རྒྱལ་ཁབ་སྨན་བཅོས་འགན་བཅོལ་གྱི་དཀར་ཆག་ལེགས་སྒྲིག་བྱས་པ་དང་སྨན་རྫས་རིགས་91གསར་དུ་སྣོན་པ།
2024-11-29 14:49:00 责编：卓玛才让
འདི་ག་ལས་ཁུངས་ནས་སྤེལ་བའི་གནས་ཚུལ། ཟླ་11པའི་ཚེས་28ཉིན། རྒྱལ་ཁབ་སྨན་བཅོས་འགན་བཅོལ་ཅུས་ཀྱིས་གསར་འགྱུར་ཡོངས་བསྒྲགས་ཚོགས་འདུ་འཚོགས་ནས། 2024ལོའི་རྒྱལ་ཁབ་སྨན་བཅོས་འགན་བཅོལ་གྱི་དཀར་ཆག་ལེགས་སྒྲིག་བྱས་པའི་མཇུག་འབྲས་ཡོངས་བསྒྲགས་བྱས་ཡོད་པ་དང་། ད་ལོ་ལེགས་སྒྲིག་བྱས་རྗེས་སྨན་རྫས་རིགས་91གསར་སྣོན་བྱས་ཡོད་པ་རེད།
རྒྱལ་ཁབ་སྨན་བཅོས་འགན་བཅོལ་གྱི་དཀར་ཆག་གསར་པའི་ནང་ཁྱོན་སྨན་རྫས་རིགས་3159ཡོད་པ་དང་། དེའི་ཁྲོད་ཕྱི་ལུགས་སྨན་རིགས་1765དང་། ཀྲུང་ལུགས་སྨན་རིགས་1394ཡོད་པ་རེད། 2024ལོའི་སྨན་བཅོས་འགན་བཅོལ་གྱི་དཀར་ཆག་ལེགས་སྒྲིག་དེ་གཙོ་བོ་ཉེ་བའི་ལོ་5ཡི་ནང་གསར་དུ་ཁྲོམ་རར་བཏོན་པའམ་གསལ་བཤད་ཡི་གེ་བཟོ་བཅོས་བྱས་པའི་སྨན་རྫས་དང་། མཐོང་དཀོན་ནད་ཀྱི་ཐད་སྤྱོད་པའི་སྨན། རྒྱལ་ཁབ་ཀྱིས་ཞིབ་བཟོར་སྐུལ་མ་གཏོང་བའི་བྱིས་པའི་སྨན། འདྲ་བཟོས་སྨན། དེ་བཞིན་རྒྱལ་ཁབ་ཀྱི་གཞི་རྩའི་སྨན་རྫས་སོགས་ལ་གཅིག་བསྡུས་བྱས་ཡོད། འབྲེལ་ཡོད་ཀྱི་གོ་རིམ་བརྒྱུད། ཐེངས་འདིའི་ལེགས་སྒྲིག་ནང་སྨན་རྫས་རིགས་91གསར་སྣོན་བྱས་ཡོད་པ་དང་། དེ་དག་སྐྲན་ནད་དང་གཅིག་པ་མངར་འགྱུར་སོགས་ཀྱི་གཅོང་ནད་དང་། མཐོང་དཀོན་པའི་ནད། གཉན་འཇོམས་སྨན། ཀྲུང་ལུགས་སྨན། ཁྱབ་ཁོངས་གཞན་གྱི་ཐད་སྤྱོད་པའི་སྨན་བཅས་ཚུད་ཡོད། དེ་དང་དུས་མཚུངས། ནད་ཐོག་ཏུ་ཚབ་བྱས་ཟིན་པའམ་ཡུན་རིང་ཐོན་སྐྱེད་དང་མཁོ་འདོན་བྱས་མེད་པའི་སྨན་རྫས་རིགས་43དཀར་ཆག་ནས་བཏོན་ཡོད་པ་རེད།
ད་ལོ་ནི་རྒྱལ་ཁབ་སྨན་བཅོས་འགན་བཅོལ་ཅུས་བཙུགས་ཚུན་ལོ་བདུན་བསྟུད་མར་དཀའ་ཆག་ལེགས་སྒྲིག་བྱས་པ་ཞིག་ཡིན་པ་དང་། སྨན་གསར་པ་དཀར་ཆག་ནང་འཇུག་པའི་མྱུར་ཚད་ཟམ་མི་ཆད་པར་མགྱོགས་སུ་འགྲོ་བ་དང་། རེ་སྐོར་བདུན་ལེགས་སྒྲིག་བྱས་པའི་ནང་རིམ་རྩིས་བྱས་ན་གསར་གཏོད་སྨན་རྫས་རིགས་149སྨན་བཅོས་འགན་བཅོལ་གྱི་དཀར་ཆག་ནང་བཅུག་ཡོད། སྨན་བཅོས་འགན་བཅོལ་ཐེབས་རྩས་གྲོས་ཆོད་དུས་ཡུན་ནང་གི་དབྱེ་འབྱེད་གྲོས་མོལ་བྱས་པའི་སྨན་རྫས་ཐད་རིམ་རྩིས་བྱས་ན་སྒོར་དུང་ཕྱུར་3500ལས་བརྒལ་བ་གཏོང་སྤྲོད་བྱས་ཡོད་ཅིང་། མི་ཐེངས་དུང་ཕྱུར་8.3ལ་ཕན་པ་བསྐྲུན་ཡོད་པ་རེད།
