འདི་ག་ལས་ཁུངས་ནས་གནས་ཚུལ་སྤེལ་གསལ། སྐབས་གཉིས་པའི་ཀྲུང་གོའི་རྒྱལ་སྤྱིའི་མཁོ་སྤྲོད་སྦྲེལ་ཐག་ལ་སྐུལ་སྤེལ་གཏོང་བའི་འགྲེམས་ཚོགས་ཀྱིས་སྤྱི་ཚེས་26ཉིན་སྤྱི་ལོ་2024ལོའི་གོ་ལ་ཧྲིལ་པོའི་མཁོ་སྤྲོད་སྦྲེལ་ཐག་ལ་སྐུལ་སྤེལ་གཏོང་བའི་སྙན་ཞུ་ཞེས་པ་ཡོངས་བསྒྲགས་བྱས་ཡོད་པ་རེད། སྐབས་འདིའི་མཁོ་སྤྲོད་སྦྲེལ་ཐག་ལ་སྐུལ་འདེད་གཏོང་བའི་འགྲེམས་ཚོགས་ཀྱིས་སྦྲེལ་ཐག་རྣམ་པའི་བསམ་ཕྱོགས་མངོན་གསལ་དོད་པོ་ཡོང་བ་བྱས་ནས་བརྒྱུད་རིམ་ཧྲིལ་པོར་སྦྲེལ་ཐག་ཁག་གི་གོང་འོག་བར་གསུམ་གྱི་ལྷུ་ཚིགས་གཙོ་བོ་མངོན་པར་བྱས་ཡོད།

སྐབས་གཉིས་པའི་མཁོ་སྤྲོད་སྦྲེལ་ཐག་ལ་སྐུལ་སྤེལ་གཏོང་བའི་འགྲེམས་ཚོགས་དེ་གྲངས་འཛིན་ཚན་རྩལ་སྦྲེལ་ཐག་དང་བདེ་ཐང་འཚོ་བའི་སྦྲེལ་ཐག ལྗང་མདོག་ཞིང་ལས་སྦྲེལ་ཐག རིག་ནུས་རླངས་འཁོར་སྦྲེལ་ཐག ནུས་རྒྱུ་གཙང་མའི་སྦྲེལ་ཐག སྔོན་ཐོན་བཟོ་སྐྲུན་སྦྲེལ་ཐག མཁོ་སྤྲོད་སྦྲེལ་ཐག་བཅས་ཀྱི་ཞབས་ཞུའི་འགྲེམས་ཁུལ་ལས་གྲུབ་པ་དང་། ཀྲུང་གོ་དང་ཕྱི་རྒྱལ་གྱི་འགྲེམས་ཞུགས་ཚོང་པས་སྦྲེལ་ཐག་ཧྲིལ་པོ་དང་འབྱུང་ཁམས་ཅན། ཡུལ་རྣམ་ཅན་བཅས་ཀྱི་བྱེད་སྟངས་བརྒྱུད་ལག་རྩལ་དང་ཐོན་རྫས་གསར་ཤོས་འགྲེམས་སྟོན་བྱས་ཡོད་པ་རེད།

ཀྲུང་གོ་ཉོ་ཚོང་སྐུལ་སྤེལ་ལྷན་ཚོགས་ཀྱི་ཚོགས་གཙོ་གཞོན་པ་张少刚༼ཀྲང་ཧྲའོ་ཀང་༽གིས་འདི་ལོའི་སྐབས་གཉིས་པའི་རྒྱལ་སྤྱིའི་མཁོ་སྤྲོད་སྦྲེལ་ཐག་ལ་སྐུལ་སྤེལ་གཏོང་བའི་འགྲེམས་ཚོགས་ནང་ཁེ་ལས་དང་སྒྲིག་གཞི་620ཞུགས་ཡོད་པ་དེ་སྐབས་དང་པོ་ལས་བརྒྱ་ཆ་20མང་བ་ཡོད་པ་དང་། ཕྱི་རྒྱལ་གྱི་འགྲེམས་ཞུགས་ཚོང་པའང་སྐབས་དང་པོའི་བརྒྱ་ཆ་26ནས་བརྒྱ་ཆ་32བར་འཕར་ཡོད་པ་རེད། དེའི་ཐོག་ནས་རྒྱལ་སྤྱིའི་སྤྱི་ཚོགས་ཀྱིས་ཐོན་ལས་སྦྲེལ་ཐག་དང་མཁོ་སྤྲོད་སྦྲེལ་ཐག་གི་མཉམ་ལས་བྱ་རྒྱུར་རེ་སྒུག་ཆེན་པོ་བྱེད་པ་གསལ་བཤད་ཐུབ་ལ། རྒྱལ་ཁབ་ཁག་གི་ཁེ་ལས་ཀྱིས་ཀྲུང་གོའི་འཕེལ་རྒྱས་ལ་ཡིད་ཆེས་དང་རྒྱལ་སྤྱིའི་མཁོ་སྤྲོད་སྦྲེལ་ཐག་ལ་སྐུལ་སྤེལ་གཏོང་བའི་འགྲེམས་ཚོགས་ལ་ཡིད་ཆེས་བྱེད་པ་ཡང་གསལ་བྱེད་ཐུབ་ཅེས་ཟུར་གསལ་གནང་ཡོད།

ཐོག་མར་བཙུགས་པའི་སྔོན་ཐོན་བཟོ་སྐྲུན་སྦྲེལ་ཐག་གི་འགྲེམས་ཁུལ་དུ་གསར་འགོད་པས་ཕུབ་གཟུགས་འཕྲུལ་འཁོར་གྱི་འདྲ་གཟུགས་མང་པོ་ཞིག་ལད་ཟློས་ངང་སྤྱོད་བཞིན་ཡོད་པ་མཐོང་ཡོད། རྒྱལ་ཁབ་ལ་དབང་བའི་ཁེ་ལས་ཤིག་གི་འགྲེམས་ཞུགས་ཚོང་པའི་ལས་དོན་མི་སྣས་རང་རྒྱལ་གྱིས་བཟོས་པའི་ཕུབ་གཟུགས་འཕྲུལ་འཁོར་དེ་ནི་རང་མཁོ་རང་སྒྲུབ་ཐུབ་པ་དེས་འབྲེལ་ཡོད་ཀྱི་མཁོ་སྤྲོད་འབྲེལ་ཐག་འཕེལ་རྒྱས་འགྲོ་རྒྱུར་སྐུལ་ཁྲིད་ཐུབ་ཡོད་ཅེས་དང་། ཁོང་གིས་སྔོན་ཐོན་བཟོ་སྐྲུན་ལས་རིགས་ཀྱིས་ཁྱེད་རང་གི་མཐའ་སྣེའི་ཐོན་རྫས་ཀྱི་ཁྲོམ་རའི་ཐོབ་སྐལ་དང་ལེན་ཐུབ་ནས་ཕྱི་རྒྱལ་ཚུད་པའི་ས་ཕྱོགས་ཀུན་ཏུ་བེད་སྤྱོད་ཡག་པོ་ཐུབ་ཚེ། ཁྱེད་རང་གིས་སྨད་རྒྱུད་ཀྱི་ཁེ་ལས་གྲངས་མེད་མཉམ་དུ་འཕེལ་རྒྱས་འགྲོ་རྒྱུར་སྐུལ་ཁྲིད་བྱེད་ཐུབ་ཅེས་བརྗོད་ཡོད་པ་རེད།

ད་ཐེངས་ཀྱི་མཁོ་སྤྲོད་སྦྲེལ་ཐག་ལ་སྐུལ་སྤེལ་གཏོང་བའི་འགྲེམས་ཚོགས་ཐོག་སྤྱི་ལོ་2024ལོའི་གོ་ལ་ཧྲིལ་པོའི་མཁོ་སྤྲོད་སྦྲེལ་ཐག་ལ་སྐུལ་སྤེལ་གཏོང་བའི་སྙན་ཞུ་ཞེས་པ་གསར་གཏོད་ངང་ཡོངས་བསྒྲགས་བྱས་པའི་ནང་རིག་ནུས་རླངས་འཁོར་དང་འདུས་གྲུབ་གློག་ལམ། འོད་ཧྥུ་གློག་འདོན། མི་གཟུགས་འཕྲུལ་མི་སོགས་ཐོན་ལས་ཀྱི་གོ་ལ་ཧྲིལ་པོའི་མཁོ་སྤྲོད་སྦྲེལ་ཐག་གི་དཔེ་རིས་གཙོ་གནད་ཐོག་བཏོན་ཡོད་པ་རེད། གཞན་ཡང་ད་དུང་གོ་ལ་ཧྲིལ་པོའི་མཁོ་སྤྲོད་སྦྲེལ་ཐག་གི་སྐུལ་སྤེལ་སྟོན་གྲངས་ཞེས་པ་དང་གོ་ལ་ཧྲིལ་པོའི་མཁོ་སྤྲོད་སྦྲེལ་ཐག་གི་སྦྲེལ་མཐུད་སྟོན་གྲངས་ཞེས་གོ་ལ་ཧྲིལ་པོའི་གསར་གཏོད་སྟོན་གྲངས་ཁག་གཉིས་ཡོངས་བསྒྲགས་བྱས་ནས་ཚད་འབེབས་ཀྱི་བྱེད་ཐབས་བརྒྱུད་གོ་ལ་ཧྲིལ་པོའི་མཁོ་སྤྲོད་སྦྲེལ་ཐག་གི་འགྱུར་ལྡོག་དང་འཕེལ་ཕྱོགས་ལ་འགྲེལ་བཤད་བརྒྱབ་ཡོད་པ་རེད། ཀྲུང་གོ་ཉོ་ཚོང་སྐུལ་སྤེལ་ལྷན་ཚོགས་ཀྱི་ཞིབ་འཇུག་ཁང་གི་འགོ་འཛིན་༼ཀྲའོ་ཕིང་༽གིས་སྤྱི་ལོ་2018ལོ་ནས་སྤྱི་ལོ་2023ལོའི་བར་གྱི་ལོ་ལྔའི་རིང་། གོ་ལ་ཧྲིལ་པོའི་མཁོ་སྤྲོད་སྦྲེལ་ཐག་གི་སྐུལ་སྤེལ་ཆུ་ཚད་མངོན་གསལ་དོད་པོས་མཐོ་རུ་འགྲོ་བའི་རྣམ་པ་ཐོན་ནས་སྐུལ་སྤེལ་སྟོན་གྲངས་དེ་ཀླད་ཀོར་ཚེགས་27ནས་ཀླད་ཀོར་ཚེགས་66བར་འཕར་ཏེ་བརྒྱ་ཆ་144འཕར་ཡོད་ཅེས་གསུངས་ཡོད་པ་རེད།