འདི་ག་ལས་ཁུངས་ནས་སྤེལ་བའི་གནས་ཚུལ། ཀྲུང་གོ་མི་དམངས་དངུལ་ཁང་གིས་ཚེས་13ཉིན་ཡོངས་བསྒྲགས་བྱས་པའི་2024ལོའི་ཟླ་7པའི་དངུལ་རྩའི་བསྡོམས་རྩིས་གྲངས་གཞིའི་སྙན་ཞུ་ལས་མངོན་པར། རང་རྒྱལ་གྱི་དངུལ་རྩའི་སྤྱི་འབོར་གྱི་འཕར་ཤུགས་དེ་མིང་ཐོག་གི་རྒྱལ་ནང་ཐོན་སྐྱེད་སྤྱིའི་རིན་ཐང་ལས་མཐོ་བ་ཡོད་པ་དང་། སྤྱི་ཡོངས་ནས་བཤད་ན་ལུགས་མཐུན་གྱི་འཕར་སྣོན་རྒྱུན་འཁྱོངས་ཐུབ་ཡོད། ཟླ་བདུན་པའི་ཟླ་མཇུག་ཏུ།  སྤྱི་ཚོགས་ཀྱི་མ་དངུལ་བསྡུ་རུབ་ཀྱི་གཞི་ཁྱོན་སོགས་ཀྱི་འཕར་ཤུགས་བརྟན་པོའི་ཁྲོད་འཕར་སྣོན་བྱུང་བ་དང་། དངུལ་བུན་འཕར་སྣོན་འགྲོ་རྒྱུ་གཞི་རྩའི་ཆ་ནས་བརྟན་པོ་བྱུང་བ། ཡིད་རྟོན་དངུལ་བུན་གྱི་ཐོན་ཁུངས་སྔར་ལས་མང་བ་རྒྱལ་དམངས་དཔལ་འབྱོར་གྱི་གཙོ་གནད་ཁྱབ་ཁོངས་དང་ཉམས་ཞན་ལྷུ་ཚིགས་སུ་ཁྱབ་བཞིན་ཡོད་པ་རེད།

　　ཟླ་8ཚེས་13ཉིན། མི་དམངས་དངུལ་ཁང་གིས་ཡོངས་བསྒྲགས་བྱས་པའི་དངུལ་རྩའི་གྲངས་གཞི་གསར་ཤོས་ལས། ཟླ་བདུན་པའི་ཟླ་མཇུག་བར་སླེབས་དུས། དངུལ་ལོར་མཁོ་སྤྲོད་བྱེད་པའི་གནས་ཚུལ་ལན་ཆ་བྱེད་པའི་དངུལ་ལོར་m2ཀྱི་ལྷག་གྲངས་སྒོར་དུང་ཕྱུར་ཁྲི་303དང་སུམ་སྟོང་བརྒྱ་ཡིན་ཞིང་། འཕར་ཤུགས་བརྟན་པོའི་ཁྲོད་འཕར་སྣོན་བྱུང་བ་དང་། དེ་དུས་མཚུངས་དང་བསྡུར་ན་བརྒྱ་ཆ་6.3འཕར་ཡོད། སྤྱི་ཚོགས་མ་དངུལ་བསྡུ་རུབ་ཀྱི་གཞི་ཁྱོན་གསོག་ཉར་བྱེད་ཚད་སྒོར་དུང་ཕྱུར་ཁྲི་395དང་བདུན་སྟོང་ཉིས་བརྒྱ་ཟིན་པ་དང་། དེ་དུས་མཚུངས་དང་བསྡུར་ན་བརྒྱ་ཆ་8.2འཕར་བ། གྲངས་གཞི་དེ་གཉིས་ཀ་ཟླ་བ་གོང་མ་དང་བསྡུར་ན་བརྒྱ་ཆའི་གནས་0.1གིས་མཐོ་བ་ཡོད། མི་དམངས་ཤོག་སྒོར་གྱི་རིགས་ཁག་གི་དངུལ་བུན་གྱི་ལྷག་གྲངས་སྒོར་དུང་ཕྱུར་ཁྲི་251དང་ཆིག་སྟོང་བརྒྱ་ཟིན་པ་དང་། དེ་དུས་མཚུངས་ལས་བརྒྱ་ཆ་8.7འཕར་ཡོད།

　　ནན་ཁའེ་སློབ་ཆེན་དངུལ་རྩ་གོང་འཕེལ་ཞིབ་འཇུག་ཁང་གི་འགོ་འཛིན་ཐན་ལིས་ཧུའེ་ཡིས། ཟླ་བ་བདུན་པའི་དངལ་རྩའི་སྤྱི་འབོར་འཕར་སྣོན་འགྲོ་རྒྱུ་དེ་གཞི་རྩའི་ཆ་ནས་བརྟན་པོ་བྱུང་བ་དང་། ཟླ་མཇུག་གི་འཕར་ཤུགས་དེ་ཟླ་གོང་མ་དང་བསྡུར་ན་འདྲ་པོ་ཡིན་ཞིང་། སྤྱི་ཚོགས་ཀྱི་མ་དངུལ་བསྡུ་རུབ་ཀྱི་གཞི་ཁྱོན་འཕར་ཤུགས་དེ་ལོ་སྟོད་ཀྱི་མིང་ཐོག་གི་རྒྱལ་ནང་ཐོན་སྐྱེད་སྤྱིའི་རིན་ཐང་ལས་མཐོ་བ་ཡོད། ཟླ་བདུན་པའི་རང་རྒྱལ་གྱི་སྲིད་གཞུང་བུན་འཛིན་གྱིས་བསྡུ་རུབ་བྱེད་པའི་མ་དངུལ་གཙང་མ་སྒོར་དུང་ཕྱུར་7000ཟིན་ནས། དུས་མཚུངས་དང་བསྡུར་ན་སྒོར་དུང་ཕྱུར་2900ཡིས་མཐོ་བ་ཡོད་པས། སྤྱི་ཚོགས་ཀྱི་མ་དངུལ་བསྡུ་རུབ་བྱེད་པའི་གཞི་ཁྱོན་བརྟན་པོའི་ངང་འཕར་སྣོན་འགྲོ་རྒྱུར་འདེགས་སྐྱོར་ནུས་ལྡན་བྱས་ཡོད། དངུལ་རྩས་རྒྱུན་མཐུད་ངང་དངོས་གཟུགས་དཔལ་འབྱོར་ལ་རྒྱབ་སྐྱོར་བྱེད་པ་མཚོན་གྱི་ཡོད་ཅེས་བསྟན་ཡོད།

　　ཟླ་7པར་གསར་དུ་བསྣན་པའི་དངུལ་བུན་ནང་སྤ་སེའི་འཛིན་ཤོག་འཕར་སྣོན་འགྲོ་རྒྱུ་མང་དུ་ཕྱིན་ཡོད་པ་དང་། ཀོང་ཏ་དངུལ་ཁང་གི་དངུལ་རྩའི་ཁྲོམ་རའི་པུའི་སྤྱི་ཁོག་ཞིབ་འཇུག་པ་ཀྲའུ་མའོ་ཧྭ་ཡིས་དབྱེ་ཞིབ་བྱས་པར། རེའུ་མིག་ནང་གི་སྤ་སེའི་འཛིན་ཤོག་ནི་དངོས་གཟུགས་དཔལ་འབྱོར་དང་ལྷག་དོན་དུ་ཁེ་ལས་འབྲིང་ཆུང་གིས་མ་དངུལ་བསྡུ་རུབ་བྱེད་པའི་ཐབས་ལམ་གལ་ཆེན་ཤིག་ཡིན། སྤ་སེའི་འཛིན་ཤོག་གི་ཚད་བཀག་དུས་ཚོད་ཐུང་བ་དང་། སྟབས་བདེའི་རང་བཞིན་མཐོ་བ། འཁོར་རྒྱུག་རང་བཞིན་ཡག་པ་བཅས་ཡོད། སྤ་སེའི་འཛིན་ཤོག་གི་སྐྱེད་ཚད་ཆག་འགྲོ་བ་དང་བསྟུན་ནས། ཁེ་ལས་འབྲིང་ཆུང་གིས་སྤ་སེའི་འཛིན་ཤོག་གི་མ་དངུལ་བསྡུ་རུབ་བྱེད་པའི་མ་གནས་ཀྱང་དེ་མཚུངས་ཀྱི་དམའ་རུ་འགྲོ་རྒྱུ་ཡིན་པ་དང་། དེས་མ་དངུལ་བསྡུ་རུབ་ཀྱི་དགོས་མཁོ་ཡང་སྐུལ་སྤེལ་བྱེད་ཐུབ།

　　གྲངས་གཞི་ལས་མངོན་པར། ཡིད་རྟོན་དངུལ་བུན་གྱི་ཐོན་ཁུངས་སྔར་ལས་མང་བ་རྒྱལ་དམངས་དཔལ་འབྱོར་གྱི་གཙོ་གནད་ཁྱབ་ཁོངས་དང་ཉམས་ཞན་ལྷུ་ཚིགས་སུ་ཁྱབ་རྒྱུ་ཡིན། ཟླ་བདུན་པའི་ཟླ་མཇུག་ཏུ། བཟོ་སྐྲུན་ལས་རིགས་ཁྲོད་ཀྱི་དུས་ཡུན་རིང་འབྲིང་གི་དངུལ་བུན་གྱི་ལྷག་གྲངས་སྒོར་དུང་ཕྱུར་ཁྲི་13དང་དྲུག་སྟོང་སུམ་བརྒྱ་ཟིན་ནས། དུས་མཚུངས་དང་བསྡུར་ན་བརྒྱ་ཆ་16.9འཕར་ཡོད། དེའི་ཁྲོད། ལག་རྩལ་མཐོ་བའི་བཟོ་སྐྲུན་ལས་རིགས་ནང་དུས་ཡུན་རིང་འབྲིང་གི་དངུལ་བུན་ལྷག་གྲངས་དེ་དུས་མཚུངས་དང་བསྡུར་ན་བརྒྱ་ཆ་15.5འཕར་ཡོད། སྤུས་ཀ་ལེགས་པ་དང་དཔེ་གསར་ཅན་གྱི་ཁེ་ལས་དངུལ་བུན་དང་། ཀུན་ཕན་ཆེས་ཆུང་བ་སོགས་ཡན་གྱི་དངུལ་བུན་འཕར་ཤུགས་དེ་དུས་མཚུངས་ཀྱི་རིགས་ཁག་གི་དངུལ་བུན་འཕར་ཤུགས་ལས་མཐོ་བ་ཡོད། ཐན་ལིས་ཧུའེ་ཡིས། དངུལ་རྩའི་རྒྱབ་སྐྱོར་གྱི་སྤུས་ཀ་དང་ལས་ཆོད་མངོན་གསལ་དོད་པོས་མཐོ་རུ་ཕྱིན་ཡོད་པ་དང་། དུས་མཚམས་གོང་མའི་སྲིད་ཇུས་ཀྱི་ཕན་འབྲས་ཀྱང་རིམ་བཞིན་མངོན་ནས། ཕན་ཡོད་དགོས་མཁོ་སླར་གསོ་དང་འཕར་སྣོན་འགྲོ་རྒྱུར་སྐུལ་ཁྲིད་བྱེད་ཐུབ་པ་དང་། འབྱུང་འགྱུར་དཔལ་འབྱོར་གྱི་འཁོར་རྒྱུག་སྔར་ལས་བདེ་བགྲོད་ཡོང་རྒྱུ་དང་། ཕན་ཡོད་ཀྱི་མ་དངུལ་བསྡུ་རུབ་བྱེད་པའི་དགོས་མཁོ་གསར་པ་གཏོད་རྒྱུ་ཡིན་ཞེས་གསུངས་ཡོད།