རང་རྒྱལ་གྱིས་ས་ཞིང་བཅོས་སྒྲིག་ལ་བརྟེན་ནས་གྲོང་གསེབ་ཀྱི་ས་ཞིང་ལམ་ལུགས་སྒྱུར་བཅོས་ལ་སྐུལ་འདེད་གཏོང་རྒྱུ་ཡིན་པ།
འདི་ག་ལས་ཁུངས་ཀྱིས་སྤེལ་བའི་གནས་ཚུལ། སྤྱི་ཚེས་14ཉིན་རང་བྱུང་ཐོན་ཁུངས་པུས་གྲོང་གསེབ་ས་ཁུལ་གྱི་རྒྱལ་ཁབ་ས་ཆའི་བར་མཐོངས་བཀོད་སྒྲིག་སྔར་བས་ལེགས་སུ་གཏོང་ཆེད། རང་བྱུང་ཐོན་ཁུངས་ཁོངས་གཏོགས་ཀྱིས་ས་ཁོངས་ཡོངས་ཀྱི་ས་ཆ་ཕྱོགས་བསྡུས་བཅོས་སྒྲིག་ལ་མུ་མཐུད་སྐུལ་འདེད་གཏོང་རྒྱུ་དང་བར་མཐོངས་བཀོད་སྒྲིག་སྤྱི་ཡོངས་བརྟན་པོ་རྒྱུན་འཁྱོངས་བྱེད་པའི་སྔོན་འགྲོའི་འོག་ས་གནས་ཁག་གིས་གྲོང་གསེབ་ཀྱི་ས་ཆ་གསར་སྤེལ་བེད་སྤྱོད་བྱེད་སྟངས་ལ་ཆ་ཤས་ལེགས་སྒྲིག་ཕྲན་བུ་དང་གཅིག་གྱུར་འཆར་འགོད་ལེགས་སུ་གཏོང་ཆོག་ཅེས་བཤད་ཡོད་པ་རེད།
རང་བྱུང་ཐོན་ཁུངས་པུས་ས་གནས་ཁག་གིས་ས་ཁོངས་ཡོངས་ཀྱི་ས་ཆ་ཕྱོགས་བསྡུས་བཅོས་སྒྲིག་གི་ལས་སྟེགས་ནུས་པ་འདོན་སྤེལ་གང་ལེགས་བྱེད་པ་དང་འབྲེལ་ཡོད་སྲིད་ཇུས་ཀྱི་ལག་ཆ་ཕྱོགས་བསྡུས་བེད་སྤྱོད་བྱས་ཏེ་གྲོང་ཁྱེར་དང་གྲོང་གསེབ་ཀྱི་རྒྱུ་རྐྱེན་གཙོ་བོ་འདྲ་མཉམ་བརྗེ་རེས་དང་ཕྱོགས་གཉིས་འཁོར་རྒྱུག་ལ་སྐུལ་འདེད་བཏང་ནས་གྲོང་གསེབ་ས་ཁུལ་གྱི་རྒྱལ་ཁབ་ས་ཆའི་བར་མཐོངས་བཀོད་སྒྲིག་ལེགས་སུ་གཏོང་དགོས་ཞེས་ནན་བཤད་བྱས་ཡོད་པ་རེད། གྲོང་གསེབ་ས་ཁུལ་གྱི་བར་མཐོངས་བཀོད་སྒྲིག་གོ་རིམ་མེད་པའི་གནད་དོན་ལ་དམིགས་ཏེ་རང་བྱུང་ཐོན་ཁུངས་པུའི་རྒྱལ་ཁབ་ས་ཆའི་བར་མཐོངས་འབྱུང་ཁམས་ཉམས་གསོ་སིའི་འགོ་འཛིན་ཝང་ལའེ་ཡིས། བར་མཐོངས་བཀོད་སྒྲིག་སྤྱིའི་ཆ་ནས་བརྟན་པོ་རྒྱུན་འཁྱོངས་བྱེད་པའི་སྔོན་འགྲོའི་འོག་ས་ཆ་གསར་སྤེལ་བེད་སྤྱོད་བྱེད་སྟངས་ལ་ཆ་ཤས་ཀྱི་ལེགས་སྒྲིག་ཕྲན་བུ་དང་གཅིག་གྱུར་འཆར་འགོད་ལེགས་སུ་གཏོང་ཆོག་ཅེས་གསུངས་ཡོད་པ་རེད།
ཝང་ལའེ་ཡིས་ཞིང་སྤྱོད་ས་ཆ་གཅིག་སྡུད་མུ་འབྲེལ་བཅོས་སྒྲིག་དང་། འཛུགས་སྐྲུན་ས་ཆ་ལེགས་སྒྲིག རང་བྱུང་འབྱུང་ཁམས་གཞི་རྩ་སྲུང་སྐྱོང་ཉམས་གསོ་སོགས་བཅོས་སྒྲིག་གི་ནང་དོན་གཙོ་བོར་དམིགས་ཏེ་བཅོས་སྒྲིག་གི་དམིགས་ཚད་དང་། ལས་འགན། རྒྱབ་སྐྱོར་སྲིད་ཇུས། མ་མཐའི་མཚམས་ཐིག་གི་བླང་བྱ་བཅས་ཁ་གསལ་བཟོས་པ་མ་ཟད། བཅོས་སྒྲིག་ལས་དོན་ཁྲོད“ཁུལ་གསུམ་དང་ལམ་ཐིག་གསུམ”ལེགས་སུ་གཏོང་བ་དང་། གྲོང་ཁྱེར་དང་གྲོང་གསེབ་ཀྱི་འཛུགས་སྐྲུན་ས་ཆ་འཕར་ཆགས་ཟུང་འབྲེལ། གྲོང་གསེབ་ཀྱི་མཉམ་སྡེབ་གཉེར་སྐྱོང་རང་བཞིན་གྱི་འཛུགས་སྐྲུན་ས་ཆ་ཁྲོམ་རར་ཞུགས་པ་སོགས་ཀྱི་སྲིད་ཇུས་བེད་སྤྱོད་ཐད་གཏན་འབེབས་ཞིབ་ཕྲ་བྱས་ཡོད་ཅེས་གསུངས་ཡོད་པ་རེད།
གྲོང་གསེབ་ས་ཁུལ་གྱི་ས་ཆའི་ཐོན་ཁུངས་བེད་སྤྱོད་ཕན་འབྲས་དམའ་བའི་གནད་དོན་ལ་དམིགས་ཏེ་རང་བྱུང་ཐོན་ཁུངས་པུའི་རྒྱལ་ཁབ་ས་ཆའི་བར་མཐོངས་འབྱུང་ཁམས་ཉམས་གསོ་སིའི་འགོ་འཛིན་གཞོན་པ་ལི་ཅན་ཀྲུང་གིས། འཛུགས་སྐྲུན་ཐད་སྤྱོད་པའི་ས་ཆ་ལེགས་སྒྲིག་གཅིག་གྱུར་འཆར་འགོད་ལག་བསྟར་བྱས་ནས་ས་ཆའི་ཐོན་ཁུངས་བཀོད་སྒྲིག་གི་ཕན་འབྲས་དང་གྲོན་ཆུང་ལེགས་བསྡུས་ཞིབ་གཉེར་གྱི་བེད་སྤྱོད་ཆུ་ཚད་མཐོ་རུ་གཏོང་དགོས་ཞེས་ངོ་སྤྲོད་གནང་ཡོད་པ་རེད།
ལི་ཅན་ཀྲུང་གིས་བཅོས་སྒྲིག་ས་ཁོངས་ནང་གི་ས་ཆ་རྙིང་པ་བཤིག་རྒྱུ་དེ་ཧྲིལ་པོ་ཞིག་ཏུ་བརྩིས་ནས་འཕར་ཆགས་འབྲེལ་མཐུད་རྣམ་གྲངས་ཀྱི་འབྲེལ་ཡོད་གཏན་འབེབས་གཞིར་བཟུང་གཅིག་བསྡུས་ཞིབ་བཤེར་ཆོག་མཆན་འགོད་པ་དང་གཅིག་གྱུར་གྱིས་ལག་བསྟར་བྱས་ཏེ་ཐོན་པའི་དམིགས་ཚད་གཅིག་གྱུར་གྱིས་བེད་སྤྱོད་གཏོང་ཆོག་པ་དང་། ད་དུང་ལྷག་མ་ཡོད་ཚེ་ཞིང་ཆེན་རིམ་པའི་དོ་དམ་ལས་སྟེགས་ནང་བཅུག་ནས་ཞིང་ཆེན་ཁྱབ་ཁོངས་ནང་སྙོམས་སྒྲིག་བྱེད་ཆོག་ཅེས་གསུངས་ཡོད་པ་རེད། གཞན་ཡང་རྒྱལ་ཁབ་ཀྱི་གཅིག་གྱུར་བཀོད་སྒྲིག་གཞིར་བཟུང་གྲོང་གསེབ་ཀྱི་མཉམ་སྡེབ་གཉེར་སྐྱོང་རང་བཞིན་གྱི་འཛུགས་སྐྲུན་ས་ཆ་ཁྲོམ་རར་ཞུགས་པའི་ལས་དོན་སྤེལ་ཚེ། བཅོས་སྒྲིག་ལས་དོན་དང་ཟུང་འབྲེལ་བྱས་ཏེ་ཐར་ཐོར་དང་གཅིག་བསྡུས་མེད་པའི་མཉམ་སྡེབ་འཛུགས་སྐྲུན་ས་ཆ་ཆུང་གྲས་རྣམས་བཅོས་སྒྲིག་བྱས་ནས་ས་ཆ་ཆེ་གྲས་སུ་ཟླ་སྒྲིལ་བཏང་ནས་རྒྱལ་ཁབ་ཀྱི་མངའ་ཁོངས་བར་སྟོང་འཆར་འགོད་གཞིར་བཟུང་གཉེར་སྐྱོང་རང་བཞིན་གྱི་སྤྱོད་ཁོངས་སུ་གཏོགས་པ་རྣམས་ཁྲོམ་རར་ཞུགས་ཆོག་གི་ཡོད་ཅེས་གསུངས་ཡོད་པ་རེད།
