རང་རྒྱལ་གྱིས་སྤྱི་ལོ་༢༠༣༥ལོར་སླེབས་སྐབས་ཐོན་རྗེས་མའི་བྱང་སྐར་སྤུན་བདུན་སྲུང་སྐར་ཕྱོགས་སྟོན་མ་ལག་འཛུགས་སྐྲུན་ལེགས་གྲུབ་བྱ་རྒྱུའི་འཆར་གཞི་ཡོད་པ།
2024-11-29 14:49:00 责编：卓玛才让
འདི་ག་ལས་ཁུངས་ནས་སྤེལ་བའི་གནས་ཚུལ། སྤྱི་ཚེས་༢༨ཉིན་ཀྲུང་གོ་སྲུང་སྐར་ཕྱོགས་སྟོན་མ་ལག་དོ་དམ་གཞུང་དོན་ཁང་གིས་ཁྱབ་བསྒྲགས་བྱས་པའི་༼བྱང་སྐར་སྤུན་བདུན་ཕྱོགས་སྟོན་མ་ལག་གི་སྤྱི་ལོ་༢༠༣༥ལོའི་གོང་གི་གོང་འཕེལ་འཆར་འགོད་༽ལས་མངོན་པར་གཞིགས་ན། བྱང་སྐར་སྤུན་བདུན་སྲུང་སྐར་མ་ལག་གསུམ་པ་འཁོར་སྐྱོད་བརྟན་པོ་ཡོང་བའི་རྨང་གཞི་འགན་ལེན་བྱེད་པའི་ཐོག་རང་རྒྱལ་གྱིས་སྤྱི་ལོ་༢༠༣༥ལོར་ཐོན་རྗེས་མའི་ལག་རྩལ་སྔར་བས་སྔོན་ཐོན་དང་། ནུས་པ་སྔར་བས་ཆེ་བ། ཞབས་ཞུ་སྔར་བས་སྤུས་ལེགས་བཅས་ཀྱི་བྱང་སྐར་སྤུན་བདུན་སྲུང་སྐར་ཕྱོགས་སྟོན་མ་ལག་འཛུགས་སྐྲུན་ལེགས་སྒྲུབ་བྱ་རྩིས་ཡོད།
༼གནད་སྨིན་ཡིད་རྟོན་རུང་བ་དང་། སྦྲེལ་མཐུད་ཐུབ་པ། རིག་ནུས་ཅན། དྲ་རྒྱ་ཅན། མཉེན་གཤིས་ཅན་༽བཅས་ནི་ཐོན་རྗེས་མའི་བྱང་སྐར་སྤུན་བདུན་མ་ལག་གི་ཁྱད་ཆོས་ཤིག་ཡིན་པ་དང་། མ་ལག་དེས་གོ་ལ་ཧྲིལ་པོའི་སྤྱོད་མཁན་དང་གནས་གཏན་འཁེལ་གྱི་ཕྱོགས་སྟོན་མ་ལག་གཞན་དག་ལ་ས་ངོས་སུ་ཁྱབ་པའི་བར་ཁམས་དང་དེ་བཞིན་ས་ངོས་དང་བར་ཐག་ཉེ་སའི་བར་ཁམས་ཀྱི་རྨིད་རིམ་པ་ནས་ཧྥེན་རྨིད་རིམ་པའི་བར་དུ་དུས་ཐོག་གནད་འཁེལ་དང་ཆ་ཚང་བའི་ཕྱོགས་སྟོན་གནས་གཏན་འཁེལ་གྱི་དུས་སྤྲོད་ཞབས་ཞུ་མཁོ་འདོན་བྱ་རྒྱུ་རེད། ཀྲུང་གོ་མཁའ་སྐྱོད་ཚན་རྩལ་ཚོགས་པ་ཚད་ཡོད་ཀུང་སིའི་ཞིབ་འཇུག་པ། བྱང་སྐར་སྤུན་བདུན་སྲུང་སྐར་ཕྱོགས་སྟོན་མ་ལག་ལས་གྲྭའི་སྤྱི་ཁྱབ་ཇུས་འགོད་གཞོན་པ་ཞེ་ཅུན་གྱིས། ང་ཚོའི་ཐོན་རྗེས་མའི་བྱང་སྐར་སྤུན་བདུན་གྱིས་ཡིད་རྟོན་རུང་བའི་གནད་དོན་དེ་ཐག་གཅོད་བྱས་ཏེ། སྤྱོད་མཁན་རྣམས་ལ་བྱང་སྐར་སྤུན་བདུན་གྱིས་མཁོ་འདོན་བྱས་པའི་གྲངས་གཞི་དེར་སྐྱོན་གང་ཡང་མེད་པར་ཡིད་ཆེས་ཐོབ་ཚད་༡༠༠%སླེབས་པ་བྱ་རྒྱུ་ཡིན། ཐོན་རྗེས་མ་འཛུགས་སྐྲུན་ཡག་པོ་བྱས་རྗེས་ཞབས་ཞུའི་ཞིབ་ཚད་སྨི་གཅིག་ལས་ཡག་པ་ཡོང་རྒྱུ་དང་། བསྡུ་ལེན་ངེས་གནས་ཀྱི་ཕན་འབྲས་དང་དུས་སྤྲོད་ཀྱི་ཞིབ་ཚད་ཧ་ཅང་ཡག་པོ་ཡོང་རྒྱུ་རེད་ཅེས་གསུངས་འདུག
ཐོན་རྗེས་མའི་བྱང་སྐར་སྤུན་བདུན་མ་ལག་གིས་སྐར་ཁྱིམ་གྱི་སྒྲོམ་གཞི་ལེགས་སུ་བཏང་ནས། འཁོར་ལམ་མཐོ་འབྲིང་དམའ་གསུམ་མཉམ་བསྲེས་ཀྱི་སྐར་ཁྱིམ་གྲུབ་པར་བྱ་རྒྱུ་དང་། ས་ངོས་གཏིང་རིང་ལ་ཁྱབ་པའི་རིགས་ཁག་གི་སྤྱོད་མཁན་གྱི་མཐའ་སྣེ། དེ་བཞིན་སྲུང་སྐར་ལ་བརྟེན་མི་དགོས་པར་གནས་གཏན་འཁེལ་གྱི་ཕྱོགས་སྟོན་དུས་སྤྲོད་བྱ་ཐབས་དང་མཉམ་འདྲེས་ཀྱི་རིགས་ཁག་གི་སྤྱོད་མཁན་གྱི་མཐའ་སྣེ་བཅས་ཆགས་པར་བྱས་ཏེ། སྤྱོད་མཁན་གྱིས་ཁོར་ཡུག་མི་འདྲ་བ་མང་པོའི་ནང་རིག་ནུས་ཅན་གྱི་ཐོག་ནས་སྤྱོད་ཐུབ་པ་བྱ་རྒྱུ་རེད། བྱང་སྐར་སྤུན་བདུན་ཕྱོགས་སྟོན་མ་ལག་ལས་གྲྭའི་སྤྱི་ཁྱབ་ཇུས་འགོད་པ། ཀྲུང་གོ་བཟོ་སྐྲུན་ཁང་གི་ཡོན་ཧྲེ་ཡང་ཁྲང་ཧྥེང་གིས། ང་ཚོས་སྤྱི་ལོ་༢༠༣༥ལོར་སླེབས་སྐབས་དེ་བས་མཉམ་འདྲེས་དང་དེ་བས་རིག་ནུས་ལྡན་པའི་རྒྱལ་ཁབ་ཀྱི་ཕྱོགས་བསྡུས་འཛུགས་སྐྲུན་མ་ལག་གི་སྤྱིའི་དམིགས་ཚད་འདི་འདྲ་ཞིག་བསྒྲུབ་ཐུབ་པར་བྱས་ཏེ། དེ་བས་རིག་ནུས་ཅན་དང་། མཉེན་གཤིས་ཅན། དྲ་རྒྱ་ཅན་བཅས་ཀྱི་མ་ལག་མངོན་འགྱུར་ཐུབ་པ་བྱ་རྒྱུ་རེད་ཅེས་གསུངས་ཡོད།
རང་རྒྱལ་གྱིས་སྤྱི་ལོ་༢༠༣༥ལོར་ཐོན་རྗེས་མའི་བྱང་སྐར་སྤུན་བདུན་མ་ལག་གི་འགག་རྩའི་ལག་རྩལ་འགག་སྒྲོལ་ལེགས་སྒྲུབ་ཐུབ་པ་བྱ་རྒྱུ་དང་། སྤྱི་ལོ་༢༠༢༧ལོའི་གཡས་གཡོན་དུ་སྔོན་ཁྲིད་ཚོད་ལྟའི་སྲུང་སྐར་གསུམ་འཕེན་གཏོང་ཐུབ་པ་དང་ཐོན་རྗེས་མའི་ལག་རྩལ་དང་སྒྲིག་སྲོལ་གྱི་ཚོད་ལྟ་བྱེད་ཐུབ་པ་བྱ་རྒྱུ། སྤྱི་ལོ་༢༠༢༩ལོའི་གཡས་གཡོན་དུ་ཐོན་རྗེས་མའི་བྱང་སྐར་སྤུན་བདུན་མ་ལག་གི་དྲ་རྒྱ་ཚོགས་ཆུང་གི་སྲུང་སྐར་འཕེན་གཏོང་ཐུབ་པ་བྱ་རྒྱུ། སྤྱི་ལོ་༢༠༣༥ལོར་ཐོན་རྗེས་མའི་བྱང་སྐར་སྤུན་བདུན་མ་ལག་འཛུགས་སྐྲུན་ཐུབ་པ་བྱ་རྒྱུ་བཅས་རེད།
