལས་འགན་ཁག་བཞི་ནི། 

གཅིག་ནས། ཞིང་ལས་ཀྱི་ཕྱོགས་བསྡུས་ཐོན་སྐྱེད་ནུས་པ་དང་སྤུས་ཚད་དང་ཕན་འབྲས་ཆེ་རུ་གཏོང་རྒྱུ་དང་། 

གཉིས་ནས། རྒྱུན་རྣམ་ཅན་གྱི་གནད་འཕིགས་རོགས་སྐྱོར་ལག་ལེན་བསྟར་རྒྱུ། 

གསུམ་ནས། ཞིང་པའི་ཡོང་འབབ་བརྟན་པོའི་ངང་འཕར་སྣོན་ཡོང་བར་སྐུལ་འདེད་ཧུར་ཐག་གཏོང་རྒྱུ། 

བཞི་ནས། ཡུལ་བབ་དང་བསྟུན་ནས་གནས་འཕྲོད་ལས་འཚམ་དང་མཛེས་སྡུག་ལྡན་པའི་གྲོང་གསེབ་འཛུགས་སྐྲུན་ལ་སྐུལ་འདེད་གཏོང་རྒྱུ་བཅས་ཡིན་པ་རེད། 

འདེགས་སྐྱོར་ཆེན་པོ་གཉིས་ཀྱི་འགན་ལེན་ནི། 

སྒྲིག་གཞི་ལམ་སྲོལ་གསར་གཏོད་བྱེད་ཤུགས་ཆེ་རུ་གཏོང་རྒྱུ་དང་། ཏང་གིས་ཞིང་གསུམ་ལས་དོན་ལ་ཕྱོགས་ཡོངས་ནས་འགོ་ཁྲིད་བྱེད་པར་ཤུགས་སྣོན་རྒྱག་རྒྱུ་གཉིས་ཡིན། 

ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།

ཞུ་དག ཟླ་བ་ཚེ་རིང་། 
ཡིག་སྒྱུར། པ་སངས་ལྷ་མོ།