འདི་ག་རླུང་འཕྲིན་ལས་ཁུངས་ནས་སྤེལ་བའི་གནས་ཚུལ། སྤྱི་ཚེས་11ཉིན་ཀྲུང་གོ་རླངས་འཁོར་བཟོ་ལས་མཐུན་ཚོགས་ཀྱིས་གྲངས་གཞི་ཡོངས་བསྒྲགས་བྱས་པར་གཞིགས་ན། འདི་ལོའི་སྤྱི་ཟླ་བརྒྱད་པར་རང་རྒྱལ་གྱི་རླངས་འཁོར་ཐོན་སྐྱེད་དང་བྲིན་ཚོང་དེ་ན་ནིང་གི་དུས་མཚུངས་དང་ད་ལོའི་དུས་མཚམས་གོང་མ་གཉིས་ཀ་ལས་འཕར་ནས་ཐོན་སྐྱེད་དང་བྲིན་ཚོང་མུ་མཐུད་སླར་གསོ་ཐུབ་ཡོད་པ་རེད།

ད་ལོའི་སྤྱི་ཟླ་བརྒྱད་པར་རང་རྒྱལ་གྱི་རླངས་འཁོར་ཐོན་སྐྱེད་དང་བྲིན་ཚོང་བྱེད་ཚད་ས་ཡ་གཉིས་དང་ལྔ་འབུམ་བདུན་ཁྲི་ལྔ་སྟོང་དང་། ས་ཡ་གཉིས་དང་ལྔ་འབུམ་བརྒྱད་ཁྲི་ཉིས་སྟོང་སོ་སོར་ཟིན་པ་དེ་དུས་མཚམས་གོང་མ་ཁག་སོ་སོར་7.2%དང་8.2%ནས་དུས་མཚུངས་ལས་7.5%དང་8.4%སོ་སོར་འཕར་ཡོད་པ་རེད། ཀྲུང་གོ་རླངས་འཁོར་བཟོ་ལས་མཐུན་ཚོགས་ཀྱི་དྲུང་ཆེ་གཞོན་པ་ཁྲེན་ཧྲི་ཧྭ་ཡིས་ངོ་སྤྲོད་བྱས་པར་གཞིགས་ན། སྤྱི་ཟླ་བརྒྱད་པར་རྒྱལ་ཁབ་ཀྱིས་འཛད་སྤྱོད་ལ་སྐུལ་འདེད་གཏོང་བའི་སྲིད་ཇུས་དང་རླངས་འཁོར་ཁེ་ལས་ཀྱི་གཟིགས་སྐྱོང་བྲིན་ཚོང་སོགས་ཀྱི་རྐྱེན་པས་རླངས་འཁོར་ཉོ་སྒྲུབ་ཀྱི་དགོས་མཁོ་རྒྱུན་མཐུད་ངང་ཆེ་རུ་ཕྱིན་ཏེ་རླངས་འཁོར་ཁྲོམ་རར་རླངས་འཁོར་སྔར་བཞིན་བྲིན་ཁ་རྒྱུགས་པོ་ཡོད་པ་རེད།

དེའི་ནང་སྒེར་སྤྱོད་རླངས་འཁོར་དང་ཚོང་སྤྱོད་རླངས་འཁོར་གྱི་ཐོན་སྐྱེད་དང་བྲིན་ཚོང་གཉིས་ཀ་འཕར་བ་དང་ནུས་རྒྱུ་གསར་པའི་རླངས་འཁོར་དང་རླངས་འཁོར་ཕྱིར་གཏོང་སྔར་བཞིན་ཡག་པོ་བྱུང་ཡོད།
དོ་ཁུར་བྱེད་རིན་ཡོད་པ་ཞིག་ནི། སྤྱི་ཟླ་བརྒྱད་པར་ཀྲུང་གོའི་སྤུས་རྟགས་ཀྱི་སྒེར་སྤྱོད་རླངས་འཁོར་གྱི་ཁྲོམ་རའི་ཐོབ་སྐལ་མགྱོགས་མྱུར་འཕར་ནས་བརྒྱ་ཆ8.4འཕར་ཡོད་པ་རེད། ཕྱོགས་བསྡུས་བྱས་འབྲས་ལས་གསལ་བར། འདི་ལོའི་སྤྱི་ཟླ་དང་པོ་ནས་བརྒྱད་པའི་བར། རང་རྒྱལ་གྱི་རླངས་འཁོར་ཐོན་སྐྱེད་དང་བྲིན་ཚོང་བྱེད་ཚད་བྱེ་བ་གཅིག་དང་ས་ཡ་བརྒྱད་དང་ཉིས་ཁྲི་ཉིས་སྟོང་ལྔ་བརྒྱ་དང་བྱེ་བ་གཅིག་དང་ས་ཡ་བརྒྱད་དང་ཉིས་འབུམ་ཆིག་ཁྲི་ཁག་སོ་སོར་ཟིན་པ་དེ་དུས་མཚུངས་ལས་7.4%དང་8%འཕར་ཡོད་པ་རེད། ཁྲེན་ཧྲི་ཧྭ་ཡིས། ཉེ་དུས་སྤྱི་ཁོག་སྙོམས་སྒྲིག་སྲིད་ཇུས་དང་བྱེད་ཐབས་རབ་དང་རིམ་པ་གཅིག་སྡུད་ངང་བཏོན་པ་དང་ཆབས་ཅིག་ཁེ་ལས་ཀྱིས་ཁྲོམ་རའི་འཕེལ་རྒྱས་ལ་ཡིད་ཆེས་བྱེད་ཚད་སྔར་བས་ཆེ་རུ་ཕྱིན་ཡོད་ཅེས་གསུངས་ཡོད།

ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།