▶ཡུལ་ཤུལ་དང་ཁྲེང་ཏུའུ་བར་གྱི་མཉམ་ལས་འདི་ཡག
ཟླ་5ཚེས་21ཉིན། མཚོ་སྔོན་ཡུལ་ཤུལ་བོད་རིགས་རང་སྐྱོང་ཁུལ་འབྱུང་ཁམས་ཡུལ་སྐོར་དང་སྐྱེ་ལྡན་ཞིང་འབྲོག་ཐོན་རྫས་ཁྲེན་ཏུའུ་རུ་འོས་སྦྱོར་བྱེད་པའི་ཚོགས་འདུ་དེ་ཁྲེང་ཏུའུ་གྲོང་ཁྱེར་ཧོན་ཆིའུ་ལྟེ་བའི་ཐང་ཆེན་དུ་བདེ་བླག་ངང་འཚོགས་པ་དང་། ཡུལ་ཤུལ་དང་ཁྲེང་ཏུའུ་བར་གྱི་རིག་གནས་ཡུལ་སྐོར་དང་ཞིང་འབྲོག་མཉམ་ལས་ཀྱི་ལེའུ་གསར་པ་མུ་མཐུད་བརྩམས་ཡོད།
འོས་སྦྱོར་བྱེད་སའི་ཡུལ་དངོས་སུ་ཕ་ཡུལ་ཡུལ་ཤུལ་ནས་ཡིན་པའི་གཞས་པ་གཞས་མས་སྐད་ངག་སྙན་མོས་མཆོད་པ་ཡོད་ལ། དེ་བཞིན་སྤྲོ་སེམས་རབ་ཏུ་འཁོལ་བའི་རལ་པའི་གར་སྟབས་དང་། ཐུན་མོང་མ་ཡིན་པའི་མི་རིགས་ཀྱི་རྒྱན་གོས། སྣ་མང་ཕུན་སུམ་ཚོགས་པའི་ཞིང་འབྲོག་ཐོན་རྫས་སོགས་ཀྱིས་ཕྱོགས་ཡོངས་ནས་ཡུལ་ཤུལ་གྱི་རི་ཆུ་དང་མི་ཆོས་རིག་གནས་ཀྱི་ཡིད་དབང་འཕྲོག་ཤུགས་མངོན་པར་བྱས་ཡོད།
ཡུལ་ཤུལ་ལ་རི་བོའི་ཕ་ས་དང་ཆུ་བོའི་འགོ་ཁུངས་ཞེས་པའི་མཚན་སྙན་ཐོབ་ཡོད་ལ་འབྱུང་ཁམས་ཁོར་ཡུག་གི་གནས་བབ་གལ་ཆེན་བཟུང་ཡོད། རྨ་འབྲི་རྫ་གསུམ་གནས་མཆོག་འདི་ནས་རང་རྒྱལ་གྱི་ས་གཞི་ཆེན་མོར་བཞུར་ནས་རྒྱུག གཙང་གསུམ་ཆུ་འགོ་རྒྱལ་ཁབ་སྤྱི་གླིང་དང་། ཨ་ཆེན་གངས་རྒྱབ་འཛམ་གླིང་གི་རང་བྱུང་ཤུལ་བཞག་ཁུལ། རོང་པོ་ཐང་རྒྱལ་སྤྱིའི་འདམ་ར་གལ་ཆེན་སོགས་སྐྱེ་ཁམས་ཐོན་ཁུངས་འདི་གར་ཆགས་ཡོད་ཅིང་།ཐང་བོད་གནའ་ལམ་དང་ཇ་རྟའི་གནའ་ལམ། དར་གོས་ལྷོ་ལམ་བཅས་གནས་འདི་གར་བརྒྱུད་ཡོད།
2023ལོར་ཡུལ་ཤུལ་ཁུལ་གྱིས་རྒྱལ་སྤྱིའི་འབྱུང་ཁམས་ཡུལ་སྐོར་བྱ་ཡུལ་གྱི་ཐོག་མའི་འདེམས་ཁུལ་འཛུགས་སྐྲུན་ཞེས་པའི་ལོ་གསུམ་གྱི་བྱ་སྤྱོད་ཇུས་གཞི་དང་འབྱུང་ཁམས་ཞིང་འབྲོག་ལས་སྤུས་ཚད་མཐོ་བའི་འཕེལ་རྒྱས་ཞེས་པའི་ལོ་གསུམ་གྱི་བྱ་སྤྱོད་འཆར་གཞི་བཅས་བཏོན་པ་དང་། དུས་དེ་ནས་བཟུང་འབྱུང་ཁམས་ཡུལ་སྐོར་ལས་རིགས་དང་འབྱུང་ཁམས་འབྲོག་ལས་འདི་གཉིས་མཉམ་གཤིབ་མཉམ་སྐྱོད་བྱས་ཏེ་འཕེལ་རྒྱས་ཤུགས་ཆེན་ཕྱིན་པ་རེད།
འོས་སྦྱོར་ཚོགས་འདུའི་ཡུལ་དངོས་སུ་ཡུལ་ཤུལ་ཁུལ་མི་དམངས་སྲིད་གཞུང་དང་སི་ཁྲོན་ཞིང་ཆེན་རླུང་འཕྲིན་བརྙན་འཕྲིན་ལས་ཁུངས་ཀྱིས་འཐབ་ཇུས་མཉམ་ལས་སྒྲོམ་གཞིའི་གྲོས་མཐུན་ལ་མིང་རྟགས་བཀོད་པ་དང་། ཡུལ་ཤུལ་ཁུལ་རིག་གནས་ལུས་རྩལ་ཡུལ་སྐོར་རླུང་འཕྲིན་བརྙན་འཕྲིན་ཅུས་དང་སི་ཁྲོན་འབྱུང་ཁམས་ཡུལ་སྐོར་མཐུན་ཚོགས། སི་ཁྲོན་ཞིང་ཆེན་གྱི་སྒར་ས་དང་སྒེར་འཁོར་ཡུལ་སྐོར་མཐུན་ཚོགས། དེ་བཞིན་ནག་ཆུ་གྲོང་ཁྱེར་གྱི་རིག་གནས་ཡུལ་སྐོར་ཅུས། དཀར་མཛེས་ཁུལ་རིག་གནས་རླུང་འཕྲིན་བརྙན་འཕྲིན་ཡུལ་སྐོར་ཅུས་བཅས་ཀྱིས་འཐབ་ཇུས་མཉམ་ལས་སྒྲོམ་གཞིའི་གྲོས་མཐུན་ལ་མིང་རྟགས་བཀོད་པ་དང་། ས་གནས་གཉིས་ཀྱི་རིག་གནས་ཡུལ་སྐོར་དང་ཞིང་འབྲོག་འབྲེལ་ཡོད་ཁེ་ལས་ཀྱིས་ཐོན་ལས་འཕེལ་རྒྱས་ཀྱི་མཉམ་ལས་གྲོས་མཐུན་ལ་མིང་རྟགས་བཀོད་པ་རེད། ད་དུང་ཁྲེང་ཏུའུ་ནས་ཡུལ་ཤུལ་དང་། དེ་ནས་ལྷ་ས་བར་གྱི་“ཁྲོན་བོད་མཚོ་དབུས་རྒྱུད་ལམ་ཐིག” ཅེས་པའི་སྒེར་འཁོར་བཏང་ནས་བོད་ལྗོངས་སུ་བསྐྱོད་པའི་སྤུས་རྟགས་ཚོགས་པར་དར་ཆ་སྤྲད་ཡོད།
ད་ཐེངས་ཀྱི་འོས་སྦྱོར་ཚོགས་འདུའི་ཐོག ཁྱོན་ཡུལ་ཤུལ་ནས་ཡོང་བའི་ཁེ་ལས་35ཡི་ཞིང་འབྲོག་ཐོན་རྫས་100ལྷག་ཙམ་འགྲེམས་སྟོན་ནང་ཞུགས་པ་མ་ཟད། ད་དུང་ཡུལ་ཤུལ་གྱི་བྱེས་སྐྱེས་སྲོག་ཆགས་ཀྱི་པར་ལེན་བརྩམས་ཆོས་དང་འབྲི་ཆུ་འབབ་རྒྱུད་ཀྱི་གནའ་བོའི་བྲག་བརྐོས་རི་མོའི་ལོ་རྒྱུས་གཅིག་སྡུད་ཐོག་འགྲེམས་སྟོན་བྱས་ཡོད། ཐོན་རྫས་འོས་སྦྱོར་སྔོན་དཔག་བྱས་ན་ཉིན་3ཡིན་པ་དང་། དེའི་རིང་ད་དུང་ཁྲེང་ཏུའུ་གྲོང་ཁྱེར་རོ་མཱ་གུང་གསེང་ཐང་ཆེན་དང་བྲོ་ར་ཁྲ་མོ་སྐོར་བྲོ་མཐུན་ཚོགས། ཁོན་གྲན་སྲང་ལམ་སོགས་སུ་བསྐྱོད་ནས་སྐོར་བྲོ་འཁྲབ་སྟོན་དང་རྒྱན་གོས་འགྲེམས་སྟོན་སོགས་ཀྱི་བྱེད་སྒོ་སྤེལ་རྒྱུ་ཡིན་པ་རེད།
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
ཞུ་དག གཡུ་སྒྲོན།
གསར་འགོད་པ། བདེ་གཡང་།