དབྱི་སི་རལ་དམག་གིས་པེ་རུ་ཐེའི་ལྷོ་འདབས་ཀྱི་ལི་པ་ནོན་སྐྱབས་མགོན་ཏང་གི་གོ་མཚོན་མཛོད་ཁང་མང་པོར་འཇབ་རྒོལ་བྱས་པ་ཡིན་ཞེས་བརྗོད་པ།
2024-11-16 10:14:00 责编：卓玛才让
འདི་ག་ལས་ཁུངས་ནས་སྤེལ་བའི་གནས་ཚུལ། དབྱི་སི་རལ་རྒྱལ་སྲུང་དམག་གིས་ཚེས་14ཉིན་གྱི་དགོང་མོར་སྤེལ་བའི་གསལ་བསྒྲགས་ཤིག་གི་ནང་། ཉིན་དེའི་དགོང་མོ་སྔ་ཙམ་དུ། དབྱི་སི་རལ་གྱི་དམག་འཐབ་གནམ་གྲུས་ལི་པ་ནོན་པེ་རུ་ལེ་ཐེའི་ལྷོ་འདབས་ཀྱི་ལི་པ་ནོན་སྐྱབས་མགོན་ཏང་གི་གོ་མཚོན་མཛོད་ཁང་མང་པོར་འཇབ་རྒོལ་བྱས་ཡོད་པ་རེད། འཇབ་རྒོལ་མ་བྱས་གོང་། དབྱི་སི་རལ་དམག་གིས་བྱ་ཐབས་མང་པོ་བཟུང་ནས་ས་གནས་དེ་གའི་མང་ཚོགས་གནོད་འཚེ་ལས་གཡོལ་གང་ཐུབ་བྱས་ཡོད། དཔེར་ན་ས་ཁུལ་དེ་གའི་མང་ཚོགས་ལ་དོགས་ཟོན་སྔོན་བརྡ་བཏང་ཡོད། དབྱི་སི་རལ་དམག་གིས་མུ་མཐུད་པེ་རུ་ལེ་ཐེའི་ལྷོ་འདབས་སུ་གནས་པའི་སྐྱབས་མགོན་ཏང་གི་རྨང་གཞིའི་སྒྲིག་ཆས་མང་པོར་འཇབ་རྒོལ་བྱ་རྒྱུ་ཡིན། དབྱི་སི་རལ་གྱིས་ཉིན་དེར་ལི་པ་ནོན་ཤར་རྒྱུད་དང་ལྷོ་རྒྱུད་ས་ཁུལ་མང་པོར་མཁའ་ཐོག་ནས་འཇབ་རྒོལ་བྱས་པས། མི་11རྐྱེན་ལམ་དུ་བཏང་བ་དང་། མི་9ལ་རྨས་སྐྱོན་བཟོས་ཡོད་ཅེས་འཁོད་ཡོད། ལི་པ་ནོན་སྤྱི་པའི་འཕྲོད་བསྟེན་པུའུ་ཡིས་ཚེས་14ཉིན་བརྡ་ཁྱབ་བཏང་ནས། 2023ལོའི་ཟླ་10ཚེས་8ཉིན་ལི་པ་ནོན་དང་དབྱི་སི་རལ་དབར་གདོང་གཏུག་ཤོར་ཚུན། ལི་པ་ནོན་མངའ་ཁོངས་ནང་མི་3386རྐྱེན་ལམ་དུ་ཤོར་བ་དང་། མི་14417ལ་རྨས་སྐྱོན་ཕོག་ཡོད་ཅེས་འཁོད་ཡོད།
