ཞི་ཅིན་ཕིང་གིས། མིག་སྔར་རེས་སྐོར་གསར་པའི་ཚན་རྩལ་གསར་བརྗེ་དང་ཐོན་ལས་འཕོ་འགྱུར་གོང་འཕེལ་མྱུར་པོ་བྱུང་བ་དང་མི་ཐབས་རིག་ནུས་སོགས་ལག་རྩལ་གསར་པ་གོང་འཕེལ་མྱུར་པོ་བྱུང་ནས། མིའི་རིགས་ཀྱིས་འཛམ་གླིང་ལ་ངོས་འཛིན་དང་འཛམ་གླིང་སྒྱུར་བཀོད་བྱེད་པའི་ནུས་ཤུགས་ཆེ་རུ་ཕྱིན་པ་དང་དུས་མཚུངས་སུ། སྔོན་དཔག་མི་ཐུབ་པའི་ཉེན་ཁ་དང་འགྲན་སློང་རབ་དང་རིམ་པ་འཕྲད་ཡོད། ང་ཚོས་གྲངས་འཛིན་ཅན་དང་། དྲ་རྒྱ་ཅན། རིག་ནུས་ཅན་བཅས་ཀྱི་གོང་འཕེལ་གྱི་འཕེལ་ཕྱོགས་ཆེན་པོ་ཁོང་དུ་ཆུད་པ་བྱས་ཏེ། གསར་གཏོད་དེ་སྒུལ་ཤུགས་ཨང་དང་པོར་བརྩི་བ་དང་། བདེ་འཇགས་དེ་མཐའ་ཚད་ཀྱི་བླང་བྱར་བརྩི་བ། ཀུན་ཕན་དེ་རིན་ཐང་གི་དོན་གཉེར་བྱེད་སར་བརྩི་བ་བཅས་ཀྱིས་དྲ་རྒྱའི་བར་མཐོངས་ཀྱི་གསར་གཏོད་གོང་འཕེལ་དང་། བདེ་འཇགས་གོང་འཕེལ། ཀུན་ཕན་གོང་འཕེལ་བཅས་ལ་སྐུལ་འདེད་གང་མགྱོགས་བཏང་ཐོག དེ་བས་མཛེས་སྡུག་ལྡན་པའི“གྲངས་འཛིན་གྱི་འབྱུང་འགྱུར”ཕྱོགས་སུ་ལག་གདང་སྦྲེལ་ནས་མདུན་བསྐྱོད་བྱེད་དགོས། ཀྲུང་གོས་འཛམ་གླིང་རྒྱལ་ཁབ་ཁག་དང་མཉམ་དུ་ཆ་འཕྲིན་གསར་བརྗེའི་གོང་འཕེལ་གྱི་ལོ་རྒྱུས་ལ་རང་འགུལ་ངང་དམ་འཛིན་བྱེད་པ་དང་། ལག་གདང་སྦྲེལ་ནས་དྲ་རྒྱའི་བར་མཐོངས་ཀྱི་ལས་དབང་གཅིག་མཐུན་ཚོགས་པ་སྐྲུན་ནས། དྲ་སྦྲེལ་གྱིས་མི་དམངས་དང་འཛམ་གླིང་ལ་བདེ་སྐྱིད་སྔར་ལས་ལྷག་པ་བསྐྲུན་འདོད་ཡོད་ཅེས་བསྟན་གནང་ཡོད།

     སྤྱི་ལོ་2024ལོའི་འཛམ་གླིང་དྲ་སྦྲེལ་ཚོགས་ཆེན་གྱི་ཝུའུ་ཀྲེན་དབུ་ཚོགས་དེ་ཉིན་དེར་ཀྲེ་ཅང་ཞིང་ཆེན་ཐུང་ཤང་གྲོང་ཁྱེར་ཝུའུ་ཀྲེན་གྲོང་རྡལ་དུ་འགོ་ཚུགས་པ་དང་། བརྗོད་བྱ་གཙོ་བོ་ནི“མི་རྩ་བར་འཛིན་པ་དང་རིག་ནུས་ལ་བརྟེན་ནས་གཤིས་བཟང་གཏོད་པའི་གྲངས་འཛིན་གྱི་འབྱུང་འགྱུར་ཞེས་པ་སྟེ། ལག་གདང་སྦྲེལ་ནས་དྲ་རྒྱའི་བར་མཐོངས་ཀྱི་ལས་དབང་གཅིག་མཐུན་ཚོགས་པ་སྐྲུན་དགོས་ཞེས་པ་དེ་ཡིན་ཞིང་། དེ་ནི་འཛམ་གླིང་དྲ་སྦྲེལ་ཚོགས་ཆེན་གྱིས་གཙོ་གཉེར་བྱས་པ་དང་ཀྲེ་ཅང་ཞིང་ཆེན་མི་དམངས་སྲིད་གཞུང་གིས་སྒྲུབ་འགན་འཁུར་བ་ཞིག་ཡིན།