ཐེངས་འདིར་ངོས་འཛིན་ཐུབ་པའི་སྔོན་གཤེགས་དཔའ་བོ་བརྒྱད་པོ་ནི་ཀྲང་ཞི་རུང་དང་། ཝུའེ་ཅན་ཧྭ། ཁྲེན་ཧྥུ་ཞང་། ཁྲེན་ཧྲེང་ལིན། ལི་ཧྲེང་ཚའེ། ཀུའོ་ཅུའེ་ཧུའུ། ལིའུ་ཡན་པིན། ཞུའེ་ཀེན་ཏིང་བཅས་རེད།

     2023ལོར། བོད་རང་སྐྱོང་ལྗོངས་ཀྱི་དམག་ཞབས་ཐིམས་པའི་དམག་མིའི་ལས་དོན་ཐིང་གིས་བརྟག་དཔྱད་ཞིབ་འཇུག་བྱེད་རིང་མངའ་རིས་སྒར་རྫོང་དང་རུ་ཐོག་རྫོང་གི་ཉེ་འགྲམ་དུ་སྔོན་གཤེགས་དཔའ་བོའི་བང་སོ་འདྲ་པོ་ཞིག་ཤེས་རྟོགས་བྱུང་ཞིང་། བརྟག་དཔྱད་ཞིབ་བསྡུར་བྱས་པ་བརྒྱུད། དམག་ཞབས་ཐིམས་པའི་དམག་མིའི་ལས་དོན་པུའུ་ཡིས་བོད་ལྗོངས་མངའ་རིས་ས་ཁུལ་གྱི་མིང་མེད་སྔོན་གཤེགས་དཔའ་བོའི་པུར་རུས་སྔོག་འདོན་གསལ་འབྱེད་ཀྱི་ལས་དོན་སྤེལ་འགོ་ཚུགས་པ་རེད།

     མངའ་རིས་ས་ཁུལ་གྱི་དམིགས་བསལ་གནམ་གཤིས་ཆ་རྐྱེན་དབང་གིས་ས་འོག་ནས་ཐོན་པའི་པུར་རུས་བལྟོས་བཅས་ཀྱིས་ཆ་ཚང་པོ་གནས་ཡོད་པ་དང་། དེས་རྗེས་མཐུད་ཀྱི་ཐོབ་ཐང་ངོས་འཛིན་དང་མགོ་གདོང་བསྐྱར་གསོ་སོགས་ཀྱི་ལས་དོན་སྤེལ་རྒྱུར་ཆ་རྐྱེན་བཟང་པོ་བསྐྲུན་ཡོད།

     རྒྱལ་ཁབ་ཀྱི་སྔོན་གཤེགས་དཔའ་བོའི་པུར་རུས་ཀྱི་DNAགསལ་འབྱེད་ཚོད་ལྟ་ཁང་གིས་གཏན་འབེབས་གོ་རིམ་གཞིར་བཟུང་ཐོབ་ཐང་ལ་ཞིབ་བཤེར་གཏན་འབེབས་བྱས་པ་བརྒྱུད། མཐར་སྔོན་གཤེགས་དཔའ་བོ་8ཀྱི་ཐོབ་ཐང་ངོས་འཛིན་ཐུབ་ཡོད།

     བོད་རང་སྐྱོང་ལྗོངས་ཀྱི་དམག་ཞབས་ཐིམས་པའི་དམག་མིའི་ལས་དོན་ཐིང་གིས། རྗེས་མཐུད་གོ་རིམ་གཞིར་བཟུང་སྔོན་གཤེགས་དཔའ་བོ་8ཀྱི་པུར་འཇུག་ལས་དོན་སྤེལ་འགོ་འཛུགས་རྒྱུ་དང་། པུར་འཇུག་མཛད་སྒོ་གཟབ་རྒྱས་འཚོགས་ཏེ། མཐའ་མཚམས་དམག་དམངས་ཀྱིས་སྔོན་གཤེགས་དཔའ་བོའི་སྙིང་སྟོབས་མཉམ་དུ་དར་སྤེལ་དང་ཐུན་མོང་ཐོག་མཐའ་སྲུང་རྒྱལ་སྲུང་བྱ་རྒྱུར་སྐུལ་འདེད་གཏོང་རྒྱུ་ཡིན་ཞེས་བརྗོད་ཡོད།