འདི་ག་ལས་ཁུངས་ནས་སྤེལ་བའི་གནས་ཚུལ།  《མཉམ་འབྲེལ་རྒྱལ་ཚོགས་གནམ་གཤིས་འགྱུར་ལྡོག་སྒྲོམ་གཞིའི་སྤྱི་ཆིངས》ཀྱི་ཆིངས་ཡིག་འཇོག་མཁན་ཕྱོགས་ཀྱི་ཚོགས་ཆེན་ཐེངས་ཉེར་དགུ་པ（COP29）ཟླ་11ཚེས་11ཉིན་ཨ་སའེ་པའེ་ཅང་གི་རྒྱལ་ས་པ་ཁུ་རུ་འཚོགས་ཡོད། ད་ཐེངས་ཀྱི་ཚོགས་ཆེན་ཐོག་གནམ་གཤིས་བྱ་སྤྱོད་ཀྱི་གྲོས་གཞི་གལ་ཆེན་མང་པོ་ཞིག་ལ་གྲོས་བསྡུར་དང་དབྱེ་འབྱེད་གྲོས་མོལ་བྱ་རྒྱུ་ཡིན་ཞིང་། ཀྲུང་གོའི་འཐུས་མི་ཚོགས་པས་དགེ་མཚན་ལྡན་པའི་ནུས་པ་འདོན་སྤེལ་བྱས་ནས། ཚོགས་ཆེན་ལ་དགེ་མཚན་ལྡན་ལ་དོ་སྙོམས་ཀྱི་གྲུབ་འབྲས་ཐོབ་རྒྱུར་སྐུལ་འདེད་གཏོང་རྒྱུ་ཡིན་པ་རེད།

　　《མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་སྒྲོམ་གཞིའི་སྤྱི་ཆིངས》ཀྱི་ཆིངས་ཡིག་འཇོག་མཁན་ཕྱོགས་ཀྱི་ཚོགས་ཆེན་ཐེངས་ཉེར་དགུ་པ（COP29）ཟླ་11ཚེས་11ཉིན་ནས་ཚེས་22ཉིན་བར་འཚོག་རྒྱུ་རེད། འབྱུང་ཁམས་ཁོར་ཡུག་པུའི་གནམ་གཤིས་འགྱུར་ལྡོག་ལ་ཁ་གཏད་གཅོག་པའི་སིའི་སི་ཀྲང་ཞ་དབྱིང་ཞན་གྱིས། ད་ཐེངས་ཀྱི་ཚོགས་ཆེན་གྱི་འདུན་པ་ནི་བློ་སྟོབས་ཆེ་རུ་གཏོང་བ་དང་ཆབས་ཅིག་བྱ་སྤྱོད་ལ་སྐུལ་འདེད་གཏོང་རྒྱུ་དེ་ཡིན་པ་དང་། 2025ལོའི་རྗེས་ཀྱི་གོ་ལ་ཧྲིལ་པོའི་གནམ་གཤིས་མ་དངུལ་དམིགས་ཚད་ཐད་དེ་མཚུངས་ཀྱི་བཀོད་སྒྲིག་བྱ་རྒྱུ་དེ་རེད། དར་རྒྱས་ཆེ་བའི་རྒྱལ་ཁབ་ཀྱིས་2025ལོའི་གོང་དུ་ཁས་ལེན་ཟིན་པའི་ལོ་ལྟར་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་མ་དངུལ་ཨ་སྒོར་དུང་ཕྱུར་1000བཏང་ནས་རྒྱབ་སྐྱོར་བྱ་རྒྱུའི་དམིགས་ཚད་ལག་བསྟར་ཏན་ཏིག་བྱས་ཏེ། མ་དངུལ་གྱི་རྒྱབ་སྐྱོར་ལྡབ་འཕར་ཡོང་བ་བྱེད་པ་དང་2025ལོའི་རྗེས་སུ་རྨང་གཞི་དེའི་ཐོག་མ་དངུལ་སྔར་བས་མང་བ་གཏོང་དགོས་ཞེས་ངོ་སྤྲོད་གནང་ཡོད།

　　ཞ་དབྱིང་ཞན་གྱིས། ཀྲུང་གོས་གནམ་གཤིས་འགྱུར་ལྡོག་ལ་ཁ་གཏད་གཅོག་རྒྱུར་ཚད་མཐོའི་མཐོང་ཆེན་བྱེད་ཀྱི་ཡོད།  དེ་ནི་《མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་སྒྲོམ་གཞིའི་སྤྱི་ཆིངས》ཀྱི་ཆིངས་ཡིག་འཇོག་མཁན་ཁག་དང་པོའི་གྲས་ཤིག་ཡིན་ལ། 《ཕ་རི་སིའི་གྲོས་ཆོད》ལ་མིང་རྟགས་དང་ཆོག་མཆན་འགོད་སྔ་ཤོས་ཀྱི་རྒྱལ་ཁབ་ཀྱི་གྲས་ཤིག་ཀྱང་ཡིན། ཀྲུང་གོ་ནི་གནམ་གཤིས་འགྱུར་ལྡོག་ལ་ཁ་གཏད་གཅོག་པའི་གོ་ལ་ཧྲིལ་པོའི་བཅོས་སྐྱོང་ནང་ཧུར་ཐག་ཞུགས་མཁན་དང་ལེགས་སྐྱེས་འབུལ་མཁན་ཡིན་ལ་སྣེ་ཁྲིད་པའང་ཡིན་ཞེས་གསུངས་འདུག

　　ཞ་དབྱིང་ཞན་གྱིས། ཀྲུང་གོས་དར་རྒྱས་ཆེ་བའི་རྒྱལ་ཁབ་དང་འཕེལ་རྒྱས་འགྲོ་བཞིན་པའི་རྒྱལ་ཁབ་གཞན་དག་དབར་སྐད་ཆ་ཤོད་རེས་དང་མཉམ་ལས་དམ་ཟབ་བྱས་ནས། 《ཕ་རི་སིའི་གྲོས་ཆོད》འཇོག་པ་དང་། མིང་རྟགས་འགོད་པ། གོ་ཆོད་པ། ལག་བསྟར་བྱེད་པ་བཅས་ཀྱི་དུས་མཚམས་ཁག་ནང་འགག་རྩའི་ནུས་པ་བཏོན་པ་དང་ལེགས་སྐྱེས་གལ་ཆེན་ཕུལ་ཡོད། ང་ཚོས་གནམ་གཤིས་འགྱུར་ལྡོག་ཐད་གོང་འཕེལ་འགྲོ་བཞིན་པའི་རྒྱལ་ཁབ་བར་གྱི་མཉམ་ལས་ཟབ་ཏུ་བཏང་སྟེ། དར་རྒྱས་འགྲོ་འགོར་ཤོས་ཀྱི་རྒྱལ་ཁབ་དང་། ཨ་ཧྥེ་རི་ཁ་གླིང་རྒྱལ་ཁབ། གླིང་ཕྲན་ཆུང་ངུའི་རྒྱལ་ཁབ་སོགས་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་གནམ་གཤིས་འགྱུར་ལྡོག་ལ་ཁ་གཏད་གཅོག་པའི་ནུས་པ་ཆེ་རུ་གཏོང་རོགས་བྱས་ཡོད་ཅེས་གསུངས་ཡོད།

　　གནམ་གཤིས་འགྱུར་ལྡོག་ནི་གོ་ལ་ཧྲིལ་པོའི་རང་བཞིན་གྱི་གནད་དོན་ཞིག་ཡིན་པས། ཀྲུང་གོའི་འཐུས་མི་ཚོགས་པས་དགེ་མཚན་ལྡན་པའི་ནུས་པ་འདོན་སྤེལ་བྱས་ཏེ་ཀྲུའུ་ཞིའི་རྒྱལ་ཁབ་ཨ་སའེ་པའེ་ཅང་ལ་རྒྱབ་སྐྱོར་བྱེད་པ་དང་། ཆིངས་ཡིག་འཇོག་མཁན་ཕྱོགས་གཞན་དག་དང་མཉམ་དུ《སྤྱི་ཆིངས》་ལ་བརྩི་སྲུང་དང《ཕ་རི་སིའི་གྲོས་ཆོད》ལ་དབང་ཆ་སྤྲོད་རྒྱུར་སྐུལ་འདེད་བཏང་ནས། ད་ཐེངས་ཀྱི་ཚོགས་ཆེན་ལ་དགེ་མཚན་ལྡན་ལ་དོ་སྙོམས་ཀྱི་གྲུབ་འབྲས་ཐོབ་རྒྱུར་སྐུལ་འདེད་གཏོང་རྒྱུ་ཡིན་པ་རེད།

　　ཞ་དབྱིང་ཞན་གྱིས། ད་ཐེངས་ཀྱི་ཚོགས་ཆེན་གྱིས《སྤྱི་ཆིངས》དང《ཕ་རི་སིའི་གྲོས་ཆོད》ཀྱི་དམིགས་ཚད་དང་། རྩ་དོན། བཀོད་སྒྲིག་བཅས་མཐའ་འཁྱོངས་བྱེད་པ་དང་འབྲེལ་དོན་འཁྱོལ་བྱས་ནས། གོ་ལ་ཧྲིལ་པོའི་སྦགས་མེད་ཐཱན་ཉུང་དང་གནམ་གཤིས་ཀྱི་ལྡེམ་ཤུགས་བརྗེ་སྒྱུར་དང་གསར་གཏོད་ལ་རྒྱུན་མཐུད་ངང་སྐུལ་འདེད་གཏོང་རྒྱུའི་རེ་བ་བྱེ་ཀྱི་ཡོད། ཀྲུང་གོ་ཕྱོགས་ཀྱིས་དགེ་མཚན་ལྡན་པའི་ནུས་པ་མུ་མཐུད་འདོན་སྤེལ་བྱེད་པ་དང་། ཕྱོགས་ཁག་དང་མཉམ་དུ་ཡོངས་བསྒྲགས་ཁ་གསལ་དང་། རྒྱ་ཁྱབ་ངང་ཞུགས་པ། གྲོས་མོལ་གཅིག་མཐུན། ཆིངས་ཡིག་འཇོག་མཁན་གྱིས་སྐུལ་འདེད་གཏོང་བ་བཅས་ཀྱི་རྩ་དོན་གཞིར་བཟུང་། 《མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་སྒྲོམ་གཞིའི་སྤྱི་ཆིངས》ཀྱི་ཆིངས་ཡིག་འཇོག་མཁན་ཕྱོགས་ཀྱི་ཚོགས་ཆེན་ཐེངས་ཉེར་དགུ་པར（COP29）དགེ་མཚན་ལྡན་པའི་གྲུབ་འབྲས་ཐོབ་རྒྱུར་སྐུལ་འདེད་གཏོང་འདོད་ཡོད་ཅེས་གསུངས་འདུག