འདི་ག་ལས་ཁུངས་ནས་སྤེལ་བའི་གནས་ཚུལ།    ཨུ་རུ་སུའི་རྒྱལ་སྲུང་པུས་ཚེས་14ཉིན་གནས་ཚུལ་སྤེལ་ནས། ཨུ་རུ་སུའི་དམག་གིས་ཁུའར་སེ་ཁེ་མངའ་སྡེའི་མཐའ་མཚམས་ས་ཁུལ་དུ་ཡུག་རེན་དམག་གི་ཚུར་རྒོལ་ཐེངས་དྲུག་་ཕྱིར་སློག་བཏང་པ་ཡིན་ཞེས་བརྗོད་ཡོད། ཡུག་རེན་ཕྱོགས་ནས། ཡུག་རེན་དམག་གིས་ཨུ་རུ་སུའི་ཁུའར་སེ་ཁེ་མངའ་སྡེའི་ས་ཆ་སྤྱི་ལེ་གྲུ་བཞི་མ་1097ཚོད་འཛིན་བྱས་ཟིན་ཞེས་བརྗོད་ཡོད། ཁུའར་སེ་ཁེ་མངའ་སྡེའི་འགྲམ་དུ་གནས་པའི་མཐའ་མཚམས་མངའ་སྡེ་སྟེ་པེའར་ཀེ་ལུའོ་ཏེ་མངའ་སྡེས་ཚེས་14ཉིན་ཛ་དྲག་དུས་བབ་ཏུ་སླེབས་པ་ཁྱབ་བསྒྲགས་བྱས་ཡོད།

　　  ཚེས་14ཉིན། ཨུ་རུ་སུའི་པེའར་ཀོ་ལུའོ་ཏེ་མངའ་སྡེའི་འགོ་འཛིན་གྱིས། མངའ་སྡེ་དེ་ས་ཁུལ་རིམ་པའི་ཛ་དྲག་དུས་བབ་ཏུ་སླེབས་པ་ཁྱབ་བསྒྲགས་བྱས་པ་མ་ཟད། མངའ་སྡེ་དེ་རྒྱལ་ཕྲན་མཉམ་འབྲེལ་རིམ་པའི་ཛ་དྲག་དུས་བབ་ཏུ་སླེབས་པ་གཏན་འཁེལ་བྱ་རྒྱུར་སྐུལ་འདེད་གཏོང་རྩིས་ཡོད་ཅེས་དང་།  ཀེ་ལ་ཏེ་ཁེ་ཧྥུ་ཡིས། ཡུག་རེན་དམག་གིས་ཉིན་ལྟར་མང་ཚོགས་ལ་འཇབ་རྒོལ་བྱས་པས། ས་གནས་དེ་གའི་ཁང་པར་གཏོར་སྐྱོན་ཕོག་པ་མ་ཟད། མི་སྣ་འཆི་རྨས་ཀྱང་བྱུང་འདུག་ཅེས་བརྗོད་ཡོད། ཨུ་རུ་སུའི་ཕྱི་འབྲེལ་པུའི་མགྲིན་ཚབ་པ་ཀྲ་ཧ་ལུའོ་ཝ་ཡིས་ཚེས་14ཉིན། ཡུག་རེན་དམག་གིས་ཁུའར་སེ་ཁེ་མངའ་སྡེར་འཇིགས་སྐུལ་འཇབ་རྒོལ་བྱས་པ་དེས། ཕྱོགས་གཉིས་པོའི་དབར་ཞི་བའི་གྲོས་མོལ་བྱ་རྒྱུ་དེ་ཡུན་རིན་མཚམས་འཇོག་བྱེད་དགོས་པར་འགྱུར་ཡོད་ཅེས་བརྗོད་ཡོད།

　　  ཡུག་རེན་གྱི་ཙུང་ཐུང་ཙེ་ལན་སི་ཅེས་ཚེས་14ཉིན་གྱི་དགོང་མོ་འཆར་ཅན་གྱི་བརྙན་མཐོང་གཏམ་བཤད་སྤེལ་སྐབས། ཡུག་རེན་དམག་གིས་ཉིན་དེར་ཁུའར་སེ་ཁེ་ས་ཁུལ་དུ་དམག་དོན་བྱ་སྤྱོད་ཡག་པོ་སྤེལ་ཐུབ་ཡོད་ཅིང་། འཐབ་ཇུས་དམིགས་འབེན་མངོན་འགྱུར་ཡོང་བཞིན་ཡོད་ཅེས་བརྗོད་ཡོད། དེའི་གོང་ཙེ་ལན་སི་ཅེས། ཡུག་རེན་དམག་གིས་ཉིན་དེར་ཁུའར་སེ་ཁེའི་ས་ཁུལ་མི་འདྲ་བར་དཔུང་འཇུག་སྤྱི་ལེ་1ནས་2བར་བྱས་པ་མ་ཟད། ཨུ་རུ་སུའི་དམག་མི་100ལྷག་འཛིན་བཟུང་བྱས་ཡོད་ཅེས་བརྗོད་ཡོད།

　　  ཡུག་རེན་དྲག་ཆས་དཔུང་སྡེའི་སྤྱི་ཁྱབ་དམག་སྤྱི་སེའར་སེ་ཅེ་ཡིས་ཚེས་14ཉིན་ཙེ་ལན་སེ་ཅེ་ལ་འཐབ་ས་མདུན་མའི་ཁ་ཕྱོགས་གཙོ་བོའི་བྱ་སྤྱོད་ཀྱི་གནས་ཚུལ་སྙན་སེང་ཞུས་ཡོད། སེའར་སེ་ཅེ་ཡིས། ཡུག་རེན་དམག་གིས་ཁུའར་སེ་ཁེའི་ཕྱོགས་སུ་ས་ཆ་སྤྱི་ལེ་གྲུ་བཞི་མ་1097བཟུང་ཡོད་ཅེས་བརྗོད་ཡོད། སེའར་སེ་ཅེ་ཡིས་ད་དུང་། ཨུ་རུ་སུའི་ཁུའར་སེ་ཁེ་མངའ་སྡེའི་སུའུ་ཅ་ས་ཁུལ་དུ་ཡོད་པའི་ཨུ་རུ་སུའི་དམག་མི་ལྷག་འཕྲོ་འཚོལ་བཤེར་དང་རྩ་མེད་གཏོང་བའི་ལས་དོན་གྲུབ་ཟིན་ཡོད་ཅེས་བརྗོད་ཡོད། སུའུ་ཅ་ས་ཁུལ་ནི་ཨུ་རུ་སུ་དང་ཡུག་རེན་གྱི་མཐའ་མཚམས་ནས་བརཐག་སྤྱི་ལེ་10འི་སར་གནས་ཡོད་པ་དང་། ཨུ་རུ་སུས་ཡོ་རོབ་ལ་མཁོ་འདོན་བྱེད་པའི་རང་བྱུང་སོལ་རླངས་ཀྱི་སྦུག་ལམ་མཐའ་མ་དེ་གནས་དེ་ནས་རྒྱུད་དགོས་ཀྱི་ཡོད། ཉིན་དེའི་སྔ་ཙམ་དུ། ཨུ་རུ་སུའི་ཨ་ཧེ་མ་ཐེ་དམིགས་བསལ་དཔུང་སྡེའི་བཀོད་འདོམས་དཔོན་ཨ་ལའོ་ཏེ་ནོ་ཧྥུ་ཡིས་དེའི་གོང་། ཡུག་རེན་དམག་གིས་སུའུ་ཅ་བཟུང་མེད་ཅེས་བརྗོད་ཡོད།

　　ཨུ་རུ་སུའི་རྒྱལ་སྲུང་པུས་ཉིན་དེར་སྤེལ་བའི་དམག་འཐབ་ཆ་འཕྲིན་ལ་གཞིགས་ན། ཨུ་རུ་སུའི་དམག་གིས་ཁུའར་སེ་ཁེ་མངའ་སྡེའི་མཐའ་མཚམས་ས་ཁུལ་དུ་ཡུག་རེན་དམག་གི་ཚུར་རྒོལ་ཐེངས་དྲུག་་ཕྱིར་སློག་བཏང་པ་ཡོད། ཨུ་རུ་སུའི་མཁའ་དམག་གིས་ཨུ་སུའུ་མེ་མངའ་སྡེའི་གཏན་སྡོད་ཁུལ་མང་པོའི་ཡུག་རེན་དམག་གི་གྲ་སྒྲིག་དཔུང་སྡེར་མཁའ་ཐོག་ནས་འཇབ་རྒོལ་བྱས་ཡོད་པ་རེད། ས་ཁྲ་ལས་མངོན་པར།  སུའུ་མེ་ནས་སུའུ་ཅ་དབར་རླངས་འཁོར་ནང་སྡད་ཚེ་སྤྱི་ལེ་60ལྷག་བསྐྱོད་དགོས་ཀྱི་ཡོད།  དམག་འཐབ་གནས་ཚུལ་ནང་། འདི་གར་ནི་ཡུག་རེན་དམག་གིས་ཨུ་རུ་སུའི་ཁུའར་སེ་ཁེ་མངའ་སྡེའི་ནང་འཛུལ་སྐབས་ངེས་པར་དུ་རྒྱུད་དགོས་པའི་ལམ་བུ་ཞིག་དང་དེ་བཞིན་ཅ་དངོས་གལ་ཆེན་སྐྱེལ་འདྲེན་བྱེད་པའི་བར་རྒྱུད་ས་ཆ་ཞིག་ཀྱང་ཡིན་པའི་ངོས་འཛིན་བྱས་ཡོད།

　　  གཞན་ད་དུང་། འཇར་མན་གྱི་སྨྱན་སྦྱོར་ཚན་པ་མང་པོས་ཚེས་14ཉིན་གནས་ཚུལ་སྤེལ་ནས། འཇར་མན་གྱི་ཞིབ་དཔྱོད་ལས་ཁུངས་ཀྱིས་འཛིན་བཟུང་བཀའ་རྒྱ་གཅིག་པོ་ལན་གྱི་ཞིབ་དཔྱོད་ལས་ཁུངས་ལ་སྤྲད་ཟིན་པ་དང་། དེའི་ནང་པོ་ལན་གྱིས། པོ་ལུའོ་ཏེ་རྒྱ་མཚོའི་པེ་ཞི་རང་བྱུང་སོལ་རླངས་སྦུག་ལམ་གཏོར་བའི་ནང་ཞུགས་པར་དོགས་པ་ཡོད་པའི་ཡུག་རེན་བར་ཞིག་འཛིན་བཟུང་བྱ་རྒྱུ་རེ་བ་བཏོན་ཡོད་པ་རེད།  ཡུག་རེན་བ་དེ་ནི་ཆུར་འཛུལ་རྩལ་སློབ་པ་ཞིག་ཡིན་པ་རེད། པོ་ལན་ཕྱོགས་ནས་དོན་དེའི་ཐད། འཇར་མན་གྱིས་འཛིན་བཟུང་བཀའ་རྒྱ་བཀྲམས་པའི་ཡུག་རེན་གྱི་དོགས་ཡོད་མི་སྣ་དེ་ཡུག་རེན་དུ་ལོག་ཟིན་འདུག་ཅེས་བརྗོད་ཡོད།