འདི་ག་ལས་ཁུངས་ནས་སྤེལ་བའི་གནས་ཚུལ། སྤྱི་ཚེས་10ཉིན། ལི་པི་ཡའི་ཤར་རྒྱུད་དུ་རྒྱ་མཚོའི་རླུང་འཚུབ་ཏན་ཉིའར་ལྡང་སྟེ་ཆུ་ལོག་གི་གནོད་འཚེ་ཚབས་ཆེན་ཐོན་ཡོད། རྒྱ་གྲམ་དམར་པོ་ཚོགས་པ་དང་ཟླ་གསར་དམར་པོ་ཚོགས་པའི་རྒྱལ་སྤྱིའི་མཉམ་འབྲེལ་ལྷན་ཚོགས་ཀྱིས་སྤྱི་ཚེས་12ཉིན། ལི་པི་ཡའི་ཤར་རྒྱུད་ཀྱི་ཆུ་ལོག་གནོད་འཚེའི་ཁྲོད་མི་5000ལྷག་རྐྱེན་ལམ་དུ་ཤོར་ཡོད་ཅེས་བསྟན་ཡོད།

གཞན་ཡང་སྒྲིག་འཛུགས་དེས་ལི་པི་ཡའི་རྒྱལ་ཁོངས་སུ་མི་ཁྲི་1ལ་ཉེ་བ་ཆུ་ལོག་གནོད་འཚེའི་ཁྲོད་གར་སོང་ཆ་མེད་དུ་གྱུར་ཤས་ཆེན་པོ་ཡོད་ཅེས་བསྟན་ཡོད།

མིག་སྔར། གནོད་འཚེ་ཕོག་ཚབས་ཆེ་བའི་ཁུལ་ཏེའར་ན་གྲོང་ཁྱེར་གྱི་གཞུང་ལམ་ཚང་མ་ཆུ་ལོག་གིས་གཏོར་སྐྱོན་བཟོས་པ་དང་། རོགས་སྐྱོབ་བྱེད་མཁན་དེ་གར་འབྱོར་རྒྱུར་དཀའ་ཚེགས་འཕྲད་པས། མིག་སྔར་གནོད་སེལ་གྱི་ལས་དོན་སྒྲུབ་པར་དཀའ་ངལ་དུ་མ་འཕྲད་བཞིན་ཡོད་པ་རེད།

མི་རིགས་མཐུན་སྒྲིལ་སྲིད་གཞུང་གི་ཙུང་ལི་ཏེ་པེ་པས་སྤྱི་ཚེས་12ཉིན། ཤར་རྒྱུད་ཀྱི་གནོད་འཚེའི་ཁུལ་དུ་ནུས་ཤུགས་ཡོད་རྒུས་རོགས་རམ་བྱ་རྒྱུའི་གྲ་སྒྲིག་བྱས་ཟིན་པ་ཁྱབ་བསྒྲགས་བྱས་ཡོད། དེའི་གོང་། དངོས་ཟོག་དང་། སྨན་རྫས། སྒྲིག་ཆས་བཅས་ཏུན་14དང་སྨན་དོན་མི་སྣ་87བླུགས་པའི་གནམ་གྲུ་ཞིག་ལེ་པོ་ལི་ནས་རྡོག་ཐོན་བྱས་ཏེ་པན་ཅ་ཞི་རུ་འཕུར་ཡོད་པ་རེད།

ལི་པི་ཡའི་མྱུར་སྐྱོབ་དང་འཕྲལ་སྒྲུབ་ལྟེ་གནས་ཀྱིས། སྨན་བཅོས་དངོས་རྫས་བླུགས་པའི་གྲུ་གཟིངས་ཤིག་ལི་པོ་ལི་ནས་ཏེ་འར་ནའི་ཕྱོགས་སུ་བཏང་ཡོད་ཅེས་བསྟན་ཡོད། ཨེ་ལྕེབ་ཀྱི་དམག་སྤྱོད་སྐྱེལ་འདྲེན་གནམ་གྲུ་3སྨན་བཅོས་དངོས་རྫས་དང་ཟས་རིགས་དེ་བཞིན་རོགས་སྐྱོབ་རུ་མི་25དང་སྒྲིག་ཆས་བཅས་བླུགས་ནས་ལི་པི་ཡར་འབྱོར་ཡོད་ཅེས་བསྟན་ཡོད།

མཉམ་འབྲེལ་རྒྱལ་ཚོགས་ཀྱི་དཔོན་རིགས་ཀྱིས། རོགས་སྐྱོབ་ཀྱི་ལས་དོན་སྤེལ་བར་སྒྲིག་ཆས་མང་པོ་ཞིག་འཕྲལ་དུ་མཁོ་ཡི་ཡོད། མིག་སྔར་རོགས་སྐྱོབ་ཀྱི་ལས་དོན་མུ་མཐུད་སྒྲུབ་མུས་ཡིན་པ་དང་། འཚོལ་སྐྱོབ་ཀྱི་ལས་དོན་དེ་རྐྱེན་ལམ་དུ་ཤོར་བའི་མི་སྣའི་ཕུང་པོ་ཚང་མ་མ་རྙེད་པའི་བར་སྒྲུབ་རྒྱུ་རེད་ཅེས་གསུངས་ཡོད།

སྤྱི་ཚེས་11ཉིན། ལི་པི་ཡའི་ཙུང་ཐུང་ཨུ་ཡོན་ལྷན་ཁང་གི་ཀྲུའུ་ཞི་མན་ཧྥེ་ཡིས་སྤྱི་ཚོགས་འབྲེལ་བའི་སྨྱན་སྦྱོར་ཐོག ལི་པི་ཡའི་ཤར་རྒྱུད་གྲོང་ཁྱེར་ཏེ་འར་ན་དང་། པེ་ཏ། ཧྲེ་ཧ་ཐེ་བཅས་གནོད་འཚེའི་ཁུལ་ལ་རྒྱལ་སྤྱིའི་སྤྱི་ཚོགས་ཀྱིས་རོགས་སྐྱོབ་དང་རྒྱབ་སྐྱོར་བྱ་རྒྱུའི་རེ་འབོད་གནང་ཡོད།

ལི་པི་ཡའི་མི་རིགས་མཐུན་སྒྲིལ་སྲིད་གཞུང་གིས་དེ་ཉིན་རྒྱལ་ཡོངས་ནས་ཉིན་གསུམ་རིང་མྱ་ངན་ཞུ་རྒྱུའི་ཁྱབ་བསྒྲགས་བྱས་ཡོད།

ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།