ཐུབ་བསྟན་ཚེ་རིང་ལགས་ཀྱིས། རྒྱལ་ས་པེ་ཅིང་དུ་ལྗིད་ཏིག་ཏིག་གི་བྱ་དགའ་ཆེན་པོ་འདི་འདྲ་ཞིག་ལེན་པར་འགྲོ་རྒྱུ་བྱུང་བར་ཧ་ཅང་དགའ་པོ་བྱུང་། འདི་ནི་རྒྱལ་ཁབ་ཀྱིས་ང་ཚོ་གྲངས་ཉུང་མི་རིགས་ལ་གནང་བའི་ཐུགས་ཁུར་དང་གཟིགས་གཟོས་ཤིག་རེད། ང་ཚོའི་བོད་ལྗོངས་འདི་ཉིད་མ་གཞི་ནས་མི་རིགས་ས་ཁུལ་ཞིག་ཡིན་སྟབས་མི་རིགས་མཐུན་སྒྲིལ་ནི་གལ་འགངས་ཧ་ཅང་ཆེན་པོ་རེད། མི་རིགས་དབར་མཐུན་སྒྲིལ་བྱུང་ན་ལས་དོན་མང་པོ་ངང་གིས་འགྲུབ་ཐུབ། ཕྱིས་འབྱུང་ལས་ཀའི་ནང་ང་རང་གིས་མི་རིགས་མཐུན་སྒྲིལ་གཙིགས་སུ་བཟུང་ནས་ཉེ་འཁོར་གྱི་ལས་རོགས་ལ་མཐུན་སྒྲིལ་ཡག་པོ་བྱས་ཏེ་རང་ཉིད་ཀྱི་བྱ་གཞག་ཡག་པོ་བསྒྲུབ་རྒྱུ་ཡིན་ཞེས་གསུངས།

     སྤྱི་ལོ་2006ལོར། ཐུབ་བསྟན་ཚེ་རིང་ལགས་ཕུལ་དུ་བྱུང་བའི་གྲུབ་འབྲས་ཐོབ་ནས་སློབ་ཆེན་ཐོན་ཏེ། ས་མཐོའི་ལྕགས་ལམ་གྱི་ལས་ཀར་ཞུགས། མི་ལོ་18རིང་། ཁོང་གིས་གོར་མོ་དང་། གཏེར་ལེན་ཁ། ལྷ་ས་སོགས་སུ་ཕྱག་ལས་གནང་ཞིང་། སྤྱི་ལོ་2011ལོར་ཁོང་སྐོར་ཞིབ་འཁོར་ཁང་གི་གཙོ་འགན་འཁུར་མཁན་ཀྲུའུ་རེན་གཞོན་པར་བསྐོ་གཞག་བྱས།

     ཐུབ་བསྟན་ཚེ་རིང་ལགས་ཀྱིས། ལོ་ལྟར་འགྲུལ་པ་མང་པོ་ཞིག་མེ་འཁོར་བསྡད་དེ་བོད་ལྗོངས་སུ་འགྲུལ་བཞུད་བྱེད་དགོས་རྐྱེན་ང་རང་ནས་འགྲུལ་པའི་མི་ལུས་བདེ་འཇགས་ཀྱི་འགན་འཁུར་བ་དང་། ལམ་ཐིག་དང་ཟམ་པ། ཕུག་ལམ་བཅས་སྒྲིག་བཀོད་ཀྱི་སྤུས་ཚད་ལ་ལྟ་སྐུལ་དོ་དམ་ཡག་པོ་བྱེད་ཀྱི་ཡོད། ང་རང་གི་བསམ་པར་དེ་ཡང་མི་རིགས་མཐུན་སྒྲིལ་ལ་སྐུལ་འདེད་གཏོང་བར་ཕུལ་བའི་ལེགས་སྐྱེས་ཤིག་ཡིན་སྙམ་བྱུང་ཞེས་གསུངས།

     སྤྱི་ལོ་2022ལོ་ནས་བཟུང་། ཐུབ་བསྟན་ཚེ་རིང་ལགས་ཀྱིས་ལྷ་སའི་རྨང་གཞིའི་སྒྲིག་བཀོད་དུམ་བུའི་བདེ་འཇགས་ཁོའོ་ཡི་ཁོའོ་ཀྲང་གི་འགན་འཁུར་རིང་། ཁོང་གིས་སྐད་ཡིག་གི་བཟང་ཆ་འདོན་སྤེལ་གང་ལེགས་བྱས་ཏེ། ལྕགས་ལམ་འགྲམ་རྒྱུད་ཀྱི་གྲོང་ཚོ་དང་། སྡེ་ཁུལ། སློབ་གྲྭ་བཅས་སུ་ཟབ་ཞུགས་ཀྱིས་དྲིལ་བསྒྲགས་སློབ་གསོའི་བྱེད་སྒོ་སྤེལ་བ་དང་། ལྕགས་ལམ་འགྲམ་རྒྱུད་ཀྱི་མང་ཚོགས་ཚོར་ལྕགས་ལམ་སྒྲིག་ཆས་སྒྲིག་བཀོད་ཀྱི་བདེ་འཇགས་ལ་སྲུང་སྐྱོབ་བྱེད་པའི་གལ་ཆེའི་རང་བཞིན་གླེང་སྟེ། འགྲམ་རྒྱུད་ཀྱི་མི་རིགས་ཁག་གི་མང་ཚོགས་དབར་ཕན་ཚུན་ཡིད་ཆེས་དང་། ཕན་ཚུན་བསམ་ཤེས། ཕན་ཚུན་མཐུན་སྒྲིལ་བཅས་ཀྱི་འབྲེལ་ཟམ་བཙུགས་པར་མང་ཚོགས་ཁྲོད་བསྔགས་བརྗོད་ཚད་མེད་ཐོབ།

     ཐུབ་བསྟན་ཚེ་རིང་ལགས་ཀྱིས། ངོ་མཚར་ཆེ་བའི་མཁའ་ལམ་འདི་ནི་ཤང་གྲོང་དར་རྒྱས་ལ་རོགས་ཕན་ཐུབ་པའི་བདེ་སྐྱིད་ཀྱི་ལམ་བུ་ཞིག་ཡིན་ལ། མི་རིགས་ཁག་དབར་འབྲེལ་གཏུག་སྤེལ་རེས་ལ་ཤུགས་སྣོན་གྱིས་མཐུན་སྒྲིལ་ཡར་བརྩོན་ཐུབ་པའི་གོང་འཕེལ་གྱི་ལམ་བུ་ཞིག་དེ་བས་ཀྱང་ཡིན་སྟབས་ལྕགས་ལམ་ལས་མི་ཞིག་གི་ངོས་ནས་ཕ་ཡུལ་གྱི་གོང་འཕེལ་ཆེད་ལེགས་སྐྱེས་ཕྲན་བུ་འབུལ་རྒྱུ་བྱུང་བར་སྤོབས་པ་སྐྱེ་གི་འདུག་ཅེས་གསུངས།