འདི་ག་ལས་ཁུངས་ནས་སྤེལ་བའི་གནས་ཚུལ། སྐབས་17པའི་དབྱར་དུས་དབང་པོ་སྐྱོན་ཅན་གྱི་ཨོ་ལིམ་ཕིག་ལུས་རྩལ་འགྲན་ཚོགས་ཀྱི་མཇུག་འགྲིལ་མཛད་སྒོ་པེ་ཅིང་གི་དུས་ཚོད་ཚེས་9ཉིན་གྱི་ཐོ་རེངས་ཧྥ་རན་སིའི་ཕ་རི་སིར་སྤེལ་བ་རེད། ཀྲུང་གོའི་ལུས་རྩལ་འཐུས་མི་ཚོགས་པས་སྐབས་འདིའི་དབང་པོ་སྐྱོན་ཅན་ཨོ་རྩལ་འགྲན་ཚོགས་ཐོག་གསེར་གྱི་རྟགས་མ་94དང་། དངུལ་གྱི་རྟགས་མ་76། ཟངས་ཀྱི་རྟགས་མ་50། ཁྱོན་བསྡོམས་རྟགས་མ་220བླངས་ནས། སྐབས་དྲུག་བསྟུད་མར་དབང་པོ་སྐྱོན་ཅན་ཨོ་རྩལ་འགྲན་ཚོགས་ཀྱི་གསེར་གྱི་རྟགས་མའི་བང་གྲལ་དང་རྟགས་མའི་བང་གྲལ་གྱི་ཨང་དང་པོ་བླངས་ཡོད།

　　སྐབས་འདིའི་དབང་པོ་སྐྱོན་ཅན་ཨོ་རྩལ་འགྲན་ཚོགས་ཐོག ཀྲུང་གོའི་དབང་པོ་སྐྱོན་ཅན་གྱི་ལུས་རྩལ་པས་དཀའ་སྤྱད་འབད་འཐབ་དང་། དཔར་ངར་ཆེར་སྐྱེད་ཀྱིས་སྔོན་ཐོན་བརྩོན་ལེན་བྱས་ཏེ་འགྲན་བསྡུར་གྱི་སྦྱངས་འབྲས་དང་བསམ་པའི་དཔལ་ཡོན་གྱི་གྲུབ་འབྲས་བླངས་ཡོད། ཆུ་རྐྱལ་དང་། མཆོང་རྒྱུག་འཕེན་གསུམ། འཁོར་སྟེགས་གྲི་རྩེད། ཕིང་ཕང་སྤོ་ལོ། ལྗིད་འདེགས་སོགས་ཀྲུང་གོའི་ལུས་རྩལ་རུ་ཁག་གི་བཟང་ཆའི་རྣམ་གྲངས་སུ་གྱུར་བ་དང་། རྣམ་གྲངས་མི་ཉུང་བ་ཞིག་རྒྱལ་སྤྱིའི་དབང་པོ་སྐྱོན་ཅན་ཨོ་རྩལ་འགྲན་ཚོགས་ཀྱི་འགྲན་ཟླ་བྲལ་བའི་ཚད་ལ་སླེབས་ཡོད།

　　སྐབས་འདིའི་དབང་པོ་སྐྱོན་ཅན་ཨོ་རྩལ་འགྲན་ཚོགས་ཀྱི་ཆུ་རྐྱལ་འགྲན་བསྡུར་ནང་། ཀྲུང་གོའི་རུ་ཁག་གིས་གསེར་གྱི་རྟགས་མ་22དང་དངུལ་གྱི་རྟགས་མ་21ཟངས་ཀྱི་རྟགས་མ་11བཅས་ཁྱོན་བསྡོམས་རྟགས་མ་54བླངས་ཡོད་པ་དང་། རྣམ་གྲངས་བཅུའི་འཛམ་གླིང་གི་ཟིན་ཐོ་10བཏོད་ཡོད། དབང་པོ་སྐྱོན་ཅན་ཨོ་རྩལ་འགྲན་ཚོགས་ཀྱི་མཆོང་རྒྱུག་འཕེན་གསུམ་གྱི་འགྲན་རའི་ཐོག ཀྲུང་གོའི་རུ་ཁག་གིས་གསེར་གྱི་རྟགས་མ་21དང་དངུལ་གྱི་རྟགས་མ་22ཟངས་ཀྱི་རྟགས་མ་16བཅས་ཁྱོན་བསྡོམས་རྟགས་མ་59བླངས་ཏེ། རྟགས་མ་ཐོབ་ཚད་ཨང་དང་པོར་སླེབས་ཡོད་པ་མ་ཟད་རྣམ་གྲངས་མང་པོ་ཞིག་གི་ནང་འཛམ་གླིང་གི་ཟིན་ཐོ་བཏོད་ཡོད། དེའི་ཁྲོད་མཇུག་འགྲིལ་མཛད་སྒོའི་ཐོག་ཀྲུང་གོའི་ལུས་རྩལ་འཐུས་མི་ཚོགས་པའི་དར་ཆ་འཁྱེར་མཁན་ཏི་ཏུང་ཏུང་གིས་སྐྱེས་པའི་རྒྱང་མཆོང་T11རིམ་པའི་འགྲན་བསྡུར་ནང་གསེར་གྱི་རྟགས་མ་བླངས་ཡོད་པ་དང་། ཨ་རིའི་ལུས་རྩལ་པས་ལོ་བཅུ་ཡི་རིང་རྒྱུན་འཁྱོངས་བྱས་པའི་འཛམ་གླིང་ཟིན་ཐོ་བཏོད་ཡོད།

　　སྐབས་འདིའི་དབང་པོ་སྐྱོན་ཅན་ཨོ་རྩལ་འགྲན་ཚོགས་ཀྱི་འཁོར་སྟེགས་གྲི་རྩེད་ཀྱི་རྟགས་མ་16ཆ་ཚང་ནང་ཀྲུང་གོའི་རུ་ཁག་གིས་རྟགས་མ་10བླངས་ནས། རྟགས་མ་ཐོབ་ཚད་ཨང་དང་པོར་སླེབས་ཡོད། 2024ལོའི་ཕ་རི་སིའི་དབང་པོ་སྐྱོན་ཅན་ཨོ་རྩལ་འགྲན་ཚོགས་ཐོག ཀྲུང་གོའི་ལུས་རྩལ་འཐུས་མི་ཚོགས་པས་གཟེངས་སུ་ཐོན་པའི་རྩལ་འགྲན་གྱི་ཆུ་ཚད་དང་། བསམ་པའི་ཉམས་སྣང་བཟང་པོར་ཕྱོགས་མང་པོའི་བསྔགས་བརྗོད་ཐོབ་ནས། བློ་སྟོབས་དང་། ཆོད་སེམས། སྐུལ་ལྕག འདྲ་མཉམ་བཅས་ཀྱི་དབང་པོ་སྐྱོན་ཅན་ཨོ་རྩལ་འགྲན་ཚོགས་ཀྱི་རིན་ཐང་ལྟ་བ་གསལ་འགྲེལ་ཡག་པོ་བྱས་ཡོད། ཀྲུང་གོའི་དབང་པོ་སྐྱོན་ཅན་གྱི་ལུས་རྩལ་དང་དབང་པོ་སྐྱོན་ཅན་བྱ་གཞག་གི་གོང་འཕེལ་གྲུབ་འབྲས་དེ་སླར་ཡང་འཛམ་གླིང་སྐྱེ་བོ་ཀུན་གྱི་མཐོང་ཆོས་སུ་གྱུར་ཡོད།