འདི་ག་ལས་ཁུངས་ནས་གནས་ཚུལ་སྤེལ་བར། སྤྱི་ཚེས་བཅུ་གཉིས་ཉིན་དབྱི་སི་རལ་རྒྱལ་སྲུང་དམག་གིས་དབྱི་སི་རལ་དམག་གི་ཧྲི་ཤོག་36པས་ཉིན་དེར་ལེ་པ་ནོན་གྱི་ལྷོ་རྒྱུད་དུ་ས་ངོས་ཀྱི་བྱ་སྤྱོད་སྤེལ་རྒྱ་ཆེ་རུ་བཏང་ནས་ས་ཁོངས་གསར་པ་དང་དྲག་ཆས་རྟེན་གཞིར་འཇབ་རྒོལ་བྱས་ཏེ་ལི་པ་ནོན་སྐྱབས་མགོན་ཏང་གི་དྲག་ཆས་ཀྱི་པེ་རུ་ཐེའི་ལྷོ་འདབས་སུ་གནས་པའི་གོ་མཚོན་བཟོ་སྐྲུན་དང་གསོག་ཉར་བྱ་ཡུལ་མང་ཆེ་བ་རྩ་གཏོར་དུ་བཏང་ཡོད། དབྱི་སི་རལ་དམག་གིས་ད་དུང་ལེ་པ་ནོན་གྱི་ལྟེ་བའི་ཁུལ་དང་སི་རི་ཡ། སི་རི་ཡ་དང་ལེ་པ་ནོན་གྱི་མཐའ་མཚམས་བཅས་སུའང་རྡུང་རྡེག་བཏང་ཡོད་ཅེས་བཤད་ཡོད་པ་རེད།

　　ལི་པ་ནོན་སྐྱབ་མགོན་ཏང་མངའ་འོག་བྱ་སྤྱོད་ཁང་གིས་དེ་ཉིན་ལི་པ་ནོན་སྐྱབ་མགོན་ཏང་གིས་འགོག་རྒོལ་བྱས་པར་བརྟེན་དབྱི་སི་རལ་གྱི་དམག་དཔུང་ལི་པ་ནོན་དང་དབྱི་སི་རལ་གྱི་གནས་སྐབས་ས་མཚམས་ནུབ་ངོས་ཀྱི་ས་ཆ་མང་ཆེ་བ་ནས་ཕྱིར་འཐེན་བྱས་པ་དང་། དབྱི་སི་རལ་དམག་གི་འགོ་ཁྲིད་པས་ལི་པ་ནོན་གྱི་ལྷོ་རྒྱུད་དུ་དུས་མཚམས་གཉིས་པའི་དམག་དོན་བྱ་སྤྱོད་སྤེལ་རྒྱུའི་གཏན་འབེབས་བྱས་པ་དེས་གྱོང་གུན་དང་ཕམ་ཉེས་དེ་བས་མང་བ་ཡོང་རྒྱུ་ལས་མ་འདས། ལི་པ་ནོན་སྐྱབ་མགོན་ཏང་གི་དྲག་ཆས་སྟོབས་ཤུགས་ཀྱིས་ཡུན་རིང་དམག་འཐབ་བྱས་ནས་དབྱི་སི་རལ་དམག་གི་དམིགས་ཡུལ་སྒྲུབ་རྒྱུ་བཀག་འགོག་བྱེད་ཐུབ་ཅེས་བརྗོད་ཡོད་པ་རེད།

　　སྤྱི་ཚེས་བཅུ་གཉིས་ཉིན་དབྱི་སི་རལ་བྱང་རྒྱུད་ཀྱི་མཚོ་རྒྱུད་གྲོང་ཁྱེར་ན་ཧ་ལི་ཡར་ལེ་པ་ནོན་ཕྱོགས་ཀྱིས་འཕེན་གཏོང་བྱས་པའི་མེ་ཤུགས་འཕུར་མདེལ་གྱི་འཇབ་རྒོལ་ཕོག་ཡོད་པ་རེད། དབྱི་སི་རལ་མྱུར་སྐྱོབ་ཚན་པས་གནས་ཚུལ་སྤེལ་ནས། མིག་སྔར་དོན་རྐྱེན་དེའི་ནང་མི་གཉིས་རྐྱེན་ལམ་དུ་ཤོར་ཡོད་པ་རེད། དབྱི་སི་རལ་བྱང་རྒྱུད་ཀྱི་ཅ་ལི་ལི་ནུབ་མའི་ས་ཁུལ་དུ་ཉིན་དེར་ལེ་པ་ནོན་ཕྱོགས་ནས་འཕེན་གཏོང་བྱས་པའི་མེ་ཤུགས་འཕུར་མདེལ་གྱི་འཇབ་རྒོལ་ཕོག་ཡོད་པ་རེད། དབྱི་སི་རལ་ཕྱོགས་ཀྱི་བསྡོམས་རྩིས་གསར་ཤོས་ལ་གཞིགས་ན། འདི་ལོའི་ཟླ་བ་བཅུ་གཅིག་པའི་ཚུན་དུ་དབྱི་སི་རལ་ལ་མི་མེད་གནམ་གྲུ་60ཙམ་གྱི་འཇབ་རྒོལ་ཕོག་ཡོད་པ་དང་། མི་མེད་གནམ་གྲུ་དེ་དག་ནི་ལེ་པ་ནོན་དང་དབྱི་རག་ནས་འཕེན་གཏོང་བྱས་པ་ཞིག་རེད། དབྱི་སི་རལ་དམག་གི་མཁའ་ཟོན་མ་ལག་གིས་མི་མེད་གནམ་གྲུ་བརྒྱ་ཆ་དགུ་བཅུ་བཀག་ཐུབ་ཡོད། དབྱི་སི་རལ་དམག་གིས་ཀ་ཧྲ་ས་ཁུལ་དུ་མུ་མཐུད་དམག་དོན་བྱ་སྤྱོད་སྤེལ་ཡོད། ཀ་ཧྲ་ས་ཁུལ་འཕྲོད་བསྟེན་སྡེ་ཚན་གྱིས་སྤྱི་ཚེས་12ཉིན་གསལ་བསྒྲགས་སྤེལ་ནས་འདས་ཟིན་པའི་ཆུ་ཚོད་48ནང་དབྱི་སི་རལ་དམག་གིས་ཀ་ཧྲ་ས་ཁུལ་དུ་དམག་དོན་བྱ་སྤྱོད་སྤེལ་བའི་ནང་མི་62རྐྱེན་ལམ་དུ་ཤོར་བ་དང་མི་147ལ་རྨས་སྐྱོན་ཕོག་ཡོད་ཅེས་འཁོད་ཡོད་པ་རེད།

　　ཉིན་དེ་རང་ལ་དབྱི་སི་རལ་རྒྱལ་སྲུང་དམག་དང་དབྱི་སི་རལ་རྒྱལ་སྲུང་པུའི་མངའ་འོག་སྲིད་གཞུང་གི་མངའ་ཁོངས་བྱེད་སྒོ་མཐུན་སྦྱོར་ཁྲུའུ་ཡིས་མཉམ་འབྲེལ་སྤྱི་བསྒྲགས་སྤེལ་ཏེ་དབྱི་སི་རལ་སྲིད་གཞུང་གི་མཛུབ་སྟོན་གཞིར་བཟུང་། ཀ་ཧྲ་ས་ཁུལ་ལ་རོགས་སྐྱོར་དངོས་ཟོག་མཁོ་འདོན་བྱེད་པའི་གྲངས་འབོར་དང་ལམ་བུ་མང་དུ་གཏོང་ཆེད། ཀ་ཧྲ་ས་ཁུལ་གྱི་ཅི་སུའུ་ཧྥེ་མུའུ་འགག་སྒོ་སྒོ་དབྱེ་རྒྱུ་ཡིན་ཞེས་འཁོད་ཡོད། བཟའ་བཅའ་དང་ཆུ། སྨན་བཅོས་མཁོ་ཆས། འགེབས་སྲུང་སྒྲིག་ཆས་བཅས་ཚུད་པའི་དངོས་ཟོག་རྣམས་འགག་སྒོ་དེ་བརྒྱུད་ཀ་ཧྲའི་དབུས་རྒྱུད་དང་ལྷོ་རྒྱུད་དུ་དབོར་རྒྱུ་ཡིན་པ་རེད། གསལ་བསྒྲགས་ནང་རོགས་སྐྱོབ་དངོས་ཟོག་དེ་དག་ཁེ་ལེ་མུའུ་ཧྲ་ལོ་མུའུ་འགག་སྒོར་དབྱི་སི་རལ་རྒྱལ་སྲུང་པུའི་མཐའ་མཚམས་དོ་དམ་ཅུས་ཀྱི་བདེ་འཇགས་ཞིབ་བཤེར་དང་ལེན་བྱས་རྗེས་གཞི་ནས་ཀ་ཧྲ་ས་ཁུལ་དུ་དབོར་འདྲེན་བྱེད་ཆོག་ཅེས་ནན་བཤད་བྱས་ཡོད་པ་རེད།

　　སྤྱི་ཚེས་12ཉིན་མཉམ་འབྲེལ་རྒྱལ་ཚོགས་ཉེ་ཤར་ཕ་ལེ་སི་ཐན་ཡུལ་གྱར་བའི་རྒུད་སྐྱོབ་དང་ལས་གྲྭ་ཁྲུའུ་ཡིས་མིག་སྔར་ཀ་ཧྲ་ས་ཁུལ་དུ་མི་ཆོས་རིང་ལུགས་ཀྱི་རོགས་སྐྱོབ་བྱ་ཤུགས་ཧ་ཅང་ཉུང་དྲག་པ་མ་ཟད་ལྷག་པར་དུ་ཀ་ཧྲ་ས་ཁུལ་གྱི་བྱང་རྒྱུད་ས་ཁུལ་དུ་རོགས་སྐྱོབ་བྱ་རྒྱུ་དེ་བས་ཀྱང་ཉུང་དྲག་གི་ཡོད། ས་གནས་དེ་གའི་མང་ཚོགས་མུ་གེའི་གནས་སུ་གྱར་བ་མ་ཟད། གནས་ཚུལ་སྔར་བས་ཛ་དྲག་ཏུ་འགྲོ་བཞིན་ཡོད། མཉམ་འབྲེལ་རྒྱལ་ཚོགས་ཕྱོགས་ཀྱིས་ཀ་ཧྲ་ས་ཁུལ་གྱི་བྱང་རྒྱུད་དུ་འགྲོ་བསྐྱོད་བྱེད་པའི་རེ་ཞུ་བཏོན་ཡང་དེར་ཁས་ལེན་གཏན་ནས་བྱས་མེད་ཅེས་མཐའ་ཚིགས་བཏང་ཡོད།

　　སྤྱི་ཚེས་12ཉིན་གྱི་དགོང་མོ་དབྱི་སི་རལ་གྱི་ཙུང་ལི་ནེ་ཐ་ཉི་ཡ་ཧུའུ་ཡིས་བརྙན་མཐོང་སྤེལ་ནས་སླར་ཡང་དབྱི་རན་གྱི་མི་དམངས་ལ་ཐད་ཀའི་གཏམ་བཤད་ཟེར་བ་སྤེལ་ཡོད་པ་རེད། བརྙན་མཐོང་ནང་ནེ་ཐ་ཉི་ཡ་ཧུའུ་ཡིས་དབྱི་རན་མི་དམངས་ཀྱིས་དམག་འཁྲུག་མི་ཡོང་བའི་རེ་བ་བྱེད་ཀྱི་ཡོད་པ་ཤེས་ཀྱི་ཡོད་ལ། ང་རང་ནས་ཀྱང་དམག་རྒྱག་འདོད་མི་འདུག མ་ཟད་དབྱི་སི་རལ་མི་དམངས་ཀྱིས་ཀྱང་དམག་འཁྲུག་ཡོང་འདོད་བྱེད་ཀྱི་མེད། དབྱི་སི་རལ་བ་དང་དབྱི་རན་བས་ཐུན་མོང་ཐོག་དར་རྒྱས་དང་ཞི་བདེའི་འབྱུང་འགྱུར་ཞིག་བསྐྲུན་རྒྱུ་འདོད་ཡོད་པར་ང་རང་ཡིད་ཆེས་ཡོད། དེ་ནི་དབྱི་སི་རལ་ལ་ལྡན་དགོས་ངེས་ཀྱི་འབྱུང་འགྱུར་ཞིག་ཡིན་ལ་དབྱི་རན་ལའང་ཐུན་མོང་ཐོག་དབང་དགོས་པ་ཞིག་ཀྱང་ཡིན། ང་ཚོས་མཛེས་སྡུག་ལྡན་པའི་ཕུགས་འདུན་འདི་མངོན་འགྱུར་ཡོང་བ་བྱེད་དགོས་ཞེས་བརྗོད་ཡོད་པ་རེད།

　　ནེ་ཐ་ཉི་ཡ་ཧུའུ་ཡི་སྤེལ་བའི་ཐད་ཀའི་གཏམ་བཤད་ཟེར་བ་དེར་མིག་སྔར་དབྱི་རན་སྲིད་གཞུང་གིས་གནས་སྐབས་ལན་བསློགས་མེད་པ་རེད།

　　དབྱི་སི་རལ་ཞིབ་དཔྱོད་ཕྱོགས་ཀྱིས་སྤྱི་ཚེས་12ཉིན། ཙུང་ལི་ནེ་ཐ་ཉི་ཡ་ཧུའུ་ཡིས་ལྐོག་ཟ་རུལ་སུངས་ཀྱི་གྱོད་གཞིའི་དོགས་ཡོད་དཔང་ཚིག་འདོན་རྒྱུ་ནར་འགྱངས་བྱ་རྒྱུའི་རེ་བ་སླར་ཡང་དང་ལེན་བྱས་མེད་ཅིང་། ཞིབ་དཔྱོད་ཕྱོགས་ཀྱིས་འདྲི་གཅོད་དེ་བཏོན་ནས་ལོ་ལྔ་སོང་བས་འདྲི་གཅོད་དེ་གང་མགྱོགས་ཐག་ཆོད་པ་བྱ་རྒྱུ་དེ་སྤྱི་དམངས་ཀྱི་ཁེ་ཕན་དང་མཐུན་ལ། མ་ཟད་བཅའ་ཁྲིམས་མདུན་དུ་མི་ཚང་མ་འདྲ་མཉམ་ཡིན་པའི་རྩ་དོན་ལ་ཡང་སྲུང་སྐྱོང་ཐུབ་རྒྱུ་རེད་ཅེས་བསྟན་ཡོད། མིག་སྔར་དཔང་ཡིག་འདོན་པའི་འབྲེལ་ཡོད་གོ་རིམ་ཁག་ཟླ་12ཚེས་2ཉིན་ནས་འགོ་འཛུགས་རྒྱུ་ཡིན་པའི་གཏན་འཁེལ་བྱས་ཡོད་པ་རེད།

　　གཞན་ཡང་སྤྱི་ཚེས་བཅུ་གཉིས་ཉིན་ཡེ་མེན་ཧུའུ་སའེ་དྲག་ཤུགས་ཀྱི་དམག་དོན་མགྲིན་ཚབ་པས་གཏམ་བཤད་སྤེལ་ནས་ཧུའུ་སའེ་དྲག་ཤུགས་ཀྱིས་འཕུར་མདེལ་དང་མི་མེད་གནམ་གྲུ་བཏང་ནས་ཨ་རིའི་དམག་གི་ཡ་པོ་ལ་ཧན·ལིན་ཁེན་རྟགས་ཅན་གྱི་གྲུ་གཟིངས་ཨ་མར་འཇབ་རྒོལ་བྱས་པ་མ་ཟད་ཡེ་མེན་ལ་དམིགས་པའི་མཁའ་རྒོལ་འཆར་གཞི་དེའང་ཕམ་ཉེས་སུ་བཏང་ཡོད་ཅེས་བཤད་ཡོད། ཧུ་སའེ་དྲག་ཤུགས་ཀྱིས་ད་དུང་ཧུང་ཧའེ་མཚོ་སྟེང་གི་ཨ་རིའི་དམག་གི་མཐར་སྐྲོད་དམག་གྲུ་གཞན་གཉིས་ལ་འཇབ་རྒོལ་བྱས་ཡོད་ཅེས་བརྗོད་ཡོད། དེའི་ཐད་ཨ་རི་ཕྱོགས་ཀྱིས་གནས་སྐབས་ལན་སློགས་མེད་པ་རེད།