འདི་ག་ལས་ཁུངས་ནས་སྤེལ་བའི་གནས་ཚུལ། ཀྲུང་གོ་གསར་པ་དབུ་བརྙེས་ནས་ལོ་75ཡི་རིང་། “ཚན་རིག་གི་ཕྱོགས་སུ་དཔུང་སྐྱོད་བྱེད་པ་”ནས་“ཚན་རིག་ལག་རྩལ་ནི་ཐོན་སྐྱེད་ནུས་ཤུགས་ཨང་དང་པོ་ཡིན་པ་”དང་། དེ་ནས་“གསར་གཏོད་ནི་སྒུལ་ཤུགས་ཨང་དང་པོ་ཡིན་པའི་”བར། ཏང་ཀྲུང་དབྱང་གིས་ཐོག་མཐའ་བར་གསུམ་དུ་གསར་གཏོད་ཀྱིས་རྒྱལ་ཁབ་འཕེལ་རྒྱས་ཀྱི་གནས་བབ་ཧྲིལ་པོའི་ཁྲོད་བཟུང་བའི་ནུས་པ་གལ་ཆེན་ལ་ཚད་མཐོའི་མཐོང་ཆེན་བྱས་ཏེ། ཚན་རྩལ་ཐད་རང་ཚུགས་དང་རང་སྟོབས་རང་སྤེལ་བྱ་རྒྱུ་དེ་རྒྱལ་ཁབ་འཕེལ་རྒྱས་ཀྱི་འཐབ་ཇུས་འདེགས་སྐྱོར་དུ་བརྩིས་པས། རྗེས་སྙེག་མཇུག་འདེད་ནས་མཉམ་དུ་རྒྱུག་པ་དང་སྣེ་ཁྲིད་པའི་བར་གྱི་ལོ་རྒྱུས་རང་བཞིན་གྱི་འགྱུར་ལྡོག་རིམ་བཞིན་མངོན་འགྱུར་བྱུང་སྟེ། འཛམ་གླིང་ཐོག་ཤུགས་རྐྱེན་ཆེན་པོ་ལྡན་པའི་ཚན་རྩལ་གྱི་རྒྱལ་ཁབ་ཆེན་པོ་ཞིག་ཏུ་གྱུར་ཡོད།

　　ཟླ་9ཚེས་19ཉིན་གྱི་ཆུ་ཚོད་9དང་སྐར་མ་14ཡི་ཐོག རང་རྒྱལ་གྱིས་ཞི་ཁྲང་སྲུང་སྐར་འཕེན་གཏོང་ལྟེ་གནས་སུ་བྱང་སྐར་སྤུན་བདུན་ཕྱོགས་སྟོན་སྲུང་སྐར་ཨང་ང་དགུ་པ་དང་དྲུག་ཅུ་པ་གྲུབ་འབྲས་ལྡན་པའི་ངང་འཕེན་གཏོང་བྱས་ཡོད། ཀྲུང་གོ་ཚན་རིག་ཁང་སྲུང་སྐར་ཕྲ་ཆུང་གསར་གཏོད་ཞིབ་འཇུག་ཁང་གི་ཞིབ་འཇུག་པ། བྱང་སྐར་སྤུན་བདུན་ཨང་གསུམ་པའི་སྲུང་སྐར་མ་ལག་གི་དབུ་བཞུགས་སྤྱི་ཁྱབ་ཇུས་འགོད་པ་ལིན་པའོ་ཅུན་གྱིས། ད་ཐེངས་ཀྱི་འཕེན་གཏོང་དེའི་ཐོག་ནས་བྱང་སྐར་སྤུན་བདུན་གསུམ་པ་འཕེན་གཏོང་ཐུགས་གྲ་ལེགས་འགྲིག་བྱུང་བ་མཚོན་གྱི་ཡོད་ཅེས་བསྟན་འདུག

　　ཀྲུང་གོ་གསར་པ་དབུ་བརྙེས་པའི་དུས་འགོར། ལག་རྩལ་གྱི་དཀའ་གནད་དང་རྒྱལ་སྤྱིའི་བཀག་སྡོམ་ལ་དམིགས་ཏེ། “མདེལ་གཉིས་སྐར་གཅིག་”གིས་ཚབ་མཚོན་བྱས་པའི་རྒྱ་ཆེའི་ཚན་རྩལ་ལས་དོན་པ་རྣམས་ཀྱིས་རང་མིང་ངོ་མ་སྦས་གསང་གནང་ནས། རང་རྒྱལ་གྱི་ཚན་རྩལ་བྱ་གཞག་ཆེད་དཀའ་སྤྱད་ཚད་མེད་ཀྱི་ལེགས་སྐྱེས་ཕུལ་ཡོད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། རྒྱལ་ཁབ་གོང་འཕེལ་གྱི་གནས་བབ་ཧྲིལ་པོའི་ཁྲོད་གསར་གཏོད་དེ་ཉིད་སྲོག་ཤིང་གི་གནས་བབ་སུ་བཞག་པ་དང་། ཚན་རྩལ་གསར་གཏོད་ཀྱི་མྱུར་ཚད་མགྱོགས་སུ་བཏང་ནས་གོང་འཕེལ་བཏང་བས། མི་ཞུགས་མཁའ་སྐྱོད་དང་། ཟླ་དཔྱད་མེ་འཚོལ། མཚོ་གཏིང་དང་ས་འོག་ལ་བརྟག་དཔྱད། རིམ་འདས་རྩིས་འཁོར། ཚད་རྡུལ་ཆ་འཕྲིན། གནམ་གྲུ་ཆེན་པོ་བཟོ་སྐྲུན་སོགས་ཀྱི་ཁྱབ་ཁོངས་སུ་གྲུབ་འབྲས་ཆེན་པོ་ཟམ་མི་ཆད་པར་ཐོབ་ཅིང་། “ཟླ་བའི་ལྷ་མོ་”ཟླ་བའི་གོ་ལར་འཕུར་བ་དང་། “བྱང་སྐར་སྤུན་བདུན་”གྱི་དྲ་བ་གྲུབ་པ། “འབད་འཐབ་པ་”རྟགས་ཅན་མཚོ་གཏིང་དུ་འཛུལ་བ། རྒྱལ་ཁབ་ཆེན་པོའི་མཚོན་ཆ་གལ་ཆེན“གསར་སྤེལ”ཟམ་མི་ཆད་པར་བྱས་པ་བཅས་ཀྱི་ཐོག་ནས། རང་རྒྱལ་ཚན་རྩལ་གྱི་སྟོབས་ཤུགས་ཆེན་པོ་གང་ལེགས་མངོན་ཡོད།

　　ཚན་རྩལ་ལ་གྲུབ་འབྲས་ཐོབ་པ་དེ་ནི་མ་དངུལ་འབོར་ཆེན་བཏང་བ་དང་ཁ་བྲལ་ཐབས་མེད། 2013ལོ་ནས་བཟུང་རང་རྒྱལ་ཉིད་འཛམ་གླིང་ཐོག་གི་ཞིབ་བཟོའི་ཐད་མ་དངུལ་གཏོང་བའི་རྒྱལ་ཁབ་ཆེན་པོ་ཨང་གཉིས་པ་དེར་གྱུར་ཡོད་པ་དང་། 2023ལོར་ཞིབ་འཇུག་དང་ཚོད་ལྟའི་གོང་འཕེལ་ཐད་མ་དངུལ་དུང་ཕྱུར་སུམ་ཁྲི་སུམ་སྟོང་ཉིས་བརྒྱ་བདུན་ཅུ་དོན་བརྒྱད་བཏང་ཡོད་པ་དེ་1991ལོ་ལས་ལྡབ་233འཕར་ཡོད་ཅིང་། ཡོ་རོབ་མནའ་འབྲེལ་རྒྱལ་ཁབ་ཀྱི་ཆ་སྙོམས་ཆུ་ཚད་ལས་བརྒལ་ཡོད། ཞིབ་བཟོའི་མི་སྣ་དང་། ཆུ་ཚད་མཐོ་བའི་དཔྱད་རྩོམ། ཆེད་ཁེ་སྤེལ་ཚད་བཅས་ལོ་མང་རིང་འཛམ་གླིང་གི་མདུན་གྲལ་དུ་སླེབས་ཡོད།

　　2023ལོར་རང་རྒྱལ་གྱི་རིགས་ཚན་ཁག་གི་ཤུགས་རྐྱེན་ཆེ་ཤོས་ལྡན་པའི་དུས་དེབ་ཐོག་དཔྱད་རྩོམ་སྤེལ་བའི་གྲངས་འབོར་དང་། ཆུ་ཚད་མཐོ་བའི་རྒྱལ་སྤྱིའི་་དུས་དེབ་ཐོག་དཔྱད་རྩོམ་སྤེལ་བའི་གྲངས་འབོར། དེ་བཞིན་ལུང་དུ་དྲངས་ཚད་བཅས་མུ་མཐུད་འཛམ་གླིང་གི་ཨང་དང་པོ་རྒྱུན་འཁྱོངས་ཐུབ་ཡོད། ཀྲུང་གོ་ཚན་རིག་ལག་རྩལ་ཆ་འཕྲིན་ཞིབ་འཇུག་ཁང་གི་ཏང་ཨུད་ཧྲུའུ་ཅི་ཀྲའོ་ཀྲེ་ཡུན་གྱིས། ཉེ་བའི་ལོ་བཅུའི་རིང་གི་རྒྱལ་སྤྱིའི་དཔྱད་རྩོམ་གྱི་ལུང་དུ་དྲངས་ཚད་བསྡོམས་རྩིས་བརྒྱབ་པར་གཞིགས་ན། རང་རྒྱལ་གྱི་རྒྱལ་སྤྱིའི་དཔྱད་རྩོམ་ལུང་དུ་དྲངས་ཚད་དེ་སྤྱིའི་ཆ་ནས་འཛམ་གླིང་གི་ཆ་སྙོམས་ཆུ་ཚད་ལས་ཐོག་མར་བརྒལ་ཡོད། རང་རྒྱལ་གྱི་རྒྱུ་ཆའི་ཚན་རིག་དང་། ལས་གྲྭའི་ལག་རྩལ། རྫས་འགྱུར། ཁོར་ཡུག་དང་འབྱུང་ཁམས་རིག་པ། རྩིས་རྒྱག་འཕྲུལ་འཁོར་གྱི་ཚན་རིག ཞིང་ལས་ཚན་རིག་དང་གྲངས་འཛིན་བཅས་རིགས་ཚན་བདུན་གྱི་ཁྱབ་ཁོངས་ནས་ལུང་དུ་འདྲེན་ཚད་འཛམ་གླིང་གི་ཨང་དང་པོར་སླེབས་ཡོད་ཅེས་གསུངས་ཡོད།

　　  གོ་ལ་ཧྲིལ་པོའི་རེས་སྐོར་གསར་པའི་ཚན་རྩལ་གསར་བརྗེ་དང་ཐོན་ལས་བརྗེ་སྒྱུར་ཁྲོད་ཀྱི་འགྲན་རྩོད་དྲག་པོའི་མདུན་དུ། རང་རྒྱལ་གྱིས་གསར་གཏོད་འགུལ་ཤུགས་གོང་འཕེལ་གྱི་འཐབ་ཇུས་ལག་བསྟར་གཏིང་ཟབ་བྱེད་པ་དང་། ཆུ་ཚད་མཐོ་བའི་ཚན་རྩལ་རང་ཚུགས་རང་སྟོབས་ལ་སྐུལ་འདེད་མགྱོགས་པོ་བཏང་བ། སྤུས་གསར་ཐོན་སྐྱེས་ནུས་ཤུགས་དེ་ལག་ལེན་ཁྲོད་གྲུབ་པ་མ་ཟད། དེའི་ཐོག་ནས་སྤུས་ཚད་མཐོ་བའི་གོང་འཕེལ་གྱི་སྐུལ་འདེད་ནུས་པ་དང་འདེགས་སྐྱོར་ནུས་པ་ཤུགས་ཆེན་མངོན་པ་བྱས་ཡོད། མི་བཟོས་རིག་ནུས་དང་། སྤྲིན་རྩིས་རྒྱག 5Gསོགས་གྲངས་འཛིན་ལག་རྩལ་གོང་འཕེལ་མྱུར་པོ་ཕྱིན་པ་དང་། གྲངས་འཛིན་དང་ལག་ལེན་མཉམ་འདྲེས་ལ་རྒྱུན་མཐུད་སྐུལ་འདེད་བཏང་བ། ཐོན་ལས་གྲངས་འཛིན་ཅན་དང་། གྲངས་འཛིན་ཐོན་ལས་ཅན་གྱི་གོམ་སྟབས་རྒྱུན་ཆད་མེད་པར་མགྱོགས་སུ་བཏང་ཡོད།

　　  ཀྲུང་གོ་ཚན་རིག་ཁང་ཚན་རྩལ་འཐབ་ཇུས་བློ་འདྲི་ཞིབ་འཇུག་ཁང་གི་འགོ་འཛིན་ཕན་ཅའོ་ཧྥེང་གིས། ཀྲུང་གོ་གསར་པ་དབུ་བརྙེས་ནས་ལོ་ངོ་75སོང་རིང་། རང་རྒྱལ་དེ་ཉིད་གཞན་གྱི་རྗེས་འདེད་མཁན་ཞིག་ནས་གཞན་དང་མཉམ་སྐྱོད་དང་གཞན་གྱི་སྔོན་དུ་རྒྱུག་པའི་ལོ་རྒྱུས་རང་བཞིན་གྱི་འགྱུར་ལྡོག་རིམ་བཞིན་མངོན་འགྱུར་བྱུང་ཡོད་པ་དང་། འཛམ་གླིང་ཐོག་གི་ཤུགས་རྐྱེན་ཆེ་ཤོས་ལྡན་པའི་ཚན་རྩལ་གྱི་རྒྱལ་ཁབ་ཆེ་མོ་ཞིག་ཏུ་གྱུར་ཡོད། ད་ཆ། ང་ཚོས་གྲངས་ཚད་གང་མགྱོགས་གསོག་འཇོག་བྱེད་པ་ནས། སྤུས་ཚད་ལེགས་སུ་གཏོང་བའི་ཕྱོགས་སུ་སྤོ་སྒྱུར་བྱེད་བཞིན་པ་དང་། ངོས་ཀྱི་འགག་གཏོར་ནས་མ་ལག་གི་ནུས་པ་མཐོ་རུ་གཏོང་བའི་བར་གྱི་ལོ་རྒྱུས་ཀྱི་དུས་རིམ་ཞིག་ཏུ་སླེབས་ཡོད་ཅེས་གསུངས་ཡོད།

　　  རང་རྒྱལ་གྱི་གསར་གཏོད་སྟོན་གྲངས་ཀྱི་གོ་ལ་ཧྲིལ་པོའི་བང་གྲལ་དེ་2012ལོའི་ཨང་34ནས་2023ལོའི་ཨང་12བར་མཐོ་རུ་ཕྱིན་ཡོད་པ་དང་། གསར་གཏོད་རྣམ་པའི་རྒྱལ་ཁབ་ཀྱི་གྲས་སུ་སླེབས་ཡོད།

　　ཏང་གི་ཚོགས་ཆེན་ཉི་ཤུ་པའི་ཐོག 2035ལོར་ཚན་རྩལ་གྱི་རྒྱལ་ཁབ་སྟོབས་ཆེན་འཛུགས་པའི་འཐབ་ཇུས་ཀྱི་བཀོད་སྒྲིག་གནང་ཡོད། ཚན་རྩལ་པུའི་པུའུ་ཀྲང་དབྱིན་ཧོ་ཅུན་གྱིས། སྤུས་གསར་ཐོན་སྐྱེས་ནུས་ཤུགས་གོང་འཕེལ་གཏོང་བ་དང་། སྤུས་ཚད་མཐོ་བའི་གོང་འཕེལ་མངོན་འགྱུར་ཐུབ་པ་བྱེད་པ་དེས། ང་ཚོས་ངེས་པར་དུ་ཚན་རྩལ་གསར་གཏོད་དང་ཐོན་ལས་གསར་གཏོད་མཉམ་འདྲེས་ཀྱི་གོང་འཕེལ་ལ་ཤུགས་སྣོན་རྒྱག་དགོས་པའི་བླང་བྱ་བཏོན་ཡོད། རྣམ་པ་གསར་པའི་ཐོན་སྐྱེས་འབྲེལ་བ་འཛུགས་པ་དང་། རྒྱལ་ཁབ་ཀྱི་འགྲན་རྩོད་ནུས་པ་མཐོ་རུ་གཏོང་བ། ཕྱི་ཕྱོགས་ཀྱི་ཉེན་ཁའི་འགྲན་རྩོད་ལ་ཁ་གཏད་གཅོག་པ་བཅས་ཀྱིས། ང་ཚོས་ངེས་པར་དུ་ཚན་རྩལ་གསར་གཏོད་དང་ལམ་ལུགས་གསར་གཏོད་ཀྱི་འགུལ་ཤུགས་ཆེ་མོ་གཉིས་རྒྱུན་འཁྱོངས་བྱེད་དགོས་པ་དང་། ཆུ་ཚད་མཐོ་བའི་ཚན་རྩལ་རང་ཚུགས་རང་སྟོབས་གང་མགྱོགས་མངོན་འགྱུར་ཐུབ་པ་བྱེད་དགོས་པའི་བླང་བྱ་བཏོན་ཡོད་ཅེས་གསུངས་ཡོད།