ཤེས་རྟོགས་བྱུང་བ་ལྟར་ན། ཀུ་ཤུ་དང་ཤིང་ཏོག་ངང་ལག་མང་ཙམ་བཟས་ན་ཁྲག་ཤེད་ཚོད་འཛིན་བྱེད་ཐུབ། 

རང་རྒྱལ་གྱི་རིག་གཅིག་མཁས་ཅན་གྱིས་ཞིབ་འཇུག་བྱས་པ་ལས་གསལ་བར། ཁྲག་ཤེད་མཐོ་བའི་ནད་པའི་ཁྲོད། གཟའ་འཁོར་རེར་ཤིང་ཏོག་ངང་ལག་གམ་ཀུ་ཤུ་ཐེངས་3ནས་6བར་ཟ་བའི་མི་དེའི་རྒྱུ་རྐྱེན་ཡོངས་ཀྱི་འཆི་ཚད་24%ནས་40%ཇེ་དམའ་རུ་འགྲོ་བ་དང་། ནད་པས་ཤིང་ཏོག་རིགས་འདི་གཉིས་ཀ་ཟ་ཚད་ཅུང་མཐོ་སྐབས་(གཟའ་འཁོར་རེར་ཤིང་ཏོག་དེ་གཉིས་ཀ་ཐེངས་3ནས་6བར་ཟ་དགོས) རྒྱུ་རྐྱེན་ཡོངས་ཀྱི་འཆི་ཚད་43%ཆག་ཡོད།

ཞིབ་འཇུག་དེས་ད་དུང་ཤེས་རྟོགས་བྱུང་བ་ལྟར་ན། རྒྱུན་དུ་ཤིང་ཏོག་གཞན་དག་དཔེར་ན། ཤིང་ཏོག་ལི་དང་ཤིང་ཏོག་པོ་ལོ། རྒུན་འབྲུམ་ཟ་རྒྱུ་དེ་ཁྲག་ཤེད་མཐོ་བའི་ནད་པའི་རྒྱུ་རྐྱེན་ཡོངས་ཀྱི་འཆི་ཚད་དང་འབྲེལ་བ་མངོན་གསལ་མེད་པ་རེད།

ཀུ་ཤུ་དང་ཤིང་ཏོག་ངང་ལག་གཉིས་ཁྲག་ཤེད་མཐོ་བའི་ནད་པའི་རྒྱུ་རྐྱེན་ཡོངས་ཀྱི་འཆི་ཚད་ཇེ་དམའ་རུ་གཏོང་བ་དང་འབྲེལ་བ་ཡོད་པའི་རྒྱུ་མཚན་ཅི་ཡིན་ནམ་ཞེ་ན། གཤམ་ལ་ང་ཚོས་དེའི་ཐད་ལ་རྒྱུས་ལོན་ཞིག་བྱ།

ཤིང་ཏོག་ངང་ལག་གིས་ཁྲག་ཤེད་སྙོམས་སྒྲིག་བྱེད་ཐུབ་པའི་རྒྱུ་མཚན་གཙོ་བོ་ནི་དེའི་ནང་གི་ཕུན་སུམ་ཚོགས་པའི་ཅཱ་རྫས་དང་འབྲེལ་བ་ཡོད། ཤིང་ཏོག་ངང་ལག་གི་ཅཱ་རྫས་འདུས་ཚད་ནི་ཧའོ་ཁེ་256/ཁེ་100ལ་སླེབས་ཡོད། ཅཱ་རྫས་འདང་ངེས་ཀྱིས་མིའི་ལུས་ཕུང་གིས་ནཱ་རྫས་ཕྱིར་གཏོང་བྱེད་པར་སྐུལ་འདེད་བྱེད་པ་དང་། ནཱ་རྫས་མཐོ་བ་ལས་བྱུང་བའི་ཁྲག་ཤེད་ཇེ་མཐོར་འགྲོ་བ་དེ་ཇེ་དམའ་རུ་གཏོང་ཐུབ་པ་མ་ཟད། ད་དུང་ཁྲག་རྩ་རྐྱོང་འབྱེད་དང་ཏན་དབྱང་འགྱུར་རྫས་གྲུབ་པར་རོགས་རམ་བྱེད་ཐུབ། ཁྲག་གིས་ཁྲག་རྩའི་ལྡེབས་ལ་ཐེབས་པའི་གནོན་ཤུགས་ཇེ་ཆུང་དུ་བཏང་བ་བརྒྱུད་ཁྲག་ཤེད་ཇེ་དམའ་རུ་གཏོང་ཐུབ།

ཀུ་ཤུའི་ནང་གི་ཅུང་ཕུན་སུམ་ཚོགས་པའི་ཧོང་ཝན་ཕྲུན་གྱིས་ཁྲག་ཤེད་ཇེ་དམའ་རུ་གཏོང་བའི་ཕན་འབྲས་ལེགས་པོ་ཐོན་ཐུབ། དུས་མཚུངས་སུ་ཧོང་ཝན་ཕྲུན་གྱིས་ཁྲག་གི་མཁྲིས་རྒྱུ་གཤེར་རྩི་དང་སྟུག་ཚད་དམའ་བའི་ཚིལ་སྤྲི་དཀར་གྱི་མཁྲིས་རྒྱུ་གཤེར་རྩི་(མཁྲིས་རྒྱུ་གཤེར་རྩི་ངན་པོ)ཡི་ཆུ་ཚད་ཇེ་དམའ་རུ་གཏོང་ཐུབ་པས། སྙིང་ཁམས་ཁྲག་རྩའི་བདེ་ཐང་ལ་ཕན་ཐོགས་ཆེན་པོ་ཡོད།

ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།

ཞུ་དག གཡུ་སྒྲོན།

ཡིག་སྒྱུར། བཀྲ་ཤིས་རྣམ་རྒྱལ།