འདི་ག་ལས་ཁུངས་ནས་སྤེལ་བའི་གནས་ཚུལ། ད་ལོ་ཚུན་དུ། ཚན་པ་མང་པོ་དང་ས་ཁུལ་མང་པོས་འཛད་སྤྱོད་ལ་སྐུལ་འདེད་དང་ནང་མཁོ་རྒྱ་ཆེར་གཏོང་བར་རྒྱབ་སྐྱོར་བྱེད་པའི་སྲིད་ཇུས་ཁྱབ་བསྒྲགས་བྱས་པ་དང་།  གཞི་ཁྱོན་ཆེ་བའི་སྒྲིག་ཆར་གསར་སྒྱུར་དང་འཛད་སྤྱོད་དངོས་པོ་རྙིང་པར་བརྟེན་ནས་གསར་པ་བརྗེ་པ་རྒྱག་པའི་བྱེད་སྒོ་སྤེལ་རྒྱུ་དེ་གོ་སྐབས་སུ་བྱས་ཏེ་འཛད་སྤྱོད་བྱེད་སྟངས་ཕུན་སུམ་ཇེ་ཚོགས་སུ་བཏང་བས།   མྱུར་སྐྱེལ་ལས་རིགས་ཤུགས་དང་ལྡན་པའི་སྒོ་ནས་གོང་འཕེལ་འགྲོ་ཐུབ་ཡོད།   མྱུར་སྐྱེལ་ལས་སྒོ་ལོ་མཇུག་གི་ཉོ་ཚོང་མང་བའི་དུས་སུ་སླེབས་ཚུན།  ཟོག་འགྲེམས་ལས་རིགས་རྒྱུན་མཐུད་སྤུས་ཀ་ཇེ་ལེགས་དང་མྱུར་ཚད་ཇེ་མགྱོགས་སུ་ཕྱིན་པ་དང་།  སྒྲིག་ཆར་གསར་པ་དང་ཚན་རྩལ་གསར་པ་དག་གིས་ཁྲོམ་རའི་གསོན་ཤུགས་གསར་པ་ཟམ་མི་ཆད་པར་རྒྱས་པར་སྐུལ་འདེད་བཏང་ཡོད།  

　　ཧོ་ནན་ཀྲེང་ཀྲོའུ་མཁའ་ཐོག་སྐྱེལ་འདྲེན་ཁུལ་གྱི་མྱུར་སྐྱེལ་ཁེ་ལས་ག་གེ་མོའི་ཀྲེང་ཀྲོའུ་ཁག་འགྲེམས་ལྟེ་གནས་སུ།  རྡོག་མཁྲེགས་བཤིག་པ་དང་།  བརྒྱུད་གཏོང་།  རིགས་དབྱེ།  རླངས་འཁོར་ནང་བླུགས་པ་སོགས་བྲེལ་འཚུབ་ཀྱིས་ཁེངས་ཡོད།  ཁག་འགྲེམས་ལྟེ་གནས་དེའི་སྤྱི་གཉེར་ཝང་ཀྲེ་ཧྥེང་གིས།  ད་ལོ་ཀུང་སིས་སྒོར་བྱེ་བ་མ་ཟིན་ཙམ་བཏང་ནས་སྒྲིག་ཆས་གསར་པ་གཉིས་བསྒར་ཡོད་པས།  ཉོ་ཚོང་མང་བའི་དུས་སུ་སྒྲིག་ཆས་སྤྱོད་མང་བའི་གནད་དོན་ཇེ་ཆུང་དུ་བཏང་ཡོད་ལ། ཡང་སྒོས་སུ་རིག་ནུས་ཅན་གྱི་དངོས་པོ་ཁག་འགྲེམས་ཀྱི་ནུས་པ་ཡང་ཇེ་ཆེར་བཏང་བས།  མྱུར་སྐྱེལ་གང་མགྱོགས་འཛད་སྤྱོད་པའི་ལག་ནང་འབྱོར་རྒྱུར་སྐུལ་མ་བཏང་ཡོད།  ད་ལྟ་ང་ཚོ་ཡོད་སའི་འཁོར་ཁང་ནང་ཉིན་གཅིག་གི་དངོས་ཟོག་འདོན་འཇུག་བྱེད་ཚད་དེ་ས་ཡ་བཞི་དང་ལྔ་འབུམ་ཙམ་ཟིན་གྱི་ཡོད་ཅེས་གསུངས་ཡོད། 

　　ཧུའུ་པེ་ཧྲེ་ཡན་གྲོང་ཁྱེར་མྱུར་སྐྱེལ་ཟོག་འགྲེམས་གླིང་ཁུལ་དུ།  ལས་དོན་པས་མི་མེད་མྱུར་སྐྱེལ་རླངས་འཁོར་ཞིག་ནང་དངོས་ཟོག་བླུག་ནས་དམིགས་ས་ཐོ་འཇུག་གཏན་འཁེལ་བྱེད་བཞིན་ཡོད། མི་མེད་མྱུར་སྐྱེལ་རླངས་འཁོར་གྱིས་མིའི་ངལ་རྩོལ་གྱི་དགོས་མཁོ་ཆུང་དུ་བཏང་བ་མ་ཟད།  ཐེངས་གཅིག་ལ་དངོས་ཟོག་དབོར་བའི་འབོར་ཚད་ཀྱང་ལྡབ་ཀྱིས་ཆེ་རུ་བཏང་ཡོད།  

　　མྱུར་སྐྱེལ་ཀུང་སིའི་ལས་དོན་པས།  མི་མེད་རླངས་འཁོར་ཐོག་ཕྱོགས་བཞི་མཚམས་བརྒྱད་གང་སར་ཚོར་ཤེས་ཐུབ་པའི་སྒྲིག་ཆས་དང་དྭངས་གསལ་ཤེལ་མིག་བསྒར་ཡོད་པས།  དུས་ཐོག་ཏུ་རླངས་འཁོར་དེའི་ཉེ་འཁོར་གྱི་ཁོར་ཡུག་ལ་ལྟ་ཞིབ་བྱེད་ཐུབ་ཀྱི་ཡོད་ལ།  ད་དུང་གནམ་གཤིས་དང་ལམ་གྱི་འགྱུར་བ་སྣ་ཚོགས་འཕྲད་ནའང་མུ་མཐུད་དབོར་འདྲེན་བྱེད་ཐུབ་པ་དང་།  སྔོན་གཏན་འཁེལ་བའི་དུས་ཚོད་དང་ལམ་ཐིག་གཞིར་བཟུང་མྱུར་སྐྱེལ་དེ་མྱུར་སྐྱེལ་ས་ཚིགས་སུ་དབོར་ཐུབ་ཀྱི་ཡོད།  

　　ཀོང་ཏུང་ཧྲེན་ཀྲེན་ཧྥུའུ་ཐན་ཆུས་སུ་ཆགས་པའི་དམའ་དབྱིངས་དཔལ་འབྱོར་གྱི་ཞབས་ཞུའི་ས་ཚིགས་སུ།  མྱུར་སྐྱེལ་ཐུམ་སྒྲིལ་མང་པོ་བླུགས་པའི་མི་མེད་གནམ་གྲུ་ཞིག་ག་ལེར་ཞབས་ཞུའི་ས་ཚིགས་ཀྱི་གནམ་གྲུ་འབབ་ཐང་དུ་འབབ་བཞིན་ཡོད།  ཐུམ་སྒྲིལ་དེ་དག་ནི་ཉེ་འཁོར་གྱི་མྱུར་སྐྱེལ་ས་ཚིགས་ནས་དབོར་བ་ཞིག་ཡིན་ཞིང་།  མི་མེད་གནམ་གྲུའི་རམ་འདེགས་འོག་དུས་ཐུང་སྐར་མ་ལྔའི་ནང་ཞབས་ཞུའི་ས་ཚིགས་སུ་དབོར་ཐུབ་པ་དང་།  དེ་ནས་མྱུར་སྐྱེལ་བས་འཛད་སྤྱོད་པའི་ལག་ནང་དབོར་གྱི་ཡོད།  མྱུར་སྐྱེལ་བ་ཡང་མའོ་ལིན་གྱིས།  དེ་སྔ་ས་ཚིགས་ནས་སྡེ་ཁུལ་དུ་དབོར་བར་དུས་ཡུན་ཆུ་ཚོད་གཅིག་དང་ཕྱེད་ཀ་ཙམ་འགོར་གྱི་ཡོད། ད་ལྟ་ཞབས་ཞུའི་ས་ཚིགས་དེ་ཡོད་པས་སྐར་མ་བཞི་བཅུ་ལྷག་ཙམ་ལས་འགོར་གྱི་མི་འདུག་ཅེས་གསུངས་ཡོད། 

　　ཀྲུང་གོ་ཟོག་འགྲེམས་ཆ་འཕྲིན་ལྟེ་གནས་ཀྱི་ཀྲུའུ་རེན་ལིའུ་ཡུས་ཧང་གིས།  ང་ཚོའི་ཟོག་འགྲེམས་འཁོར་སྐྱོད་ཀྱི་ལས་ཕྱོད་ཆེ་རུ་ཕྱིན་པ་དང་བསྟུན་ནས།  སྤྱི་ཚོགས་ཧྲིལ་པོའི་ཟོག་འགྲེམས་མ་གནས་ཇེ་ཆུང་དུ་ནུས་ལྡན་འགྲོ་བཞིན་ཡོད་ཅེས་གསུངས་ཡོད།  

　　ཟོག་འགྲེམས་ལས་རིགས་སྤུས་ཀ་ཇེ་ལེགས་དང་མྱུར་ཚད་ཇེ་མགྱོགས་སུ་བཏང་བ་དེས་ཁྲོམ་རའི་གསོན་ཤུགས་གསར་པ་རྒྱས་ཡོད།  ལག་རྩལ་གསར་སྐྲུན་གྱིས་འབྲེལ་ཡོད་ཐོན་ལས་སྦྲེལ་ཐག་གོང་འཕེལ་ལ་སྐུལ་འདེད་བཏང་བ་དེས་མི་མེད་གནམ་གྲུའི་བཟོ་སྐྲུན་དང་རིག་ནུས་སྒྲིག་ཆས་ཐོན་སྐྱེད་སོགས་ཁྱབ་ཁོངས་ཀྱི་འཕར་སྣོན་ལ་སྣེ་ཁྲིད་ཐུབ་པ་དང་།  ནུས་ཕྱོད་དེ་བས་ཆེ་བའི་ཟོག་འགྲེམས་མ་ལག་གིས་འཛད་སྤྱོད་པའི་ཉོ་སྒྲུབ་ཀྱི་ཚོར་སྣང་ཡང་ཇེ་ལེགས་སུ་བཏང་བ་མ་ཟད།  དྲ་ཐོག་སིལ་འཚོང་ཁྲོམ་རའི་འཕར་སྣོན་ལ་སྐུལ་འདེད་བཏང་ཡོད།  རྒྱལ་ཁབ་སྦྲག་སྲིད་ཅུས་གོང་འཕེལ་ཞིབ་འཇུག་ལྟེ་གནས་ཐོན་ལས་དཔལ་འབྱོར་ཞིབ་འཇུག་པུའི་ཀྲུའུ་རེན་ཝང་ཡུའེ་ཧན་གྱིས། འབྱུང་འགྱུར་མྱུར་སྐྱེལ་ལས་རིགས་ཀྱིས་དེ་བས་རྒྱ་ཁྱབ་ངང་གྲངས་གཞིའི་རྒྱུ་རྐྱེན་གཙོ་བོ་སྤྱད་དེ་ལས་རིགས་ཀྱི་མཐའ་མཚམས་ལས་བརྒལ་བ་དང་།  དུས་ཐོག་ཟོག་འགྲེམས་དང་མྱུར་འདྲེན་དངོས་ཟོག་ལྕི་རིགས་ལས་རིགས་ལས་བརྒལ་ནས་མཉམ་འདྲེས་ཀྱིས་སྐྱེལ་འདྲེན་བྱེད་པའི་ཡོ་བྱད་སྣ་ཚོགས་ཕྱོགས་བསྡུས་བེད་སྤྱོད་དང་། གཏོང་སྤྲོད་བྱེད་སྟངས་སྣ་མང་། ཞབས་ཞུ་བྱེད་སྟངས་སྣ་མང་བཅས་ཀྱི་ཐོག་ནས་ས་གནས་དེ་གའི་ཞབས་ཞུ་དང་རྒྱལ་ནང་གི་ཚོང་དོན་ཉོ་ཚོང་ལ་སྐུལ་འདེད་གཏོང་རྒྱུ་མ་ཟད། ད་དུང་རྒྱལ་མཚམས་སྒྲོལ་བའི་ཉོ་ཚོང་མཉམ་འགུལ་གོང་འཕེལ་དང་ཟོག་འགྲེམས་གསར་གཏོད་གོང་འཕེལ་ལ་སྐུལ་ཁྲིད་བྱས་ཏེ།  དཔལ་འབྱོར་འཁོར་རྒྱུག་སྤྱི་ཡོངས་ཀྱི་ཕན་འབྲས་ཆེ་རུ་གཏོང་རྒྱུ་རེད་ཅེས་གསུངས་ཡོད།