འདི་ག་ལས་ཁུངས་ནས་སྤེལ་བའི་གནས་ཚུལ། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ཀྲུང་དབྱང་གི་ཚན་པ་ཁག་དང་འབྲེལ་ཡོད་ཞིང་ཆེན་དང་གྲོང་ཁྱེར་གྱིས་ཁྱོན་ཡོངས་ནས་ཁ་གཏད་ཤིན་སྐྱོར་ལས་དོན་སྤེལ་ཤུགས་ཆེ་རུ་བཏང་བ་དང་། ཤིན་ཅང་མི་རིགས་ཁག་གི་མང་ཚོགས་ཀྱི་དཀའ་ཉེན་དང་སེམས་ཁྲལ། རེ་སྒུག་བཅས་ཀྱི་གནད་དོན་ལ་གནད་ལ་འཕིགས་པའི་སྒོ་ནས་ཤུགས་སྣོན་བརྒྱབ་པས་ཤིན་ཅང་གི་དཔལ་འབྱོར་དང་སྤྱི་ཚོགས་སྤུས་ཚད་མཐོ་པོས་གོང་འཕེལ་འགྲོ་རྒྱུར་རམ་འདེགས་ནུས་ལྡན་ཐུབ་ཡོད། ཤིན་ཅང་ཨ་ཁེ་སུ་ས་ཁུལ་ཁུ་ཁྲེ་གྲོང་ཁྱེར་ཨུ་ཆ་གྲོང་རྡལ་ཡུང་ཁུ་དར་རྒྱས་གྲོང་ཚོར་ཤི་ཀྭ་སྨིན་པའི་དུས་རེད། གྲོང་མི་ཡུས་ནུ་སི་མའེ་མའེ་ཐིས་བཏབ་པའི་ཤི་ཀྭ་ནི་ཉིང་པོ་ཡི་ཤི་ཀྭ་ཡིན་པ་དང་། ཡུང་ཞེས་པ་ནི་ཤིན་ཅང་ཁུ་ཁྲེ་ཡི་ཁ་གཏད་རོགས་སྐྱོར་ཀྲེ་ཅང་ཉིང་པོ་ཡི་བསྡུས་མིང་ཡིན་པ་རེད། ཐོན་ལས་དར་འཕེལ་གཏོང་དགོས་ལ་གྲོང་གསེབ་བཅོས་སྐྱོང་ཡང་ཐུབ་པ་བྱ་དགོས། ཉིང་པོ་ཡི་མཛེས་སྡུག་ལྡན་པའི་གྲོང་གསེབ་འཛུགས་སྐྲུན་གྱི་ཉམས་མྱོང་དཔྱད་གཞིར་འཛིན་ནས་ཡུང་ཁུ་དར་རྒྱས་གྲོང་ཚོས་སྒྱུར་བཀོད་ལེགས་གཏོང་ལས་དོན་ལ་སྐུལ་འདེད་ནུས་ལྡན་བཏང་ཡོད། མིག་སྔར། གྲོང་གསེབ་ཀྱི་གར་སྟེགས་ཆེ་མོ་དང་། གློག་བརྙན་ཁང་། ཞིབ་སློབ་ལྟེ་གནས་སོགས་རིག་གནས་ཡུལ་སྐོར་རྣམ་གྲངས་གྲོང་ཚོར་བེད་སྤྱོད་གཏོང་འགོ་ཚུགས་པ་དང་། གྲོང་མི་མི་ཉུང་བ་ཞིག་ལ་ཁྱིམ་གྱི་སྒོ་རྩར་ལས་ཀ་རག་ཡོད་པ་རེད།

ལོ་བཅུའི་རིང་། ཤིན་ཅང་དུ་རྨང་གཞིའི་སྒྲིག་བཀོད་འཛུགས་སྐྲུན་འཕེལ་རྒྱས་མགྱོགས་པོ་བྱུང་བ་རེད། སྤྱི་ལོ་2022ལོའི་ལོ་མཇུག་ཏུ། ཤིན་ཅང་གི་ལྕགས་ལམ་འཁོར་རྒྱུག་ཐུབ་པའི་ལམ་ཚད་སྤྱི་ལེ་9000ལས་བརྒལ་བ་དང་། གཞུང་ལམ་ཐོག་རླངས་འཁོར་ཤར་གཏོང་ཐུབ་ཚད་སྤྱི་ལེ་ཉིས་འབུམ་ཉིས་ཁྲི་གསུམ་སྟོང་ཙམ་ཟིན་པ། ས་ཁུལ་དང་ཁུལ། གྲོང་ཁྱེར་བཅས་ཚང་མ་མྱུར་བགྲོད་གཞུང་ལམ་གྱི་དུས་རབས་ལ་སླེབས་པ། དམངས་སྤྱོད་འགྲུལ་སྐྱེལ་གནམ་ཐང་25བསྐྲུན་ཟིན་ནས་བེད་སྤྱོད་གཏོང་འགོ་ཚུགས་པ་བཅས་བྱུང་ནས་ཤིན་ཅང་འདི་ཉིད་རྒྱལ་ཡོངས་སུ་དམངས་སྤྱོད་གནམ་ཐང་མང་ཤོས་ཀྱི་ཞིང་ཆེན་ཞིག་ཏུ་གྱུར་ཡོད་པ་རེད། འགྲིམ་འགྲུལ་སྐྱེལ་འདྲེན་པུའི་ཕྱོགས་བསྡུས་འཆར་འགོད་སིའི་སི་ཀྲང་གཞོན་པ་ལི་ཁྲོན་ཀོང་གིས། ཤིན་ཅང་གི་བྱང་རྒྱུད་དང་། དབུས་རྒྱུད། ལྷོ་རྒྱུད་བཅས་སུ་འགྲོ་འོང་བྱེད་པའི་བགྲོད་ལམ་ཁག་གསུམ་པོར་སྤྱིའི་ཆ་ནས་ལྕགས་ལམ་དང་མྱུར་བགྲོད་གཞུང་ལམ་ཤར་གཏོང་ཐུབ་པ་དང་། རྒྱལ་ལམ་3018 ཅིང་ཧོ་ནས་ཨ་ལ་ཧྲན་རི་བོའི་མྱུར་བགྲོད་གཞུང་ལམ་སོགས་འགག་སྒོའི་གཞུང་ལམ་ཁག་ཅིག་སྔ་རྗེས་སུ་བསྐྲུན་ཟིན་ཞིང་། ཀྲུང་གོ་ནས་ཡོ་རོབ་བར་གྱི་མེ་འཁོར་ཕར་འགྲོ་ཚུར་འོང་གི་ལན་གྲངས་བརྟན་པོའི་ངང་འཕར་བ། དར་གོས་ལམ་བུའི་དཔལ་འབྱོར་ཁུལ་གྱི་ལྟེ་གནད་སྤུས་ཚད་མཐོ་པོས་བསྐྲུན་རྒྱུར་འདེགས་སྐྱོར་ནུས་ལྡན་མཁོ་འདོན་བྱས་ཡོད་ཅེས་གསུངས་པ་རེད།

ཁ་གཏད་ཤིན་སྐྱོར་གིས་དམངས་འཚོ་སྔོན་ལ་བཞག་པ། ཞིང་ཆེན་དང་གྲོང་ཁྱེར་ཁག་གིས་ཤིན་ཅང་ལ་རོགས་སྐྱོར་བྱེད་པའི་མ་དངུལ་བརྒྱ་ཆ་80དམངས་འཚོའི་ཁྱབ་ཁོངས་སུ་བཏང་བ་དང་། ཀོང་ཏུང་དང་། ཅང་སུའུ། ཧོ་ནན་སོགས་ཞིང་ཆེན་གྱིས་ཆ་སྒྲིག་རོགས་སྐྱོར་དང་ལག་རྩལ་གསོ་སྦྱོང་སོགས་ཀྱི་རྣམ་པ་བརྒྱུད། ཆུ་ཚད་མཐོ་བའི་སློབ་གསོ་དང་སྨན་བཅོས་ཀྱི་ཤེས་ལྡན་པའི་དཔུང་ཁག་ཁག་ཅིག་གསོ་སྐྱོང་བྱས་པ་དེས་གཞི་རིམ་སྨན་ཁང་གི་མིག་ནད་ཚན་ཁག་དང་། ལུས་གསོའི་ཚན་ཁག ནད་ཚབས་ལྕི་བའི་གསོ་རིག་སོགས་ཀྱི་རིག་ཚན་སྟོང་ཆ་བསྐངས་ཡོད། ཤིན་ཅང་ཁ་ཧྲེ་ས་ཁུལ་ཧྲུའུ་ཧྥུའུ་རྫོང་མི་དམངས་སྨན་ཁང་གི་ནད་ཚབས་ལྕི་བའི་གསོ་རིག་ཚན་ཁག་གི་ནད་སྡོད་ཁང་གི་སྨན་པ་ཨེ་ཁེ་པེར་ཐུ་ལ་ཅང་གིས། འབྲེལ་ཡོད་རྩལ་ནུས་བཀོལ་སྤྱོད་ཤེས་པས་ཉེན་ཁ་ཆེ་ལ་ནད་ཚབས་ལྕི་བའི་ནད་པ་ངེད་སྨན་ཁང་དུ་སྨན་བཅོས་ཐུབ་པ་དང་སྨན་ཁང་གཞན་དུ་གཏོང་ཚད་དམའ་རུ་སོང་ཡོད་ཅེས་བརྗོད་ཡོད་པ་རེད།

ལོ་བཅུའི་རིང་། ཀྲུང་དབྱང་དང་ཞིང་ཆེན་དང་གྲོང་ཁྱེར་ཁག་གིས་ཤིན་ཅང་ལ་རོགས་སྐྱོར་གྱི་མ་དངུལ་ཁྱོན་སྒོར་དུང་ཕྱུར་1700བཏང་བ་དང་། ཁེ་ལས་15000ལྷག་ཤིན་ཅང་དུ་གཞི་ཚུགས་པ་བྱས་པ། དེང་རབས་ཞིང་ལས་དང་། ལས་སྣོན་བཟོ་སྐྲུན། ཁྱད་ལྡན་ཡུལ་སྐོར་སོགས་ཐོན་ལས་འཕེལ་རྒྱས་ཅུང་མགྱོགས་པོ་བྱུང་ཡོད། སློབ་གསོ་དང་། ཚན་རྩལ། རིག་གནས་སོགས་ཁྱབ་ཁོངས་ཀྱི་མཁོ་གལ་ཆེ་བའི་ཤེས་ལྡན་པ་དགུ་ཁྲི་ཙམ་ནང་འདྲེན་བྱས་པས་རྒྱུན་མཐུད་འཕེལ་རྒྱས་ལ་སྒུལ་ཤུགས་གསར་པ་གསོག་འཇོག་ཐུབ་ཡོད། ཤིན་ཅང་ལ་རོགས་སྐྱོར་བྱེད་པའི་ཕྱོགས་བསྡུས་ཕན་འབྲས་ཟམ་མི་ཆད་པར་ཐོན་པ་དང་། མི་རིགས་ཁག་གི་མང་ཚོགས་ཀྱི་ཐོབ་ཚོར་དང་། བདེ་ཚོར། བདེ་འཇགས་ཚོར་བ་བཅས་ཟམ་མི་ཆད་པར་ཆེ་རུ་སོང་བ་རེད། ཤིན་ཅང་ཡུ་གུར་རང་སྐྱོང་ལྗོངས་འཕེལ་སྒྱུར་ཨུ་ལྷན་གྱི་ཀྲུའུ་རེན་གཞོན་པ་ལུའུ་ཕེང་གིས། རང་ས་ཁུལ་གྱི་རྨང་གཞི་འདིངབ་དང་། ཕུགས་ལ་ཕན་པའི་ལས་དོན་ལ་གཞིགས་ཏེ་ཤིན་ཅང་ལ་རོགས་སྐྱོར་བྱེད་པའི་མ་དངུལ་གྱིས་གཅིག་སྡུད་ཐོག་གོང་འཕེལ་ཁྲོད་འབུར་དུ་ཐོན་པའི་ཞན་ཆ་ཐག་གཅོད་བྱ་རྒྱུར་བཏང་བས་ཁ་གཏད་ཤིན་སྐྱོར་གྱི་ཕྱོགས་བསྡུས་ཕན་འབྲས་མཐོ་རུ་སོང་བ་དང་། ཤིན་ཅང་གི་ཁྱད་ཆོས་དང་བཟང་ཆ་མངོན་པའི་དེང་རབས་ཅན་གྱི་ཐོན་ལས་མ་ལག་གང་མགྱོགས་གཏོད་པ། དམངས་འཚོར་དམ་པོར་གཞིགས་ཏེ་སྤུས་ཚད་མཐོ་བའི་གོང་འཕེལ་ལ་སྐུལ་འདེད་གཏོང་རྒྱུ་ཡིན་ཞེས་བརྗོད་ཡོད་པ་རེད།

ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།