གཞས་ཚིག སེར་ཆེན། གཞས་གདངས། འོད་ཟེར། གཞས་པ། འོད་ཟེར། <༡> ལོ་ཟླའི་སྐྱོ་ངལ་གྱི་བཞུར་རྒྱུན་བར་ནས། དྲན་སྣང་གི་དཀྱིལ་ལ་རྨ་ཁ་བབས་སོང་། འཇགས་མི་སྲིད་པའི་སེམས་ཀྱི་ཡིག་འབྲུ་རེ་རེ། སྙིང་དམར་པོའི་སྟེང་དུ་ཡང་ཡང་འཁོར་སོང་། དྲན་སྣང་གང་ན། སེམས་པ་གང་ན། མིག་ཆུས་དྲུད་པའི་འཁང་སེམས་ཀྱི་ཀློང་ན། སྐྱོ་བས་དཀྲིས་པའི་གས་ཁ་ཡི་བར་ན། གང་ན། གང་ན། འགྱུར་མེད་ཀྱི་གནའ་གཏམ་ཀློང་ན། བསུབ་མེད་ཀྱི་སྙིང་ཆུང་མགུལ་ན། རྐང་རྗེས་རི་མོས་བྲིས་པའི་རྗེས་ཤུལ་དམར་པོ། རྗེས་ཤུལ་ཁུད་ཀྱི་ཡིག་ཆུང་། བྲག་ལ་བརྐོས་པའི་ཡིད་ཀྱི་གཟུགས་རིས། གཟུགས་རིས་ངོས་ཀྱི་ལོ་ཟླའི་མེ་ལོང་། མེ་ལོང་། ལོ་ཟླའི་མེ་ལོང ཡིད་ཀྱི་མེ་ལོང་། མེ་ལོང་། མེ་ལོང་། ཟུག་གཟེར་ཐེབས་པའི་ན་ཟུག་རེ་རེ་ཡིད་དུ་བསླངས་སོང་། རྨི་ལམ་འཁོར་བའི་གདུང་བ་རེ་རེ་ཡིད་ནས་འཕོས་སོང་། དུས་བསྐལ་བ་ཆགས་པའི་གནའ་གཏམ་དྲན་ནས། ཡིད་སྐྱོ་བའི་མགྲིན་པ་མཆི་མས་བརྣངས་སོང་། དུས་ལོ་ཟླས་བཞག་པའི་གདམས་ངག་གསན་ན། བློ་དྲན་པའི་གཏིང་རིམ་འཁྱགས་པས་བསྡམས་ཡོང་། ཨུ་ཧུ་ཧུ་་་་་་་ཨུ་ཧུ་ཧུ། ཀྱག་ཀྱོག་ལམ་བུའི་ཁུགས་སུ་ལྷུང་བའི་རེ་ཆད་རེ་སྡུག ཡི་གེ་ངུ་བའི་ཐག་སྒྲ། དཀའ་ངལ་རི་མོའི་ལྟེམས་སུ་བྲིས་པའི་ངར་ཤུགས། སྔས་སུ་འཕྱུར་བའི་དྲན་པ། དྲན་པ། དྲན་པ་ཡིད་དུ་ལྷུང་བའི་རེ་སྨོན། རེ་སྨོན་སྣང་བར་འཐིབས་པའི་ལམ་བུ། ལས་ཀྱི་མིག་ལ་འཐེན་སོང་། འཐེན་སོང་། སེམས་ཀྱི་ཐོད་ལ་འཆར་ཡོང་། འཆར་ཡོང་། <༢> སྡུག་བསྔལ། སྡུག་བསྔལ་གྱི་ཞིང་ན་འཁོར་བའི། རེ་སྙེག་གི་ཀློང་དུ་སིམ་པའི། བསུབ་མེད་ཡིད་དུ་ཟུག་པའི་འདས་པའི་ལོ་རྒྱུས་ཚ་ལམ་ལམ། འགྱུར་མེད་དྲན་པའི་བྱང་ཁོག་ན་འདར་སིག་སིག ས་ཆེན་གྱི་ཕང་བར་འཐིམས་པའི་རྣམ་ཤིས་ཀྱི་དབྱངས་རྟ། རྣམ་ཤེས་ཀྱི་དབྱངས་སུ་བསྡེབས་པའི་ལོ་ཟླའི་རོལ་མོ། ཡར་ཀླུང་གཙང་འགྲམ་བརྒྱུད་ནས། མི་ཚོགས་ཁྲི་འབུམ་གྱི་དྲན་འཛིན་ལ་བརྒྱུས་དུས། སྐྱིད་སྡུག་ལས་འབྲས་ཀྱི་དྲན་པ། གླུ་སྐད་ཀྱི་གདངས་སུ་འཁོར་ཡོང་། རྫོགས་ལྡན་རེ་སྒུག་གི་འོད་སྣང་། ཡིག་ཆུང་གི་མཚམས་སུ་འཆར་སོང་། འོད་སྣང་གི་བྲང་གཞུང་ལ་འཁྱགས་ཤི་ཐེབས་སྲིད་ཀྱང་། འཇགས་པ་མེད་པའི་ཟུག་རྔུ་ཡི་གྲང་འདར་ཀློང་ནས། འཚོལ་འོས་པའི་དྲོད་ཁོལ་དེ་ཡིད་ཀྱི་གཏིང་དུ་ལྷུང་སོང་། ལྷུང་སོང་། དྲན་འོས་པའི་འབོད་པ་དེ་སྙིང་གི་མཚམས་སུ་འཁྱིལ་སོང་། ལོ་ཟླས་ཡིད་ལ་བརྐོས་པའི་དྲན་པའི་རྨི་ལམ། རྨི་ལམ་ངོས་སུ་འབྱར་བའི་ལོ་ཟླའི་བརྐོས་རིས། རེ་སྐྱོ་རེ་སྡུག་གི་འདུ་འགོད་མང་ཡང་། ས་ཆེན་པོའི་གཏམ་རྒྱུད་བཀླགས་པའི་སེམས་བྱུང་གིས། ཁུར་བོས་དེད་པའི་དྲན་སྣང་ལ་གཤོག་པ་ཐོག་སོང་། རྔུལ་ཆུས་བརླན་པའི་སྙིང་ཁོང་ལ་དན་རྟགས་ཤར་སོང་།
རྩོམ་སྒྲིག་པ། གཤོག་པ།